.jpg)
ប្រធានាធិបតីរុស្ស៊ី លោក វ្ល៉ាឌីមៀរ ពូទីន។ រូបថត AFP
រុស្ស៊ីបានអះអាងថា ខ្លួនបានរកឃើញឯកសារសម្ងាត់ដែលបង្ហាញពីផែនការរបស់អ៊ុយក្រែនដើម្បីធ្វើការវាយប្រហារលើក្រុមផ្ដាច់ខ្លួននៅតំបន់ដុនបាសនៅខែមីនា។ នេះបើតាមការលើកឡើងរបស់ក្រសួងការពារជាតិ និងក្រសួងការបរទេសរុស្ស៊ី។
ក្រសួងការពារជាតិ និងក្រសួងការបរទេសរុស្ស៊ី បានចេញផ្សាយឯកសារមួយ ដែលបង្ហាញពីការបញ្ជាសម្ងាត់មួយ ចុះហត្ថលេខាដោយមេបញ្ជាការកម្លាំងឆ្មាំជាតិអ៊ុយក្រែន លោកឧត្ដមសេនីយ៍ឯក នីកូឡៃ បាឡាន នