កាលពីថ្ងៃសៅរ៍ ទី ៥ មិនា ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយថា ក្រុងម៉ូស្គូនឹងចាត់កិច្ចខិតខំប្រឹងប្រែងដោយប្រទេសណាមួយ ដើម្បីបង្កើតតំបន់ហាមមិនឱ្យហោះហើរនៅលើអ៊ុយក្រែនថា ជាការ «ចូលរួមក្នុងជម្លោះប្រដាប់អាវុធ» នេះ។
ក្នុងជំនួបជាមួយបុគ្គលិកក្រុមហ៊ុនអាកាសចររុស្ស៊ីលោក ពូទីន និយាយថា៖ «ឥឡូវនេះ យើងស្ដាប់ឮអំពីតំបន់ហាមមិនឱ្យហោះហើរនៅលើទឹកដីអ៊ុយក្រែន។វាមិនអាចធ្វើចេញពីទឹកដីអ៊ុយក្រែនទេ។អ្នកអាចធ្វើវាបានតែពីទឹកដីប្រទេសជិតខាងប៉ុណ្ណោះដូច្នេះនឹងចាត់ទុកវាជាចូលរួមក្នុងជម្លោះប្រដាប់អាវុធដោយប្រទេសដែលនឹងបង្កការគំរាមកំហែងដល់ទាហានរបស់យើង»។
ប្រធានាធិបតីអ៊ុយក្រែនលោក វ៉ុលឌីមៀរ ហេ្សលេនស្គី បានជំរុញឱ្យអង្គការណាតូអនុវត្តតំបន់ហាមមិនឱ្យហោះហើរលើប្រទេសលោក ប៉ុន្តែអង្គការណាតូបានបដិសេធ ដោយនិយាយថា ការធ្វើបែបនេះបង្កឱ្យរីករាលដាលសង្គ្រាមនៅអឺរ៉ុប។
លោកពូទីនបានប្ដេជ្ញាថា «ការសម្រេចបាន» នៃការទាមទារបែបនេះនឹង «នាំមកនូវលទ្ធផលមហន្តរាយមិនត្រឹមតែដល់អឺរ៉ុបប៉ុណ្ណោះទេថែមទាំងដល់ពិភពលោកទាំងមូល» ហើយបានហៅការដាក់ទណ្ឌកម្មរបស់លោកខាងលិចប្រឆាំងនឹងរុស្ស៊ីថា «ស្រដៀងនឹងការប្រកាសសង្គ្រាម»។
បន្ថែមពីលើនេះទៅទៀត លោក ពូទីន បាននិយាយថា ប្រទេសអ៊ុយក្រែន គឺប្រឈមមុខនឹងការបាត់បង់ឋានៈជារដ្ឋ។ លោកនិយាយថា៖ «ថ្នាក់ដឹកនាំ [អ៊ុយក្រែន] បច្ចុប្បន្នត្រូវយល់ថា ប្រសិនបើពួកគេបន្តធ្វើអ្វីដែលពួកគេកំពុងធ្វើ នោះពួកគេនឹងបង្កហានិភ័យដល់អនាគតនៃឋានៈជារដ្ឋរបស់អ៊ុយក្រែន។ ប្រសិនបើរឿងនេះកើតឡើង នេះគឺជាកំហុសរបស់ពួកគេ»។
ភ្នាក់ងារសិទ្ធមនុស្សរបស់អង្គការសហប្រជាជាតិនិយាយថាចាប់តាំងពីសង្គ្រាមនេះចាប់ផ្ដើម ជនស៊ីវិលចំនួន ៣៥១ នាក់បានស្លាប់ ហើយ ៧០៧ នាក់បានរងរបួស។ បទឈប់បាញ់មានកំណត់មួយនៅទីក្រុងចំនួនពីរ បានបរាជ័យកាលសៅរ៍ ដោយមន្ត្រីអ៊ុយក្រែនបានចោទប្រកាន់រុស្ស៊ីថា បានធ្វើការបាញ់ប្លោងទៅផ្លូវជម្លៀសប្រជាជន៕