.jpg)
អ្នកគាំទ្ររបស់បេក្ខជនប្រធានាធិបតី លោក Lee Baek-yoon នៃបក្សពលករកាន់បដាក្នុងអំឡុងយុទ្ធនាការឃោសនា។ AFP
ដំណើរការនៃការបោះឆ្នោតប្រធានាធិបតីកូរ៉េខាងត្បូង ប្រព្រឹត្តឡើងនៅថ្ងៃទី ៩ ខែមីនានេះ ខណៈបេក្ខជនមកពីគណបក្សកាន់អំណាច និងគណបក្សប្រឆាំងធំៗ កំពុងប្រឈមនឹងរឿងអាស្រូវ និងកង្វះទំនុកចិត្តពីសាធារណជននៅឡើយ។
ក្នុងនាមអភិបាលខេត្ត និងជាអតីតចៅហ្វាយក្រុងទំហំមធ្យមមួយ បេក្ខជនគណបក្សកាន់អំណាចលោក Lee Jae-myung ត្រូវបានគេរំពឹងទុកយ៉ាងខ្លាំងថា នឹងជាប់ឆ្នោតជាប្រធានាធិបតីថ្មីរបស់កូរ៉េខាងត្បូង បើទោះបីជាលោកមិនមានបទពិសោធបម្រើការក្នុងសភាឬគណៈរដ្ឋមន្ត្រីក៏ដោយ។
លោក Lee បានទទួលបេក្ខភាពគណបក្សប្រជាធិបតេយ្យ បន្ទាប់គូប្រជែងក្នុងបក្សឈានមុខគេចំនួន ៣ នាក់ ត្រូវបានដកខ្លួនពីការប្រជែងដោយម្នាក់ត្រូវបានបញ្ជូនទៅពន្ធនាគារពីបទរំលោភផ្លូវភេទ ម្នាក់ទៀតបានស្លាប់ដោយការធ្វើអត្តឃាត បន្ទាប់ពីត្រូវបានចោទប្រកាន់ដោយបុគ្គលិករបស់គាត់ពីបទបៀតបៀនផ្លូវភេទ និងអ្នកទី៣ កំពុងជាប់ពន្ធនាគារពីបទ រំខានការបោះឆ្នោត។
ការធ្លាក់បេក្ខជនទាំងនេះ បានបើកផ្លូវឱ្យលោក Lee ដែលជាអតីតកម្មកររោងចក្រ ដែលបំពេញតាមនិន្នាការអ្នកនយោបាយអាមេរិកឆ្វេងនិយម។ លោកបានពិពណ៌នាអំពីមហិច្ឆតារបស់លោកក្នុងការក្លាយខ្លួនជាលោក Bernie Sanders ទី២។
លោក Lee និងគូប្រជែងរបស់លោក គឺលោក Yoon Suk-yeol ដែលជាអតីតរដ្ឋអាជ្ញា និងជាអ្នកទើបតែចូលប្រឡូកក្នុងនយោបាយ កំពុងមានសំឡេងស្ទើរតែស្មើគ្នាក្នុងការប្រកួតប្រជែងដែលពោរពេញទៅដោយរឿងអាស្រូវជាច្រើនការចោទប្រកាន់គ្នាទៅវិញទៅមកជម្លោះក្នុងគ្រួសារ និងអះអាងអំពីអំពើពុករលួយ ឧក្រិដ្ឋកម្ម ការប្រកាន់បក្ខពួកនិយមការក្លែងបន្លំ ទំនោរផ្ដាច់ការ ការគោរពអបិយជំនឿ និងការបំពានអំណាច។
បេក្ខជនទាំង ២ រួមជាមួយនឹងបក្ខពួករបស់ពួកគេបានប្រើពាក្យកុហកចោទប្រកាន់គ្នាទៅវិញទៅមក និងក្រុមគ្រួសាររៀងៗ ខ្លួនអំពីអំពើពុករលួយ និងការប្រព្រឹត្តខុសសីលធម៌។ ក្នុងពេលជាមួយគ្នានេះ ពួកគេបានព្យាយាមទាក់ទាញអ្នកបោះឆ្នោតជាមួយនឹងការសន្យាបែបប្រជានិយម និងទទួលសំណើគោលនយោបាយ ដើម្បីឈ្នះការគាំទ្រដោយបេក្ខជននីមួយៗអះអាងថា ជាមេដឹកនាំដែលមានសមត្ថភាពសម្រេចចិត្តចាំបាច់ដើម្បីធ្វើឱ្យកូរ៉េខាងត្បូងក្លាយជាប្រទេសដ៏ត្រឹមត្រូវ និងយុត្តិធម៌។
