របាយការណ៍ចារកម្មលោកខាងលិចមួយ បានអះអាងថា កាលពីដើមខែកុម្ភៈ ក្រុមមន្ត្រីចិនបានជំរុញក្រុមមន្ត្រីរុស្ស៊ីកុំឱ្យធ្វើការឈ្លានពានប្រទេសអ៊ុយក្រែន មុនពេលពិធីបញ្ចប់កីឡាអូឡាំពិករដូវរងានៅក្រុងប៉េកាំង។ នេះបើយោងតាមការរាយការណ៍របស់កាសែត The New York Times ផ្អែកលើប្រភពនៅសេតវិមាន និងនៅអឺរ៉ុប។
របាយការណ៍នេះឱ្យតម្រុយថា ប្រទេសចិន មានដំណឹងផ្ទាល់ដល់មួយកម្រិតអំពីផែនការសង្គ្រាម និងចេតនារបស់ប្រទេសរុស្ស៊ី មុនពេលនៃការចាប់ផ្ដើមការឈ្លានពានកាលពីសប្ដាហ៍មុន។ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានជួបជាមួយប្រធានាធិបតីចិនលោក ស៊ី ជីនភីង មុនពិធីបើកកីឡាអូឡាំពិក ដោយបន្ទាប់ពីជំនួបនេះក្រុងម៉ូស្គូ និងក្រុងប៉េកាំងបានចេញសេចក្ដីថ្លែងការណ៍ប្រវែង ៥ ០០០ ពាក្យមួយ ដែលលើកឡើងថា ភាពជាដៃគូរបស់ពួកគេគឺ «គ្មានដែនកំណត់» ថ្កោលទោសការពង្រីកសមាជិកភាពរបស់អង្គការណាតូ និងអះអាងថា ពួកគេនឹងបង្កើតសណ្ដាប់ធ្នាប់ថ្មីជាមួយនឹង «លទ្ធិប្រជាធិបតេយ្យពិតប្រាកដ»។
របាយការណ៍ចារកម្មអំពីទំនាក់ទំនងរវាងមន្ត្រីចិន និងមន្ត្រីរុស្ស៊ីខាងលើនេះ ត្រូវបានគេកំណត់ថា ជាព័ត៌មានសម្ងាត់។ ចារកម្មនេះត្រូវបានប្រមូលផ្ដុំដោយទីភ្នាក់ងារចារកម្មលោកខាងលិចមួយចំនួន ហើយត្រូវបានមន្ត្រីជាច្រើនចាត់ទុកថាអាចទុកចិត្តបាន។
របាយការណ៍នេះ ត្រូវបានចែកចាយនៅក្នុងបណ្ដាញមន្ត្រីអាមេរិក និងទៅកាន់នៅរដ្ឋាភិបាលនៅអឺរ៉ុប ខណៈពេលដែលពួកគេកំពុងវិនិច្ឆ័យថា លោក ពូទីន នឹងធ្វើអ្វីខ្លះទៅលើប្រទេសអ៊ុយក្រែន។ ប៉ុន្តែទីភ្នាក់ងារចារកម្មនីមួយៗមានការយល់ដឹងផ្សេងគ្នាអំពីរបាយការណ៍នេះ ហើយគេមិនដឹងថា វាត្រូវបានចែកចាយដល់កម្រិតណាទេ។
មន្ត្រី ១ រូប ដែលដឹងអំពីរបាយការណ៍នេះ បាននិយាយក្នុងលក្ខខណ្ឌមិនបញ្ចេញអត្តសញ្ញាណថា គេនៅមិនទាន់ឃើញតម្រុយថា ប្រធានបទនៃការឈ្លានពានត្រូវបានពិភាក្សានៅក្នុងជំនួបរវាងលោក ពូទីន និងលោក ស៊ី ទេ។
