អឺរ៉ុបកំពុងរៀបចំផែនការកាត់បន្ថយការប្រើប្រាស់ឧស្ម័នធម្មជាតិរបស់រុស្ស៊ីនៅឆ្នាំនេះ ខណៈដែលខ្លួនរៀបចំសម្រាប់ផ្អាកការនាំចូលពីអ្នកផ្គត់ផ្គង់ថាមពលដ៏ធំបំផុតរបស់ខ្លួនជុំវិញសង្គ្រាមនៅអ៊ុយក្រែន។
មន្ត្រីសហភាពអឺរ៉ុបកាលពីថ្ងៃអង្គារ បានគូសបញ្ជាក់អំពីផែនការដើម្បីសម្រេចបានឯករាជភាពថាមពលពីទីក្រុងម៉ូស្គូយ៉ាងល្អមុនឆ្នាំ ២០៣០។ សហភាពអឺរ៉ុប នឹងចាប់ផ្ដើមដោយកាត់បន្ថយតម្រូវការឧស្ម័នធម្មជាតិរបស់រុស្ស៊ីចំនួន ២ ភាគ ៣ ឬជាង ៦៦ ភាគរយនៅឆ្នាំនេះ។ ផែនការទាំងនោះ នឹងត្រូវលើកយកមកពិភាក្សានៅក្នុងកិច្ចប្រជុំកំពូលបន្ទាន់មួយរបស់មេដឹកនាំសហភាពអឺរ៉ុបនៅប្រទេសបារាំងនៅថ្ងៃព្រហស្បតិ៍នេះ។
ប្រធានគណៈកម្មការអឺរ៉ុបអ្នកស្រី Ursula von der Leyen បាននិយាយនៅក្នុងសេចក្តីថ្លែងការណ៍មួយថា៖ «យើងត្រូវតែក្លាយជាឯករាជ្យពីប្រេងធ្យូងថ្ម និងឧស្ម័នរបស់រុស្ស៊ី។យើងមិនអាចពឹងផ្អែកលើអ្នកផ្គត់ផ្គង់ដែលគំរាមកំហែងយើងដូចនេះទេ»។
សហភាពអឺរ៉ុបពឹងផ្អែកលើប្រទេសរុស្ស៊ីសម្រាប់ការនាំចូល ៤០ ភាគរយនៃឧស្ម័នធម្មជាតិដែលខ្លួនប្រើ ប្រាស់។ប្រទេសរុស្ស៊ី ក៏បានផ្គត់ផ្គង់ប្រហែល ២៧ ភាគរយនៃការនាំចូលប្រេងរបស់ប្លុក ២៧នេះផងដែរ។ សរុបមកពាណិជ្ជកម្មនោះបានបង្កើតចំណូលរាប់សិបពាន់លានដុល្លារក្នុង ១ ឆ្នាំដល់រុស្ស៊ីដែលជួយផ្ដល់ហិរញ្ញប្បទានដល់កិច្ចខិតខំប្រឹងប្រែងធ្វើសង្គ្រាមរបស់លោកប្រធានាធិបតីវ្ល៉ាឌីមៀរ ពូទីន៕