ដោយចៀសវាងការព្រួយបារម្ភអំពីសង្គ្រាមរុស្ស៊ី-អ៊ុយក្រែន ប្រទេសចិន បានបង្ហាញផែនការស្ដារសេដ្ឋកិច្ចរបស់ខ្លួនសម្រាប់ឆ្នាំ ២០២២ ដោយផ្ដោតលើកំណើន ការបង្កើនការងារ និងបង្កើនការគាំពារសុខុមាលភាពសង្គម ខណៈពេលដែលលោកប្រធានាធិបតី ស៊ី ជីនភីង គ្រោងកាន់កាប់អំណាច ១ អាណត្តិទៀត។
កាលពីថ្ងៃសៅរ៍ លោកនាយករដ្ឋមន្ត្រី លី កេឈាង បានបញ្ជូនរបាយការណ៍ការងារប្រចាំឆ្នាំរបស់រដ្ឋាភិបាលទៅកាន់សភាប្រជាជនចិន ដោយរបាយការណ៍នេះបានចៀសវាងប្រធានបទសង្គ្រាមនៅអ៊ុយក្រែន។
សារបង្កប់ន័យក្នុងរបាយការណ៍នេះ គឺហាក់ដូចជានិយាយថា ប្រទេសចិន អាចទប់ទល់នឹងភាពចលាចលនៅអឺរ៉ុប ហើយនឹងផ្ដោតលើការរក្សាប្រជាជនចិនឱ្យពេញចិត្តនឹងរស់នៅ និងមានការងារធ្វើរហូតដល់ពេលនៃសមាជគណបក្សកុម្មុយនីស្តចិននៅចុងឆ្នាំនេះ នៅពេលដែលគេគិតថា លោក ស៊ី នឹងក្ដាប់យកឱកាសកាន់អំណាច ១ អាណត្តិទៀត។
លោក លី បានសរសេរថា៖ «នៅក្នុងការងាររបស់យើងនៅឆ្នាំនេះយើងត្រូវធ្វើឱ្យស្ថិរភាពសេដ្ឋកិច្ចជាអាទិភាពកំពូលរបស់យើងនឹងបន្តការរីកចម្រើន ខណៈពេលដែលធានាបាននូវស្ថិរភាព»។
តាមរយៈការប្រកាសពីគោលដៅសម្រាប់កំណើនសេដ្ឋកិច្ច «ប្រមាណ ៥,៥ ភាគរយ» នៅឆ្នាំនេះ លោក លី បានពង្រឹងការសង្កត់ធ្ងន់របស់រដ្ឋាភិបាលលើកំណើនក្នុងពេលនៃការប្រឈមវិបត្តិធំៗ ដូចជាកូវីដ ១៩ និងសង្គ្រាមនៅអ៊ុយក្រែន។ គោលដៅនេះ គឺទាបជាងកំណើន ៨,១ ភាគរយ ដែលប្រទេសចិន បានរាយការណ៍កាលពីឆ្នាំមុន ប៉ុន្តែខ្ពស់ជាងការប៉ាន់ស្មានដោយអ្នកជំនាញក្នុងករណីមិនមានបង្កើនចំណាយធំដុំដោយរដ្ឋាភិបាល។
កំណើនសេដ្ឋកិច្ចរបស់ចិន គឺកំពុងថយល្បឿន។ ការបិទខ្ទប់តៗគ្នា និងវិធានការដាក់កម្រិតលើការធ្វើដំណើរបានប៉ះពាល់យ៉ាងខ្លាំងដល់កំណើន។
បន្ថែមពីលើនេះទៅទៀតអាយុមធ្យមរបស់ប្រជាជនចិនកំពុងកើនយ៉ាងលឿនធ្វើឱ្យមានការព្រួយបារម្ភយ៉ាងខ្លាំងអំពីកង្វះពលករនាពេលអនាគត។ ការកើនឡើងការជំពាក់បំណុលក្នុងចំណោមប្រជាជនចិនដែលភាគច្រើនជាបំណុលទិញគេហដ្ឋានក៏បានបង្កផលប៉ះពាល់ផងដែរ។
