.jpg)
វិមានក្រឹមឡាំងបានអះអាងថា កងកម្លាំងប្រដាប់អាវុធរុស្ស៊ីគ្មានបំណងបែងចែកទឹកដីរបស់អ៊ុយក្រែន ខណៈពេលដែលក្រុងម៉ូស្គូ បន្តការវាយប្រហារលើប្រទេសជិតខាងរបស់ខ្លួន។
កាលពីថ្ងៃសុក្រ អ្នកនាំពាក្យវិមានក្រឹមឡាំងលោក ឌីមីទ្រី ប៉េស្កូវ បានប្រាប់សារព័ត៌មាន Sky News Arabia អំពីគោលដៅនៃការឈ្លានពាន។ លោកអះអាងថា៖ «បន្ទាប់ពីរដ្ឋប្រហារឆ្នាំ ២០១៤ អ៊ុយក្រែនបានរងឥទ្ធិពលនៃមនោគមន៍វិជ្ជាណាស៊ី។ យើងចង់ដោះលែងពួកគេពីមនោគមន៍វិជ្ជានេះ» ហើយ «វត្តមាននៃហេដ្ឋារចនាសម្ព័ន្ធណាតូក្នុងប្រទេសអ៊ុយក្រែន បានកើនឡើង ដែលគំរាមកំហែងផ្ទាល់ដល់សន្តិសុខរបស់រុស្ស៊ី»។
លោក ប៉េស្កូវ និយាយថា៖ «យើងមិនមានបំណងបែងចែកទឹកដីអ៊ុយក្រែនជាផ្នែកៗនោះទេ ប៉ុន្តែត្រូវស្វែងរកការធានានូវសុវត្ថិភាពផ្ទាល់ខ្លួនរបស់យើង»។ លោកក៏និយាយថា ក្រុងម៉ូស្គូ បានទទួលយកទំនួលខុសត្រូវការពារជនស៊ីវិលរបស់តំបន់ផ្ដាច់ខ្លួនដូណេតស្ក៍ និងលូហានស្ក៍ ដែលខ្លួនទើបតែទទួលស្គាល់ឯករាជ្យភាពមុនចាប់ផ្ដើមការឈ្លានពានចូលអ៊ុយក្រែន។ តំបន់ផ្ដាច់ខ្លួនទាំងពីរនៅតំបន់ដុនបាស គឺមានប្រជាជនភាគច្រើនជាជនជាតិរុស្ស៊ី ឬអ្នកនិយាយភាសារុស្ស៊ី។ ក្រុងម៉ូស្គូបានផ្ដល់លិខិតឆ្លងដែនរុស្ស៊ី ទៅឱ្យប្រជាជនជាង ៧០០ ០០០ នាក់នៃតំបន់ផ្ដាច់ខ្លួននេះ។
លោកបានចោទប្រកាន់អ៊ុយក្រែនថា បានរៀបចំផែនការដើម្បីវាយប្រហារតំបន់ផ្ដាច់ ដូច្នេះរុស្ស៊ីត្រូវចាត់វិធានការចាំបាច់ដើម្បីបំបែកយោធាអ៊ុយក្រែន ដើម្បីការពារតំបន់ផ្ដាច់ខ្លួន៕
