ប្រទេសចិន និយាយថា ការគាំទ្ររបស់សហរដ្ឋអាមេរិកចំពោះតៃវ៉ាន់ «ឥតប្រយោជន៍» ក្រោយគណៈប្រតិភូក្រុងវ៉ាស៊ីនតោនធ្វើទស្សនកិច្ចនៅទីក្រុងតៃប៉ិ ចំពេលមានវិបត្តិអ៊ុយក្រែន។
ដំណើរទស្សនកិច្ចរយៈពេល ២ ថ្ងៃ បានកើតឡើងចំពេលដែលរុស្ស៊ីឈ្លានពានអ៊ុយក្រែនដែលបានជំរុញឱ្យប្រធានាធិបតីតៃវ៉ាន់ Tsai Ing-wen បង្កើនកម្រិតប្រុងប្រយ័ត្នផ្នែកយោធារបស់ខ្លួនប្រឆាំងនឹងកងកម្លាំងបរទេសដែលអាចឆ្លៀតឱកាស។
គណៈប្រតិភូដែលត្រូវបានតែងតាំងដោយលោក Biden ត្រូវបានដឹកនាំដោយលោក Mike Mullen ដែលបានបម្រើការជាប្រធានគណៈសេនាធិការចម្រុះនៅក្នុងរដ្ឋបាល George W. Bush និង Barack Obama ។ទស្សនកិច្ចបានចូលរួមដោយអតីតទីប្រឹក្សាសន្តិសុខជាតិ Evan Medeiros និង Mike Green និងអតីតមន្ត្រីការពារជាតិជាន់ខ្ពស់ Michele Flournoy និង Meghan O''Sullivan។
ក្នុងការឆ្លើយតបទៅនឹងដំណើរទស្សនកិច្ចរបស់សហរដ្ឋអាមេរិកអ្នកនាំពាក្យក្រសួងការបរទេសចិន លោក Wang Wenbin បានបញ្ជាក់ជាថ្មីពីជំហររបស់ទីក្រុងប៉េកាំង ចំពោះកោះតៃវ៉ាន់ហើយបានច្រានចោលការគាំទ្ររបស់អាមេរិកថាជា «ឥតប្រយោជន៍»។
លោកបាននិយាយថា៖ «ឆន្ទៈរបស់ប្រជាជនចិនក្នុងការការពារអធិបតេយ្យភាព និងបូរណភាពទឹកដីរបស់ប្រទេសយើង គឺមិនអាចផ្លាស់ប្តូរបានទេ។អ្នកណាដែលសហរដ្ឋអាមេរិកបញ្ជូនទៅដើម្បីបង្ហាញនូវអ្វីដែលហៅថាការគាំទ្រចំពោះតៃវ៉ាន់នឹងគ្មានប្រយោជន៍អ្វីឡើយ»។
លោក Wang បាននិយាយថា៖ «ប្រសិនបើសហរដ្ឋអាមេរិក កំពុងព្យាយាមគំរាមកំហែង និងដាក់សម្ពាធលើប្រទេសចិននោះ យើងត្រូវប្រាប់ពួកគេថា នៅចំពោះមុខមហាកំផែងដែកដែលបង្កើតដោយប្រជាជនចិនចំនួន ១,៤ ពាន់លាននាក់ការរារាំងយោធាណាមួយ គឺគ្រាន់តែជាកាកសំណល់ប៉ុណ្ណោះ»៕