កាលពីថ្ងៃចន្ទ ទី ៧ មីនា ក្រុមសមាជិកដ៏មានឥទ្ធិពលមួយក្នុងសភាអាមេរិកបានប្រកាសថា ពួកគេនឹងធ្វើសេចក្ដីព្រាងច្បាប់ដើម្បីផ្អាកទំនាក់ទំនងពាណិជ្ជកម្មធម្មតាជាមួយរុស្ស៊ី និងបេឡារុស ហើយផ្ដល់អំណាចឱ្យប្រធានាធិបតីបង្កើនពន្ធនាំចូលលើប្រទេសទាំង ២ នេះ ក្នុងការឆ្លើយតបទៅនឹងការឈ្លាន ពានរបស់រុស្ស៊ីទៅលើអ៊ុយក្រែន។
ក្នុងសេចក្ដីថ្លែងការណ៍មួយ សមាជិកសភាអាមេរិក ៤ រូប មកពីគណបក្សប្រជាធិបតេយ្យ និងគណបក្សសាធារណរដ្ឋ ដែលប្រធាន និងអនុប្រធាននៃគណៈកម្មាធិការពន្ធដារនៃសភាតំណាង និងគណៈកម្មាធិការហិរញ្ញវត្ថុនៃព្រឹទ្ធសភាបានប្រកាសថា ពួកគេនឹងជំរុញឱ្យឯកអគ្គរដ្ឋទូតពាណិជ្ជកម្មអាមេរិកព្យាយាមព្យួរសកម្មភាពរបស់រុស្ស៊ីក្នុងអង្គការពាណិជ្ជកម្មពិភពលោក ហើយផ្ដល់អំណាចឱ្យលោកប្រធានាធិបតី ចូ បៃដិន ស្ដារទំនាក់ទំនងពាណិជ្ជកម្មវិញ ដោយផ្អែកលើការអនុញ្ញាតពីសភា និងលក្ខខណ្ឌមួយចំនួន។
ពួកគេក៏បានយល់ព្រមលើការបញ្ឈប់ការនាំចូល «ផលិតផលថាមពល» ពីរុស្ស៊ី។ សេចក្ដីថ្លែងការណ៍នេះ ត្រូវបានចុះហត្ថលេខាដោយសមាជិកសភាតំណាងលោក រីឆាត នៀល និងសមាជិកព្រឹទ្ធសភាលោក រ៉ន វៃដិន មកពីគណបក្សប្រជាធិបតេយ្យ សមាជិកសភាតំណាង ខេវិន ប្រេឌី និងសមាជិកព្រឹទ្ធសភាលោក មៃ ក្រេប៉ូ មកពីគណបក្សសាធារណរដ្ឋ។
សេចក្ដីថ្លែងការណ៍នេះបានធ្វើឡើង បន្ទាប់រដ្ឋមន្ត្រីការបរទេសអាមេរិកលោក អាន់តូនី ប្ល៊ីនកែន បាននិយាយថា រដ្ឋបាលគឺកំពុងពិចារណាបញ្ឈប់ការនាំចូលប្រេងរបស់រុស្ស៊ី ហើយបានពិភាក្សារឿងនេះជាមួយប្រទេសនៅអឺរ៉ុប ប៉ុន្តែលោក បៃដិន នៅមិនទាន់ធ្វើការសម្រេចចិត្តនៅឡើយទេ៕
វីដេអូ៖