លោក Lee Sook-jong សាស្ត្រាចារ្យផ្នែកអភិបាលកិច្ចសាធារណៈនៅសាកលវិទ្យាល័យ Sung Kyun Kwan នៅសេអ៊ូល បាននិយាយថា៖ «កូរ៉េខាងត្បូងនៅតែមានភាពខ្លាំងជាច្រើន រួមទាំងការិយាធិបតេយ្យដែលមានសមត្ថភាព និងសង្គមស៊ីវិល័យដែលកាន់តែមានការមិនអត់ឱនចំពោះការរំលោភបំពាន និងមានឆន្ទៈក្នុងការទាមទារពីមេដឹកនាំ។ ប៉ុន្តែ យើងមានអត្រាកំណើតទាបបំផុតនៅក្នុងពិភពលោក ប្រព័ន្ធប្រាក់ចូលនិវត្តន៍របស់យើងក៏ស្ថិតក្នុងភាពប្រកៀកប្រកិតហើយបញ្ហាក្នុងសង្គម ដែលកាន់តែស្មុគស្មាញរបស់យើងក៏មិនត្រូវអាចដោះស្រាយ ស្រួលបួលដែរ»។
យ៉ាងណាមិញ បើក្រឡេកមើលទស្សនវិជ្ជានៃអភិបាលកិច្ចរបស់អ្នកទាំង ២ មានលក្ខណៈផ្ទុយគ្នាស្រឡះ។ យុទ្ធនាការរបស់លោក Lee ពឹងផ្អែកលើដំណោះស្រាយដែលដឹកនាំដោយរដ្ឋាភិបាល ដើម្បីគ្រប់គ្រងទីផ្សារអចលនទ្រព្យ លើកកម្ពស់សុខុមាលភាពសាធារណៈតាមរយៈប្រាក់ចំណូលមូលដ្ឋានជាសកល លំនៅឋាន និងលទ្ធភាពទទួលបានហិរញ្ញប្បទាន និងវិនិយោគក្នុងការផ្លាស់ប្តូរឆ្ពោះទៅរកសេដ្ឋកិច្ចឌីជីថល និងថាមពលកកើតឡើងវិញជាដើម។
ផ្ទុយទៅវិញយុទ្ធនាការរបស់លោក Yoon លើកកម្ពស់ដំណោះស្រាយ ដែលដឹកនាំដោយទីផ្សារ និងតួនាទីដ៏ស្រាល សម្រាប់រដ្ឋាភិបាលតាមរយៈការគ្រប់គ្រងទីផ្សារអចលនទ្រព្យការដកចេញនូវឧបសគ្គរបស់រដ្ឋាភិបាលលើអាជីវកម្មខ្នាតតូចនិងមធ្យម និងការគាំទ្រជាថ្មីសម្រាប់ថាមពលនុយក្លេអ៊ែរ។
ហើយបើក្រឡេកទៅមើលបទពិសោធគោលនយោបាយការបរទេសបេក្ខជនទាំង ២ មិនមានជាបទពិសោធច្រើនឡើយ។ សារៈសំខាន់នៃសម្ព័ន្ធភាពរវាងសហរដ្ឋអាមេរិក និងកូរ៉េខាងត្បូង គឺមិនសូវមានភាពខុសគ្នារវាងបេក្ខជនទាំង ២ ទេ ដោយសារការគាំទ្រកម្រិតខ្ពស់ក្នុងចំណោមសាធារណជនកូរ៉េខាងត្បូង។
វេទិកាគោលនយោបាយការបរទេសរបស់លោក Lee គឺបន្តតាមគោលនយោបាយគ្រប់គ្រងរបស់លោក Moon Jae-in ដោយគោលនយោបាយនេះសង្កត់ធ្ងន់លើស្វ័យភាព និងការអនុវត្តជាក់ស្ដែងហើយចៀសវាងការផ្អៀងទៅចិន ឬសហរដ្ឋអាមេរិកជ្រុល។ គោលនយោបាយរបស់លោក Moon ចំពោះប្រទេសជប៉ុន មានបំណងសម្របសម្រួលកិច្ចសហប្រតិបត្តិការលើបញ្ហានាពេលអនាគត ខណៈពេលដែលលោកទទូចឱ្យទីក្រុងតូក្យូដោះស្រាយសោកនាដកម្មប្រវត្តិសាស្ត្រក៏ដូចជាចំពោះកូរ៉េខាងជើង ដែលផ្ដោតលើការលុបបំបាត់នុយក្លេអ៊ែរដោយសន្តិវិធី និងសមាហរណកម្មប្រទេសទាំង ២ វិញ។
ដោយឡែកបេក្ខជនប្រឆាំងលោក Yoon បានបង្ហាញពីចក្ខុវិស័យគោលនយោបាយការបរទេសដែលកូរ៉េខាងត្បូងនឹងបង្ហាញពីភាពជាអ្នកដឹកនាំអន្តរជាតិកាន់តែខ្លាំងតាមរយៈភាពជិតស្និទ្ធជាមួយសហរដ្ឋអាមេរិក ស្ដារទំនាក់ទំនងស្ថិរភាពជាមួយជប៉ុនផ្ដោតលើការរំសាយអាវុធនុយក្លេអ៊ែរ និងការផ្លាស់ប្ដូររបបកូរ៉េខាងជើង និងធ្វើឱ្យប្រសើរឡើងនូវទំនាក់ទំនងជាមួយប្រទេសចិន៕