ជុំវិញការលើកឡើងបែបនេះ អ្នកនាំពាក្យស្ថានទូតចិនប្រចាំក្រុងវ៉ាស៊ីនតោនលោក លាវ ពឹងយ៉ូ បាននិយាយថា៖ «ការអះអាងទាំងនេះ គឺជាការប្រមើលដោយគ្មានមូលដ្ឋាន ហើយមានបំណងបង្វែរការបន្ទោស និងលាបពណ៌ចិន»។
ប្រទេសចិន បានរៀបចំពិធីបិទកីឡាអូឡាំពិកនៅថ្ងៃទី ២០ កុម្ភៈ។ ១ ថ្ងៃក្រោយមកលោក ពូទីន បានប្រកាសទទួលស្គាល់ ឯករាជភាពនៃតំបន់ផ្ដាច់ខ្លួនចំនួន ២ នៅផ្នែកខាងកើតនៃប្រទេសអ៊ុយក្រែន ហើយបានបញ្ជាឱ្យកងទ័ពឆ្លងព្រំដែនចូលតំបន់ទាំង ២ នេះ។ នៅព្រឹកព្រលឹមថ្ងៃទី ២៤ ប្រទេសរុស្ស៊ី បានចាប់ផ្ដើមការឈ្លានពានចូលប្រទេសអ៊ុយក្រែន ដោយបើកការបាញ់មីស៊ីល និងកាំភ្លើងធំ ទៅលើទីក្រុងធំៗរបស់អ៊ុយក្រែន។
មន្ត្រីលោកខាងលិចបាននិយាយថា ពួកគេពិបាកជឿណាស់ថា វាគ្រាន់តែជារឿងចៃដន្យ ដែលលោក ពូទីន ចាប់ផ្ដើមការឈ្លានពានភ្លាមៗបន្ទាប់ការបញ្ចប់កីឡាអូឡាំពិក។ កាលពីឆ្នាំ ២០០៨ រុស្ស៊ី បានឈ្លានពានប្រទេសហ្សកហ្ស៊ី នៅចំកណ្ដាលពេលនៃកីឡាអូឡាំពិករដូវក្ដៅនៅក្នុងក្រុងប៉េកាំង ធ្វើឱ្យមន្ត្រីចិនខឹងសម្បាយ៉ាងខ្លាំង។
ក្នុងការឈ្លានពានលើកនេះ រុស្ស៊ីបានកោះហៅទ័ព ដែលជាធម្មតាត្រូវដាក់ពង្រាយនៅតាមព្រំដែនជាមួយប្រទេសចិន ឱ្យធ្វើដំណើរមកកាន់ព្រំដែនអ៊ុយក្រែន។ ការធ្វើបែបនេះបានបង្ហាញអំពីភាពទុកចិត្តគ្នារវាងមន្ត្រីចិន និងរុស្ស៊ី។
យ៉ាងណាមិញ ក្នុងរយៈពេលប៉ុន្មានថ្ងៃចុងក្រោយនេះ មន្ត្រីអាមេរិកមួយចំនួនបានព្យាយាមធ្វើការបញ្ចុះបញ្ចូលប្រទេសចិន ឱ្យចូលរួមក្នុងកិច្ចខិតខំប្រឹងប្រែងក្នុងការបញ្ចៀសសង្គ្រាម។
ប៉ុន្មានថ្ងៃបន្ទាប់ពីជំនួបរវាងលោក ស៊ី និងលោក ចូ បៃដិន កាលពីខែវិច្ឆិកា មន្ត្រីអាមេរិកបានធ្វើបទបង្ហាញព័ត៌មានចារកម្មអំពីការប្រមូលផ្ដុំទាហានរុស្ស៊ីនៅព្រំដែនអ៊ុយក្រែន ទៅកាន់មន្ត្រីចិន ក្នុងបំណងជំរុញពួកគេឱ្យការបញ្ចុះបញ្ចូល រុស្ស៊ីឱ្យដកទ័ពវិញ។ ក្រៅពីនេះ មន្ត្រីអាមេរិកបានរៀបចំកិច្ចប្រជុំជាច្រើនជាមួយមន្ត្រីចិនដែលរួមមានឯកអគ្គរដ្ឋទូតចិនប្រចាំក្រុងវ៉ាស៊ីនតោន លោក ឈីន កាង និងរដ្ឋមន្ត្រីការបរទេសចិនលោក វ៉ាង យី។ ប៉ុន្តែក្នុងជំនួបទាំងនេះ មន្ត្រីចិនបង្ហាញការមិនជឿថា លោក ពូទីន នឹងសម្រេចឈ្លានពានប្រទេសអ៊ុយក្រែន។
