.jpg)
រដ្ឋមន្ត្រីការបរទេសនៃប្រទេសរុស្ស៊ី និងអ៊ុយក្រែន បានទៅដល់ប្រទេសតួកគី សម្រាប់ការចរចាទល់មុខគ្នានៅព្រឹកថ្ងៃព្រហស្បតិ៍ នៅក្នុងទំនាក់ទំនងកម្រិតខ្ពស់លើកដំបូងរវាងភាគីទាំង ២ ចាប់តាំងពីទីក្រុងម៉ូស្គូ បានលុកលុយអ្នកជិតខាងរបស់ខ្លួន។
មន្ត្រីមកពីទីក្រុងកៀវ និងទីក្រុងម៉ូស្គូ បានធ្វើការពិភាក្សាជាច្រើនលើកក្នុងប្រទេសបេឡារុស ប៉ុន្តែកិច្ចប្រជុំនៅទីក្រុង Antalya ភាគខាងត្បូងប្រទេសតួកគី ចាត់ទុកជាលើកដំបូងដែលរុស្ស៊ី បានបញ្ជូនរដ្ឋមន្ត្រីមកពិភាក្សាអំពីវិបត្តិនេះ។
រដ្ឋមន្ត្រីការបរទេសអ៊ុយក្រែន លោក Dmytro Kuleba បានចុះចតនៅទីក្រុង Antalya សម្រាប់កិច្ចពិភាក្សា«ស្តីពីរុស្ស៊ីបញ្ឈប់អរិភាពនិងបញ្ចប់សង្គ្រាមប្រឆាំងនឹងអ៊ុយក្រែន»។ មន្ត្រីតួកគីម្នាក់បានប្រាប់សារព័ត៌មាន AFP ថា សមភាគីរុស្ស៊ីលោក Sergei Lavrov ក៏បានមកដល់សម្រាប់កិច្ចពិភាក្សាផងដែរ។
កិច្ចចរចាទល់មុខគ្នានេះធ្វើឡើងនៅពេលដែលប្រធានាធិបតីតួកគីលោក Recep Tayyip Erdogan ជំរុញឱ្យទីក្រុងអង់ការ៉ាដើរតួជាអ្នកសម្រុះសម្រួល។ លោក Erdogan បាននិយាយកាលពីថ្ងៃពុធថា៖ «យើងកំពុងធ្វើការដើម្បីបញ្ឈប់វិបត្តិនេះទៅជាសោកនាដកម្មដ៏អាក្រក់ ហើយខ្ញុំសង្ឃឹមថា ជំនួបរវាងរដ្ឋមន្ត្រីទាំង ២ នឹងបើកផ្លូវទៅរកបទឈប់បាញ់ជាអចិន្ត្រៃយ៍»៕
