.jpg)
រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ។ រូបថត AFP
កាលពីថ្ងៃព្រហស្បតិ៍ ទី ៣ មិនា រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បានរៀបចំសន្និសីទសារព័ត៌មានជាមួយស្ថាប័នរុស្សី និងបរទេសដោយក្នុងនោះ លោកបានលើកឡើងថា ដំណោះស្រាយសម្រាប់សង្គ្រាមនៅអ៊ុយក្រែន គឺនឹង «ត្រូវបានរកឃើញ»។
«ដំណោះស្រាយនឹងត្រូវបានរកឃើញហើយលក្ខខណ្ឌអប្បបរមាដែលយើងទទួលយកបានគឺត្រូវបានគេដឹងយ៉ាងទូលំទូលាយ និងត្រូវបានពិភាក្សាជាមួយភាគីអ៊ុយក្រែន» លោក ឡាវរ៉ូវ បាននិយាយបែបនេះ ហើយបានរិះគន់អ៊ុយក្រែនថា «បានរកឃើញហេតុផលដើម្បីពន្យារការចរចាដោយប្រហែលជាភាគច្រើនទំនងជាទទួលបានការណែនាំពីវ៉ាស៊ីនតោននេះ មិនមែនជាប្រទេសឯករាជ្យមានស្វ័យភាពដោយខ្លួនឯង»។
លោកនិយាយថា ការទាមទាររបស់រុស្ស៊ី គឺមានបំណងដើម្បីរារាំងកុំ «ឱ្យទឹកដីអ៊ុយក្រែនក្លាយជាការគំរាមកំហែងនៃការវាយប្រហារដោយផ្ទាល់ទៅលើសហព័ន្ធរុស្ស៊ី»។
លោកបន្តការអះអាងថា របបដឹកនាំអ៊ុយក្រែនគឺជារបបណាស៊ីនិយមដែលមានបំណងចង់ធ្វើការប្រល័យពូជសាសន៍ជនជាតិរុស្ស៊ី និងជនជាតិជ្វីប បើទោះបីជាលោកប្រធានាធិបតី វ៉ុឡូឌីមៀរ ហ្សេឡេនស្គី គឺជាជនជាតិជ្វីបក៏ដោយ។លោកជឿជាក់ថារុស្ស៊ីកំពុងធ្វើ «រឿងដែលត្រូវ» ក្នុងអ្វីដែលរុស្ស៊ីនិយាយថា ជា «ការបំបែកយោធាអ៊ុយក្រែន» និងផ្ដួលរំលំ «របបណាស៊ីនិយម»។
លោក ឡាវរ៉ូវ និយាយថា ក្នុងអំឡុងពេលនៃការចរចារុស្ស៊ីនឹងមិនបញ្ចប់ការវាយប្រហាររបស់ខ្លួនទេដោយអះអាងថា ពួកគេមិនអាចអនុញ្ញាតឱ្យអ៊ុយក្រែន «រក្សាហេដ្ឋារចនាសម្ព័ន្ធដែលគំរាមកំហែងរុស្ស៊ី»។ ការបន្តការវាយប្រហារបែបនេះអាចធ្វើឱ្យការចរចាកាន់តែស្មុគស្មាញ។ បន្ថែមពីលើនេះលោកនិយាយថា «ការបំបែកយោធា» របស់អ៊ុយក្រែននឹងបន្ត បើទោះបីជាមានកិច្ចព្រមព្រៀងសន្តិភាពក៏ដោយ។
លោកនិយាយថា សហរដ្ឋអាមេរិក គឺមានបំណងចង់គ្រប់គ្រងអឺរ៉ុបដូចដែលណាប៉ូឡេអុង និងហ៊ីត្លែរចង់ធ្វើក្នុងសម័យរបស់ពួកគេ។ លោកនិយាយថា៖ «ខ្ញុំចង់ធ្វើការប្រៀបធៀបមួយ៖ នៅចំណុចណាមួយ[ក្នុងប្រវត្តិសាស្ត្រ]ណាប៉ូឡេអុង និងហ៊ីត្លែរបានព្យាយាមត្រួតត្រាអឺរ៉ុបឥឡូវអឺរ៉ុបត្រូវបានត្រួតត្រាដោយសហរដ្ឋអាមេរិក» ហើយ «វាច្បាស់ណាស់ថា NATO មិនមានការសួរនាំអំពីបញ្ហានេះទេ ហើយសហភាពអឺរ៉ុបក៏ដឹងពីស្ថានភាពរបស់ខ្លួនដែរ»។ លោកក៏បានកត់សម្គាល់ថា មេដឹកនាំខាងលើទាំងពីរនេះ បានរងបរាជ័យយ៉ាងធ្ងន់ធ្ងរ និងចុងក្រោយចាញ់សង្គ្រាមបន្ទាប់ពីពួកគេព្យាយាមឈ្លានពានប្រទេសរុស្ស៊ី។
លោកនិយាយថា ការដាក់ទណ្ឌកម្មដោយលោកខាងលិចនៅពេលបច្ចុប្បន្ន គឺជាការ «យកពន្ធលើឯករាជ្យភាព» ហើយប្រទេសដែលបានចូលការដាក់ទណ្ឌកម្មបានធ្វើបែបនេះ «ក្រោមសម្ពាធ»។
លោកនិយាយថា៖ «ប្រសិនបើពួកគេរំពឹងថា រុស្ស៊ីនឹងលូនចូលក្រោមកៅអីហើយចុះចាញ់នឹងការបញ្ជាផ្ដាច់ការរបស់នរណាម្នាក់ការរំពឹងទុករបស់ពួកគេ គឺខុស។ តាមពិតទៅពួកគេគួរតែចងចាំប្រវត្តិសាស្ត្ររបស់យើងយើងមិនដែលធ្វើកិច្ចព្រមព្រៀងក្រោមសម្ពាធទេ»។
លោកចោទប្រកាន់សហរដ្ឋអាមេរិកថា បានធ្វើការកៀបសង្កត់ និងសម្លុតប្រទេសដទៃទៀត ដើម្បីទទួលបានលទ្ធផលប្រឆាំងរុស្ស៊ីនៅក្នុងការបោះឆ្នោតអង្គការសហប្រជាជាតិ។ លោកនិយាយថា៖ «យើងដឹងយ៉ាងច្បាស់អំពីវិធីសាស្ត្រដែលសមភាគីលោកខាងលិចរបស់យើងប្រើ ដើម្បីសម្រេចបាននូវលទ្ធផលទាំងនេះ៖ការកៀបសង្កត់ដោយផ្ទាល់ និងការកាច់បង្វិលដៃ»៕