កាលពីខែធ្នូ មន្ត្រីអាមេរិកបាននិយាយថា ពួកគេទទួលព័ត៌មានចារកម្មថា ក្រុងប៉េកាំង បានចែករំលែកព័ត៌មានជាមួយក្រុងម៉ូស្គូ ដោយប្រាប់មន្ត្រីរុស្ស៊ីថា សហរដ្ឋអាមេរិកកំពុងសាបព្រោះការមិនចុះសម្រុងគ្នា ហើយចិននឹងមិនរារាំងផែនការរបស់រុស្ស៊ី។
រហូតមកដល់ពេលនេះ ការសន្និដ្ឋាន និងការវាយតម្លៃរបស់ភ្នាក់ងារចារកម្មអាមេរិកអំពីផែនការរបស់រុស្ស៊ី គឺជាទូទៅមានភាពត្រឹមត្រូវ។ អាមេរិកបានចាប់ផ្ដើមយុទ្ធនាការចែកចាយព័ត៌មានចារកម្មនៅចុងឆ្នាំមុន ដោយដំបូងចែកចាយជាសម្ងាត់ជាមួយសម្ព័ន្ធមិត្ត ប៉ុន្តែក្រោយមកបានធ្វើការចែកចាយជាសាធារណៈក្នុងបំណងធ្វើឱ្យខូចដល់ផែនការរបស់រុស្ស៊ី។
អ្នកវិភាគមួយចំនួនបាននិយាយថា លោក ពូទីន បានជ្រើសរើសពេលវេលាដោយប្រុងប្រយ័ត្ន។ ចំណុចកណ្ដាលនៃផែនការរបស់រុស្ស៊ី ដើម្បីទប់ទល់នឹងទណ្ឌកម្មលោកខាងលិច គឺជំនួយ និងការគាំទ្រពីប្រទេសចិន។ ប្រសិនបើលោក ពូទីន ធ្វើការឈ្លានពានមុនកីឡាអូឡាំពិកក្រុងប៉េកាំងនោះ លោកនឹងបាត់បង់ជំនួយ និងការគាំទ្រពីប្រទេសចិន។ ការចេញសេចក្ដីថ្លែងការណ៍រួមរវាងមេដឹកនាំទាំង ២ មុនកីឡាអូឡាំពិក គឺជាសញ្ញាមួយដែលបង្ហាញថា ប្រទេសចិន បានផ្ដល់ការគាំទ្ររបស់ពួកគេចំពោះប្រទេសរុស្ស៊ី រួចទៅហើយ។
ចាប់តាំងពីសង្គ្រាមនេះមក ប្រទេសចិន បានព្យាយាមរក្សាជំហរកណ្ដាល ប៉ុន្តែបានបង្ហាញ ភាពលម្អៀងទៅរកប្រទេសរុស្ស៊ី។ ពួកគេបានបង្ហាញការគាំទ្រចំពោះការព្រួយបារម្ភរុស្ស៊ីអំពីការពង្រីករបស់អង្គការណាតូ ហើយបានប្រើប្រាស់ពាក្យ «អធិបតេយ្យភាព» ដោយមិនច្បាស់លាស់។ អ្នកនាំពាក្យក្រសួងការបរទេសចិនបានបដិសេធមិនប្រើពាក្យ «ឈ្លានពាន» នៅពេលនិ យាយអំពីសង្គ្រាមរុស្ស៊ី-អ៊ុយក្រែន។ ប្រទេសចិន ក៏បានរិះគន់ការដាក់ទណ្ឌកម្មលើរុស្ស៊ីដោយសហរដ្ឋអាមេរិក និងសម្ព័ន្ធមិត្តរបស់ពួកគេ៕
វីដេអូ៖