The Phnom Penh Post Search

Search form

Logo of Phnom Penh Post newspaper Phnom Penh Post - រុស្ស៊ី​ទាមទារ​ការ​ធានា​ពី​អាមេរិក​ ក្នុង​ដំណាក់​កាល​ចុង​ក្រោយ​នៃ​ការ​ចរចា​ស្ដារ​កិច្ចព្រមព្រៀង​អ៊ីរ៉ង់​

រុស្ស៊ី​ទាមទារ​ការ​ធានា​ពី​អាមេរិក​ ក្នុង​ដំណាក់​កាល​ចុង​ក្រោយ​នៃ​ការ​ចរចា​ស្ដារ​កិច្ចព្រមព្រៀង​អ៊ីរ៉ង់​

Content image - Phnom Penh Post
លោក Rafael Mariano Grossi អគ្គនាយករដ្ឋ​ទីភ្នាក់ងារ​​ថាម​ពល​អា​តូមិក​អន្តរជាតិ (IAEA) ថ្លែង​ទៅកាន់​ប្រព័​ន្ធផ្សព្វផ្សាយ​នៅពេលទៅដល់​ព្រ​លានយន្តហោះអន្តរជាតិទីក្រុង​វីយែន កាលពី​ថ្ងៃទី៥ មីនា។ AFP ​

រុស្ស៊ី​ទាមទារ​ការ​ធានា​ពី​អាមេរិក​ ក្នុង​ដំណាក់​កាល​ចុង​ក្រោយ​នៃ​ការ​ចរចា​ស្ដារ​កិច្ចព្រមព្រៀង​អ៊ីរ៉ង់​

កិច្ច​ចរចា​ដើម្បី​ស្ដារ​កិច្ចព្រមព្រៀង​នុយក្លេអ៊ែរ​រវាង​ប្រទេស​អ៊ីរ៉ង់​ និង​មហា​អំណាច​ពិភពលោក​បាន​ប្រឈម​នឹង​ភាព​ស្មុគ​ស្មាញ​កាល​ពី​ថ្ងៃ​អាទិត្យ​ ទី ​៦ មិនា បន្ទាប់​ពី​រុស្ស៊ី​ទាមទារ​ឱ្យ​សហរដ្ឋអាមេរិក​ធ្វើ​ការ​ធានា​ថា​ ការ​ដាក់​ទណ្ឌកម្ម​ជុំវិញ​សង្គ្រាម​ជា​មួយ​អ៊ុយក្រែន​ នឹង​មិន​ប៉ះពាល់​ដល់​ពាណិជ្ជកម្ម​របស់​ខ្លួន​ជាមួយ​អ៊ីរ៉ង់​។

រុស្ស៊ី​បាន​ធ្វើ​ការ​ទាមទារ​បែប​នេះ​ ខណៈ​ពេល​ដែល​ការ​ចរចា​ដោយ​ប្រយោល​ជា​ច្រើន​ខែ​រវាង​អាមេរិក និង​អ៊ីរ៉ង់​ បាន​ឈាន​ដល់​ដំណាក់​កាល​ចុង​ ហើយ​ជិត​ឈាន​ដល់​កិច្ច​ព្រមព្រៀង​។

រដ្ឋមន្ត្រី​ការបរទេស​រុស្ស៊ី​ លោក ​សឺហ្គេ ឡាវរ៉ូវ​ បាន​និយាយ​ថា​ការ​ដាក់​ទណ្ឌកម្ម​របស់​អាមេរិក ​ជុំវិញ​ការ​ឈ្លានពាន​ប្រទេស​អ៊ុយក្រែន​ថា​ ជា​ឧបសគ្គ​សម្រាប់​កិច្ចព្រមព្រៀង​នុយក្លេអ៊ែរ​អ៊ីរ៉ង់​។ លោក​និយាយ​ថា​ រុស្ស៊ី​ចង់​បាន​ការ​ធានា​ជា​លាយលក្ខណ៍អក្សរ​ពី​សហរដ្ឋ​អាមេរិក​ថា ពាណិជ្ជកម្ម ការ​វិនិយោគ និង​កិច្ច​សហប្រតិបត្តិការ​បច្ចេកទេស​យោធា​របស់​រុស្ស៊ី​ជាមួយ​អ៊ីរ៉ង់​នឹង​មិន​ត្រូវ​បាន​រារាំង​ដោយ​ទណ្ឌកម្ម​ណាមួយ​ឡើយ​។

រដ្ឋមន្ត្រី​ការបរទេស​អាមេរិក​លោក​ អានតូនី ប៊្លីន​កែន ​បាន​ព្យាយាម​រំសាយ​ការ​អះអាង​អំពី​ឧបសគ្គ​ ដោយ​និយាយ​ថា​ការ​ដាក់​ទណ្ឌកម្ម​របស់​អាមេរិក​ទៅ​លើ​រុស្ស៊ី​គឺ​មិន​មាន​អ្វី​ទាក់ទង​នឹង​កិច្ចព្រមព្រៀង​នុយក្លេអ៊ែរ​ជា​មួយ​អ៊ីរ៉ង់​ទេ​។

លោក ប្ល៊ីនកែន និយាយ​ថា​៖ «រឿង​ទាំង​នេះ​គឺ​ខុស​គ្នា​ទាំង​ស្រុង​ ហើយ​មិន​ជាប់​ទាក់ទង​គ្នា​តាម​វិធី​ណា​មួយ​។ ដូច្នេះ​ខ្ញុំ​គិត​ថា​មិន​ពាក់ព័ន្ធ​ទេ»​។ លោក​បន្ថែម​ទៀត​ថា​កិច្ចព្រមព្រៀង​ជាមួយ​អ៊ីរ៉ង់​គឺ​ជិត​ឈាន​ដល់​ហើយ​ ប៉ុន្តែ​នៅ​បញ្ហា​ធំៗ​មួយ​ចំនួន​នៅ​មិន​ទាន់​បាន​ដោះស្រាយ​។

ភាគី​អ៊ីរ៉ង់​បាន​និយាយ​ថា​ ពួកគេ​ចង់​បាន​ការ​បំភ្លឺ​ពី​ក្រុង​ម៉ូស្គូ​អំពី​ការ​លើក​ឡើង​របស់​លោក​ ឡាវរ៉ូវ​។ មន្ត្រី​ជាន់​ខ្ពស់​អ៊ីរ៉ង់​មួយ​រូប​និយាយ​ថា​៖ «វា​ចាំ​បាច់​ក្នុង​ការ​យល់​យ៉ាង​ច្បាស់​ពី​អ្វី​ដែល​ក្រុង​ម៉ូស្គូ​ចង់​បាន​។ ប្រសិន​បើ​អ្វី​ដែល​ពួកគេ​ទាមទារ​ពាក់ព័ន្ធ​នឹង​កិច្ចព្រមព្រៀង​នោះ វា​នឹង​មិន​ពិបាក​ក្នុង​ការ​ស្វែង​រក​ដំណោះ​ស្រាយ​នោះ​ទេ។ ប៉ុន្តែ​វា​នឹង​មាន​ភាព​ស្មុគស្មាញ ប្រសិន​បើ​ការ​ធានា​ដែល​ក្រុង​ម៉ូស្គូ​បាន​ទាមទារ​នោះ គឺ​ហួស​ពី​កិច្ចព្រមព្រៀង៕

អត្ថបទគួរចាប់អារម្មណ៍