.jpg)
នាវា Lioyd Solariis (ស្តាំ) របស់មហាសេដ្ឋីរុស្ស៊ី Roman Abramomvich ត្រូវបានគេឃើញចតនៅកំពង់ផែ Barcelona កាលពីថ្ងៃទី ១ មីនា។ AFP
ចាប់ពីតំបន់កំពង់ផែសមុទ្រខាងជើងរបស់ប្រទេសអាល្លឺម៉ង់ ទៅដល់តំបន់ឆ្នេរសមុទ្រមេឌីទែរ៉ាណេរបស់បារាំងរដូវកាលប្រមាញ់នាវាមហាសេដ្ឋីត្រូវបានគេប្រកាស ខណៈពេលដែលអាជ្ញាធរនៅទូទាំងទ្វីបអឺរ៉ុប កំពុងតាមដានស្វែងរកនិងរឹបអូសកប៉ាល់ប្រណីតៗដែលចងភ្ជាប់ជាមួយសេដ្ឋីរុស្ស៊ី។
នៅទីក្រុង Marina di Carrara ដែលជាទីក្រុងតូចមួយរបស់អ៊ីតាលីនៅលើឆ្នេរសមុទ្រខេត្ត Tuscan មាននាវាទំនើបបំផុតថ្មីបំផុត និងថ្លៃបំផុតរបស់ពិភពលោកឈ្មោះថា Scheherazade មានវត្តមាននៅនិងកំពុងស្ថិតនៅក្រោមការត្រួតពិនិត្យដោយប៉ូលិសអ៊ីតាលី។ នាវានេះ គ្របដណ្ដប់លើមាត់ទឹកស្ទើរតែមានទំហំធំស្មើនឹងនាវាចម្បាំងរបស់សហរដ្ឋអាមេរិកទៅហើយ។
គេហទំព័រ Super Yacht Fan បានប៉ាន់ស្មានតម្លៃរបស់នាវាទំនើបនេះថា មានតម្លៃប្រហែល ៧០០ លានដុល្លារអាមេរិកមានកន្លែងដាក់ឧទ្ធម្ភាគចក្រចំនួន ២ និងត្រូវបានបំពាក់ដោយអង់តែនផ្កាយរណប។ បើតាមរូបថតដែលចែកចាយដោយអតីតសមាជិកបុគ្គលិកម្នាក់ បានបង្ហាញឱ្យឃើញនូវអាងហែលទឹកដែលមានគម្របបើកបិទ និងអាចប្រែខ្លួនទៅជាកន្លែងរាំ ឬជប់លៀងបាន។ បន្ទាប់មក មានកន្លែងហាត់ប្រាណដែលមានបំពាក់យ៉ាងពេញលេញ និងឧបករណ៍ធ្វើពីមាសនៅក្នុងបន្ទប់ទឹក។
នៅក្នុងពិភពដ៏តូចនៃនាវាយក្សដ៏ធំបំផុត (ដែលមានចំនួនត្រឹមតែ ១៤ គ្រឿងប៉ុណ្ណោះ ក្នុងពិភពលោកដែលមានប្រវែងយ៉ាងតិច ១៤០ ម៉ែត្រ) មានតែនាវា Scheherazade តែឯងប៉ុណ្ណោះដែលមិនទាន់មានម្ចាស់ណាមួយចេញមុខមកអះអាងជាម្ចាស់ជាសាធារណៈនៅឡើយ។ អ្នកវិភាគភាគច្រើនបានគិតថា នាវានេះអាចជាកម្មសិទ្ធិរបស់មហាសេដ្ឋីនៅមជ្ឈិមបូព៌ា ឬជាមហា សេដ្ឋីរុស្ស៊ីដូចជា លោក ពូទីន ជាដើម។
កាពីតែននាវានេះឈ្មោះ Guy Bennett-Pearce ជាជនជាតិអង់គ្លេស បានបដិសេធថា លោក ពូទីន មិនមែនជាម្ចាស់នាវានេះទេ ហើយក៏មិនធ្លាប់ជិះនាវានេះទេ។ លោកបាននិយាយថា៖ «ខ្ញុំមិនដែលឃើញគាត់ទេ។ ខ្ញុំមិនដែលបានជួបគាត់ទេ»។