ដើម្បីជួយស្ដារសេដ្ឋកិច្ច លោក លី បានប្រកាសការចំណាយយ៉ាងធំដោយផ្អែកលើការខ្ចីបំណុល ទៅលើការអភិវឌ្ឍលើហេដ្ឋារចនាសម្ព័ន្ធ និងការផ្ដល់ជំនួយទៅឱ្យប្រជាជនក្រីក្រ ជាពិសេសនៅតំបន់ជនបទ។
ចាប់តាំងពីរកឃើញដំបូងនៅក្រុងវូហានកាលពី ២ ឆ្នាំមុន ប្រទេសចិន បានរក្សាការឆ្លងជំងឺកូវីដ ១៩ នៅកម្រិតដ៏ទាបមួយធៀបនឹងចំនួនប្រជាជនរបស់ខ្លួន ប៉ុន្តែដើម្បីសម្រេចគោលដៅនេះ ក្រុងប៉េកាំង បានប្រើប្រាស់វិធានការបង្កផលប៉ះពាល់យ៉ាងខ្លាំងដូចជាការបិទខ្ទប់ដ៏តឹងរ៉ឹងជាច្រើន ការធ្វើចត្តាឡីស័កយ៉ាងយូរសម្រាប់អ្នកធ្វើដំណើរអន្តរជាតិ ឬឆ្លងខេត្ត។ មានសញ្ញាមួយចំនួនដែលបង្ហាញថា ក្រុងប៉េកាំងនឹងបន្ធូរបន្ថយវិធានការរបស់ខ្លួន ក៏ប៉ុន្តែនឹងចាប់ផ្ដើមរហូតដល់ឆ្នាំក្រោយឯណោះ។
អ្នកវិភាគជាច្រើនបានគិតថា ក្រុងប៉េកាំង នឹងមិនបើកព្រំដែនរបស់ខ្លួនមុនសមាជបក្សកុម្មុយនីស្តនៅឆ្នាំនេះទេ ហើយនៅពេលបើកព្រំដែន ប្រទេសចិន នឹងចង់ចៀសវាងការឆ្លងមិនអាចគ្រប់គ្រងបានដែលកំពុងកើតឡើងនៅក្រុងហុងកុង។
យ៉ាងណាមិញ របាយការណ៍ការងាររបស់រដ្ឋាភិបាលចិនកម្រធ្វើការប្រកាសអំពីគោលនយោបាយការបរទេសថ្មីទេ ហើយរបាយការណ៍ឆ្នាំនេះ គឺដដែល។ ក្រុងប៉េកាំង កំពុងចង់រក្សាទំនាក់ទំនងជិតស្និទ្ធជាមួយរុស្ស៊ី ប៉ុន្តែចង់ចៀសវាងពាក់ព័ន្ធនឹងការឈ្លានពានចូលប្រទេសអ៊ុយក្រែន។
លោក លី សរសេរថា៖ «ប្រទេសចិន នឹងបន្តអនុវត្តគោលនយោបាយការបរទេសដោយឯករាជ្យ ដើម្បីសន្តិភាពបន្តនៅលើមាគ៌ានៃការអភិវឌ្ឍដោយសន្តិភាពធ្វើការសម្រាប់ទំនាក់ទំនងអន្តរជាតិប្រភេទថ្មី»។
