សង្គ្រាមនៅអ៊ុយក្រែន បានធ្វើឱ្យជនភៀសខ្លួនជនស៊ីវិលកើនឡើងលឿនបំផុតនៅអឺរ៉ុបក្នុងរយៈពេល ៣ ទសវត្សរ៍ចុងក្រោយ ដោយជំរុញឱ្យមានការប្រៀបធៀបជាមួយសង្គ្រាមបាល់កង់នៃទសវត្សរ៍ឆ្នាំ ១៩៩០ និងការផ្លាស់លំនៅរបស់ប្រជាជនដ៏ច្រើនសន្ធឹកសន្ធាប់ ដែលកើតឡើងក្រោយសង្គ្រាមលោកលើកទី២។
យ៉ាងហោចណាស់មនុស្ស ១ លាននាក់ ដែលភាគច្រើនជាស្ត្រី និងកុមារបានភៀសខ្លួនចេញពីប្រទេសអ៊ុយក្រែន ទៅកាន់ប្រទេសជិតខាងទៅភាគខាងលិចក្នុងរយៈពេល ៧ ថ្ងៃ ដំបូងនៃការលុកលុយរបស់រុស្ស៊ី។ នេះបើយោងតាមទីភ្នាក់ងារជនភៀសខ្លួនរបស់អង្គការសហប្រជាជាតិ ដែលបានប្រមូលស្ថិតិកត់ត្រាដោយអាជ្ញាធរអន្តោប្រវេសន៍នៃប្រទេសទាំងនេះ ហើយតួលេខនោះមិនរាប់បញ្ចូលអ្នកដែលភៀសខ្លួនផ្ទៃក្នុងនៃប្រទេសអ៊ុយក្រែន ឬអ្នកដែលភៀសខ្លួន ឬត្រូវបានគេបញ្ជាឱ្យជម្លៀសទៅទឹកដីរុស្ស៊ីទេ។
ក្នុងរយៈពេលមិនដល់ ១ សប្ដាហ៍ផងជើងហោះហើរចេញពីអ៊ុយក្រែន បានកើនឡើងយ៉ាងហោចណាស់ ១០ ដង ខ្ពស់ជាងកំណត់ត្រាមួយសប្ដាហ៍នៃមនុស្សចូលអឺរ៉ុបក្នុងអំឡុងវិបត្តិចំណាកស្រុកអឺរ៉ុបនៃឆ្នាំ ២០១៥ ហើយជិតទ្វេដងនៃចំនួនជនភៀសខ្លួនដែលត្រូវបានកត់ត្រាដោយអង្គការសហប្រជាជាតិក្នុងអំឡុងពេល ១១ ថ្ងៃដំបូងនៃសង្គ្រាមកូសូវ៉ូ ក្នុងឆ្នាំ ១៩៩៩។
ចលនាឆ្ពោះទៅទិសខាងលិចជាប្រវត្តិសាស្ត្រនៃជនភៀសខ្លួន បានធ្វើឱ្យមានមនុស្សតម្រង់ជួររហូតដល់ ២៤ ម៉ោង នៅច្រកព្រំដែនជាមួយប៉ូឡូញម៉ុលដាវី ហុងគ្រី ស្លូវ៉ាគី និងរូម៉ានីហើយបានជំរុញឱ្យមានការឆ្លើយតបផ្នែកមនុស្សធម៌ដ៏ធំធេងពីរដ្ឋាភិបាលនិងជនស្ម័គ្រចិត្ត។ ជនភៀសខ្លួនត្រូវបានជ្រកកោននៅក្នុងសាលា រៀនក៏ដូចជាផ្ទះឯកជន ជំរំបណ្ដោះអាសន្នមជ្ឈមណ្ឌលសន្និសីទ កន្លែងលក់ស្រា និងសូម្បីតែផ្ទះរបស់សមាជិកសភាម៉ុលដាវី។