លោកបានបន្ថែមថា ម្ចាស់របស់នាវានេះ មិនស្ថិតក្នុងបញ្ជីទណ្ឌកម្មណាមួយទេ។លោកមិនបានច្រានចោលថា បុគ្គលនោះអាចជាជនជាតិរុស្ស៊ីទេ ប៉ុន្តែបានបដិសេធមិននិយាយបន្ថែមអំពីអត្តសញ្ញាណរបស់ម្ចាស់ដោយលើកឡើងពី «កិច្ចព្រមព្រៀងមិនបញ្ចេញព័ត៌មានទាក់ទិននឹងម្ចាស់កម្មសិទ្ធិ»។
កាពីតែន Bennett-Pearce បាននិយាយថា អ្នកស៊ើបអង្កេតអ៊ីតាលីបានមកលើនាវានេះ កាលពីថ្ងៃសុក្រ ហើយបានពិនិត្យឯកសារបញ្ជាក់ មួយចំនួនរបស់កប៉ាល់។ លោកបាននិយាយថា៖ «ពួកគេមើលល្អិតល្អន់ណាស់ហើយពួកគេកំពុងមើលគ្រប់ទិដ្ឋភាពទាំងអស់។ នេះមិនមែនជាប៉ូលិសធម្មតាចុះមកទេ ពួកគេ គឺជាបុគ្គលពាក់អាវធំ» មនុស្សម្នាក់ដែលដឹងពីបញ្ហានេះបាននិយាយក្នុងលក្ខខណ្ឌមិនបញ្ចេញឈ្មោះថា ដោយសារតែគាត់មិនត្រូវបានអនុញ្ញាតឱ្យពិភាក្សានោះបានបញ្ជាក់ថា ប៉ូលិសហិរញ្ញវត្ថុអ៊ីតាលី បានបើកការស៊ើបអង្កេតជាបណ្ដើរៗហើយ។
កាលពីយប់ថ្ងៃចន្ទ លោក Bennett-Pearce បាននិយាយថា គាត់គ្មានជម្រើសអ្វីក្រៅពីប្រគល់ឯកសារដែលបង្ហាញអត្តសញ្ញាណម្ចាស់ទៅអាជ្ញាធរអ៊ីតាលី។ លោកបាននិយាយថា លោកនឹងធ្វើដូច្នេះនៅថ្ងៃអង្គារ ហើយត្រូវបានគេប្រាប់ថា ឯកសារនេះនឹងរក្សាជា «ការសម្ងាត់»។
គាត់បានសរសេរនៅក្នុងសារមួយទៅកាន់អ្នកយកព័ត៌មាន New York Times ថា៖ «ខ្ញុំមិនមានការងឿងឆ្ងល់នៅក្នុងចិត្តរបស់ខ្ញុំអ្វីទាំងអស់ដោយសារការស៊ើបអង្កេតនេះនឹងជម្រះចោលនូវពាក្យចចាមអារ៉ាម និងការរំពឹងទុកអវិជ្ជមានទាំងអស់»។
ចម្ងល់អំពីម្ចាស់នាវានេះបានកើតឡើងដោយកម្រិតនៃភាពសម្ងាត់មិនប្រក្រតីសូម្បីតែមិនប្រក្រតីនៅក្នុងពិភពឯកជនភាពខ្លាំងនៃម្ចាស់នាវាបែបនេះ។ អ្នកម៉ៅការនិងបុគ្គលិកនាវានេះទាំងអស់សុទ្ធតែបានចុះហត្ថលេខាលើកិច្ចព្រមព្រៀងលើមិនបញ្ចេញព័ត៌មានហើយកប៉ាល់នេះទៀតសោតក៏មានគម្របសម្រាប់លាក់បាំងស្លាកឈ្មោះផងដែរ ហើយនៅពេល ដែលវាមកដល់កំពង់ផែដំបូង កម្មករបានដំឡើងរបាំងដែកខ្ពស់នៅលើផែ ដើម្បីបិទបាំងផ្នែកខ្លះនៃនាវា។ អ្នកស្រុកខ្លះបានកត់សម្គាល់ថា មិនដែលឃើញនាវាផ្សេងណាដូចនាវានេះទេ។
នៅក្នុងសុន្ទរកថាសភាពនៃប្រទេសកាលពីសប្ដាហ៍មុន ប្រធានាធិបតីអាមេរិកលោក ចូ បៃដិន បានប្រកាសថា ក្រុមការងាររបស់ក្រសួងយុត្តិធម៌ គឺកំពុងតាមដានសេដ្ឋីពាក់ព័ន្ធនឹងលោក ពូទីន ហើយនឹងរឹបអូសទ្រព្យសម្បត្តិពួកគេទាំងអស់។ ទណ្ឌកម្មត្រូវបានដាក់ប្រឆាំងនឹងសេដ្ឋីរាប់រយនាក់ ហើយបញ្ជីបន្តកើនឡើង៕
