ការប្រកាសរបស់អ៊ុយក្រែនថា ប្រទេសចិន បានធានាប្រាប់ក្រុងកៀវថា ខ្លួននឹងជួយបញ្ឈប់សង្គ្រាមជាមួយរុស្ស៊ី បានស្ដារក្ដីសង្ឃឹមថា ក្រុងប៉េកាំងនឹងដើរតួជាអ្នកសម្របសម្រួលឱ្យក្រុងម៉ូស្គូដកថយវិញ។ ប៉ុន្តែអ្នកវិភាគជាច្រើននិយាយថាជំហរសាធារណៈ ទំនាក់ទំនងជិតស្និទ្ធជាមួយរុស្ស៊ី និងកង្វះបទពិសោធក្នុងការដោះស្រាយវិវាទបែបនេះ បានបង្ហាញពីឧបសគ្គដែលប្រទេសចិនប្រឈមក្នុងតួនាទីនេះ។
ការជជែកអំពីតួនាទីរបស់ក្រុងប៉េកាំងជាអ្នកសម្របសម្រួលសន្តិភាព បានចាប់ផ្ដើមបន្ទាប់ពីរដ្ឋមន្ត្រីការបរទេសអ៊ុយក្រែន លោក ឌីមីត្រូ គូលេបា បាននិយាយកាលពីសៅរ៍ថា លោកបានទទួលការធានាថា «ចិនចង់បញ្ឈប់សង្គ្រាមនេះ»។
លោកនិយាយថា៖ «ការទូតចិនមានឧបករណ៍គ្រប់គ្រាន់ដើម្បីធ្វើឱ្យមានការផ្លាស់ប្ដូរ ហើយយើងចាត់ទុក្ខថា វាមានជាប់ពាក់ព័ន្ធរួចហើយ ហើយការខិតខំប្រឹងប្រែងរបស់ពួកគេនឹងទទួលបានជោគជ័យ»។
លោកគូលេបា បាននិយាយបែបនេះ បន្ទាប់ពីលោកបានជួបជាមួយរដ្ឋមន្ត្រីការបរទេសចិនលោកវ៉ាង យីកាលពីថ្ងៃទី ១ មិនា ប៉ុន្តែគេមិនដឹងថាអ្នកទាំង២ បានជួបគ្នាទៀតបន្ទាប់នោះដែរឬទេ?
ប៉ុន្តែក្រុងប៉េកាំង មិនបានបង្ហាញព័ត៌មានលម្អិតនៃកិច្ចខិតខំប្រឹងប្រែងការទូតរបស់ខ្លួន ជុំវិញសង្គ្រាមរុស្ស៊ី-អ៊ុយក្រែនធ្វើឱ្យអ្នកវិភាគមួយចំនួននិយាយថា ចិនមិនមានឆន្ទៈចង់ធ្វើជាអ្នកសម្របសម្រួលទេ។
ប្រទេសចិន ក៏ចង់បង្ហាញភាពអព្យាក្រឹត ដោយប្រកាន់ជំហរអនុប្បវាទមិនបោះឆ្នោតចំនួន ២ លើកលើសេចក្ដីសម្រេចក្រុមប្រឹក្សាសន្តិសុខ និងមហាសន្និបាតអង្គការថ្កោលទោសការឈ្លានពានរបស់ក្រុងម៉ូស្គូ និងទាមទារឱ្យដកទ័ពរុស្ស៊ីចេញពីអ៊ុយក្រែន។ ប៉ុន្តែប្រទេសចិន មានភាពលម្អៀងទៅរករុស្ស៊ីដោយកាលពីមុនកីឡាអូឡាំពិកក្រុងប៉េកាំងបានចេញសេចក្ដីថ្លែងការណ៍រួមថា ភាពជាដៃគូររបស់ពួកគេគឺ «គ្មានដែនកំណត់»៕