ជនភៀសខ្លួនខ្លះជឿថា សង្គ្រាមនឹងបញ្ចប់ក្នុងពេលឆាប់ៗនេះ ដែលអនុញ្ញាតឱ្យពួកគេត្រឡប់ទៅវិញយ៉ាងឆាប់រហ័ស។ ប្រសិនបើការភៀសខ្លួនលាតសន្ធឹងអស់ជាច្រើនឆ្នាំវានឹងបង្ហាញពីបញ្ហារយៈពេលវែងសម្រាប់អ៊ុយក្រែន ដែលនឹងប្រឈមមុខនឹងលំហូរចេញនូវប្រជាជនមានការអប់រំ និងពិបាកដល់ប្រទេសម្ចាស់ផ្ទះដែលធនធានមានកម្រិតហើយផ្នត់គំនិតប្រឆាំងនឹងជនអន្តោប្រវេសន៍ក៏នឹងកាន់តែកើនឡើងកាន់តែខ្លាំង។
ប៉ុន្តែនេះក៏អាចជាឱកាសសម្រាប់បណ្តាប្រទេសនៅអឺរ៉ុបខាងកើតដូចជាប្រទេសម៉ុលដាវី ដែលធ្លាប់បាត់បង់ប្រជាជនអស់ជាច្រើនក្នុងប៉ុន្មានទសវត្សរ៍ស្រាប់តែអាចរកឃើញថា ពួកគេទទួលបានជនអន្តោប្រវេសន៍ជាច្រើនដែលមានការអប់រំ។
ស្ថិតិនៃការភៀសខ្លួនអាចមានភាពមិនច្បាស់លាស់ជាពិសេសនៅក្នុងដំណាក់កាលដំបូងនៃវិបត្តិថ្មីដ៏ច្របូកច្របល់បែបនេះ។ មន្ត្រីអង្គការសហប្រជាជាតិបាននិយាយថា សង្គ្រាមនេះ អាចបង្កើតជនភៀសខ្លួនរហូតដល់ទៅ ៤ លាននាក់។ លោក Philipp Ther សាស្ត្រាចារ្យប្រវត្តិសាស្ត្រនៅសាកលវិទ្យាល័យអឺរ៉ុបកណ្ដាល និងជាអ្នកនិពន្ធសៀវភៅប្រវត្តិសាស្ត្រនៃជនភៀសខ្លួននៅអឺរ៉ុបបាននិយាយថា ប្រសិនបើការប្រយុទ្ធកាន់តែអូសបន្លាយ នោះជនជាតិអ៊ុយក្រែន នឹងបន្តធ្វើចំណាកស្រុកក្នុងអត្រាបច្ចុប្បន្ន។
វិសាលភាពនៃការភៀសខ្លួននៅសប្ដាហ៍នេះបង្កឱ្យមានការជាប់គាំងបន្ទាប់បន្សំនៅតាមព្រំដែនផងដែរ។ រដ្ឋមន្ត្រីក្រសួងមហាផ្ទៃប្រទេសម៉ុលដាវី លោកស្រី Ana Revenco បាននិយាយនៅក្នុងបទសម្ភាសតាមទូរស័ព្ទថា៖ «នៅប្រទេសម៉ុលដាវី រដ្ឋាភិបាលបានគ្រោងទុកជាច្រើនខែសម្រាប់ការហូរចូលជនភៀសខ្លួន។ ប៉ុន្តែទំហំនៃវិបត្តិនេះគឺគួរឱ្យភ្ញាក់ផ្អើល»។
គិតត្រឹមយប់ថ្ងៃចន្ទ មនុស្ស ៧ ម៉ឺននាក់ ច្រើនជាងការព្យាកររបស់រដ្ឋាភិបាលទ្វេដងបានចូលទៅក្នុងប្រទេសម៉ុលដាវី ដែលជាប្រទេសមានប្រជាជនត្រឹមតែ ២,៦ លាននាក់ប៉ុណ្ណោះ និងជាប្រទេសក្រីក្របំផុតមួយរបស់អឺរ៉ុប។
គួរបញ្ជាក់ផងដែរ ចំនួនប្រជាជនក្នុងប្រទេសអ៊ុយក្រែន ដែលងាយរងគ្រោះនឹងការផ្លាស់លំនៅផ្ទៃក្នុងមានចំនួនចន្លោះពី ១ លានទៅ ៥ លាននាក់ ហើយអាចជាការផ្លាស់លំនៅដោយបង្ខំដ៏ធំបំផុតនៅអឺរ៉ុបក្នុងសតវត្សរ៍ទី២១៕