រដ្ឋាភិបាលចិនបានប្រកាសថា ខ្លួនកំពុងធ្វើសមយុទ្ធយោធារយៈពេលជាង ១ សប្ដាហ៍នៅសមុទ្រចិនខាងត្បូង ក្នុងតំបន់មួយរវាងខេត្តហៃណាំរបស់ខ្លួន និងប្រទេសវៀតណាម។
ប្រទេសចិន ប្រកាន់ជំហរថា ផ្នែកធំនៃផ្លូវទឹកសមុទ្រចិនខាងត្បូង គឺរបស់ខ្លួន ហើយបានសាងសង់កោះសិប្បនិម្មិត និងអាកាសយានដ្ឋាននៅលើថ្មប៉ប្រះទឹក និងកូនកោះមួយចំនួនបង្កឱ្យមានការព្រួយបារម្ភយ៉ាងទូលំទូលាយនៅក្នុងតំបន់ និងក្នុងសហរដ្ឋអាមេរិក។
នៅក្នុងសេចក្ដីថ្លែងការណ៍មួយកាលពីល្ងាចថ្ងៃសុក្រ រដ្ឋបាលសុវត្ថិភាពដែនសមុទ្រកោះហៃណាំបាននិយាយថា សមយុទ្ធនឹងចាប់ផ្ដើមនៅថ្ងៃនោះ និងមានរយៈពេលរហូតដល់ថ្ងៃទី ១៥ ខែមីនា។អាជ្ញាធរបានផ្ដល់កូអរដោនេសម្រាប់តំបន់សមយុទ្ធដែលហាមឃាត់មិនឱ្យទូកស៊ីវិលចូលនៅប្រហែលចំកណ្ដាលផ្លូវទឹករវាងក្រុងសាន់យ៉ាកោះហៃណាំ និងក្រុងហ្វេរបស់ប្រទេសវៀតណាម។ ក្រុងសាន់យ៉ាជាតំបន់មូលដ្ឋានទ័ពចិនដ៏សំខាន់បំផុតនៅសមុទ្រចិនខាងត្បូង។
ផ្នែកមួយនៃតំបន់សមយុទ្ធនេះ គឺស្ថិតនៅក្នុងតំបន់សេដ្ឋកិច្ចផ្ដាច់មុខរបស់វៀតណាម ហើយវៀតណាមធ្លាប់រិះគន់ចិនចំពោះអ្វី ដែលខ្លួនហៅថា ការរំលោភលើអធិបតេយ្យភាពរបស់ខ្លួន៕