បើទោះជាយ៉ាងនេះក៏ដោយក្រុងប៉េកាំងបានឱ្យតម្រុយថា ខ្លួនកំពុងត្រៀមខ្លួនសម្រាប់ពិភពលោកដែលកាន់តែគ្រោះថ្នាក់ជាងមុន។ ថវិកាយោធារបស់ប្រទេសចិន នឹងកើនឡើង ៧,១ ភាគរយនៅឆ្នាំនេះ ដល់ប្រហែល ២២៩ ពាន់លានដុល្លារ។ នេះបើយោងតាមរបាយការណ៍ថវិការបស់រដ្ឋាភិបាលដែលបានចេញផ្សាយកាលពីថ្ងៃសៅរ៍ផងដែរ។ លោក លី បានបញ្ជាក់ថា នឹងមិនមានការយឺតយ៉ាវក្នុងកិច្ចខិតខំប្រឹងប្រែងរបស់ប្រទេសចិន ក្នុងការធ្វើទំនើបកម្ម និងជួសជុលយោធារបស់ខ្លួន ដែលរួមមានការពង្រីកកងទ័ពជើងទឹក និងការអភិវឌ្ឍមីស៊ីលទំនើបៗជាច្រើនប្រភេទ។
ផែនការរបស់លោក លី បានបង្ហាញថា ប្រទេសចិន ឱ្យតម្លៃលើកំណើនសេដ្ឋកិច្ចច្រើនជាងការព្យាយាមធ្វើការកែតម្រូវដើម្បីផ្លាស់ប្តូរសេដ្ឋកិច្ចឆ្ពោះទៅរកការពឹងផ្អែកកាន់តែខ្លាំងលើការចំណាយរបស់អ្នកប្រើប្រាស់ក្នុងស្រុក។ ទីក្រុងប៉េកាំង កំពុងព្យាយាមដោយទទួលបានជោគជ័យមានកម្រិត ដើម្បីផ្លាស់ទីសេដ្ឋកិច្ចឱ្យឆ្ងាយពីការពឹងផ្អែកលើការអភិវឌ្ឍហេដ្ឋារចនាសម្ព័ន្ធជំរុញដោយបំណុល និងការសាងសង់លំនៅឋាន។
កាលពីឆ្នាំមុន ប្រទេសចិន បានកាត់បន្ថយបំណុលរបស់ខ្លួនបានមួយកម្រិត។ ប្រទេសចិន ត្រូវតែកាត់បន្ថយបែបនេះ ដោយសារនៅឆ្នាំដំបូងនៃវិបត្តិកូវីដ ១៩ បំណុលរបស់ពួកគេបានកើនដល់កម្រិតមួយដែលអ្នកជំនាញនិយាយថា មិនអាចទ្រទ្រង់បានទេ។
ប៉ុន្តែ ដើម្បីបំពេញគោលដៅកំណើនសម្រាប់ឆ្នាំនេះ អ្នកជំនាញនិយាយថា ប្រទេសចិន នឹងត្រូវឱ្យខ្ចីប្រាក់បន្ថែមទៀត ដែលនឹងលុបចោលការកាត់បន្ថយបំណុលកាលពីឆ្នាំមុន។ លោក លីទទួលស្គាល់ថា សេដ្ឋកិច្ចប្រទេសចិន នឹងជួបការលំបាកនៅឆ្នាំនេះ ដោយចង្អុលទៅភាពយឺតយ៉ាវក្នុងការងើបឡើងវិញនៃការចំណាយ និងការវិនិយោគ និងការកើនឡើងនៃតម្រូវការនាំ ចេញ ខណៈពេលដែលមានកង្វះវត្ថុធាតុដើម។ ក្នុងរយៈពេល ៣ ខែចុងក្រោយនៃឆ្នាំមុន សេដ្ឋកិច្ចចិន បានកើនឡើងត្រឹមតែ ៤ ភាគរយប៉ុណ្ណោះ។
ផ្នែកមួយនៃការថយល្បឿនកំណើនសេដ្ឋកិច្ចនោះ បានឆ្លុះបញ្ចាំងពីការផ្លាស់ប្តូរគោលនយោបាយរបស់រដ្ឋាភិបាលជាបន្តបន្ទាប់ក្នុងគោលបំណងបង្ក្រាបការពង្រីកដែលមិនមានចិរភាពនៅក្នុងវិស័យមួយចំនួន។ វិស័យទាំងនេះរួមមានវិស័យជួញដូរអចលនទ្រព្យ វិស័យសាលារៀនគួរ និងវិស័យបច្ចេកវិទ្យា៕