.jpg)
បេក្ខជនគណបក្សប្រឆាំង លោក យូន ស៊ុក-យល ដែលជាប់ជាឆ្នោតប្រធានាធិបតីកូរ៉េខាងត្បូង។ រូបថត AFP
បេក្ខជនអភិរក្សនិយមមកពីគណបក្សប្រឆាំងលោក យូន ស៊ុក-យល បានឈ្នះការបោះឆ្នោតប្រធានាធិបតីកូរ៉េខាងត្បូង ដោយគម្លាតសំឡេងដ៏តូចមួយ បន្ទាប់ពីយុទ្ធនាការបោះឆ្នោតដ៏ជូរចត់ដែលពោរពេញទៅដោយការចោទប្រកាន់ទៅវិញទៅមកអំពីអំពើពុករលួយ។
លោក យូន អតីតអគ្គអយ្យការនៃប្រទេសកូរ៉េខាងត្បូង ដែលទើបតែចូលប្រឡូកក្នុងនយោបាយកាលពីឆ្នាំមុន បានយកឈ្នះលើបេក្ខជនគណបក្សកាន់អំណាចលោក លី ជេម្យុង ដោយគម្លាតសំឡេងតិចជាង ១ ភាគរយ បន្ទាប់សន្លឹកឆ្នោត ៩៨ ភាគរយត្រូវបានរាប់។ លោក លី បានប្រកាសចុះចាញ់នៅព្រឹកថ្ងៃព្រហស្បតិ៍។
លោក យូន បានប្រាប់អ្នកគាំទ្រ និងមន្ត្រីនៃគណបក្សអំណាចប្រជាជនថា៖ «ការប្រកួតបានចប់ហើយ ឥឡូវយើងត្រូវរួបរួមគ្នាដើម្បីប្រជាជន និងដើម្បីប្រទេស»។
ដូចប្រធានាធិបតីអភិរក្សនិយមមុនៗ គេរំពឹងថាលោក យូន បង្ហាញជំហរមិនសូវផ្សះផ្សាជាមួយប្រទេសចិន និងកូរ៉េខាងជើង ហើយនឹងបង្វែរក្រុងសេអ៊ូល ឱ្យខិតកាន់តែជិតជាមួយក្រុងវ៉ាស៊ីនតោន និងបង្កើនការប្រកួតប្រជែងជាមួយក្រុងប៉េកាំង។
ក្នុងតំណែងជាអយ្យការ ១ រូប លោកយូនបានដើរតួយ៉ាងសំខាន់ក្នុងការស៊ើបអង្កេតអំពើពុករលួយដែលឈានដល់ការទម្លាក់លោកស្រីប្រធានាធិបតី ផាក ហ្យុនហេ ចេញពីតំណាងនៅឆ្នាំ ២០១៧។
លោក យូន ត្រូវបានតែងតាំងជាអគ្គអយ្យការក្នុងរដ្ឋបាលរបស់លោកប្រធានាធិបតី មូន ជេអ៊ីន ប៉ុន្តែជម្លោះបានកើតឡើងស្ទើរតែភ្លាមៗ រវាងរដ្ឋាភិបាល និងលោក យូន បន្ទាប់ពីលោកបើកការស៊ើបអង្កេតលើរដ្ឋមន្ត្រីក្រសួងយុត្តិធម៌លោក ឆូ កុក និងក្រុមគ្រួសាររបស់លោកជុំវិញរឿងអាស្រូវជាច្រើន ដែលរួមមានការចោទប្រកាន់អំពីសកម្មភាពអាជីវកម្មខុសច្បាប់ និងការចោទប្រកាន់ថា កូនស្រីរបស់លោក ឆូ បានក្លែងបន្លំឯកសារដាក់ពាក្យចូលរៀនសាកលវិទ្យាល័យ។ ការស៊ើបអង្កេតទាំងនេះបានធ្វើឱ្យលោកឆូលាលែងពីតំណែង បន្ទាប់ចូលបម្រើការបានត្រឹមតែ ៣៥ ថ្ងៃប៉ុណ្ណោះ៕
វីដេអូ៖
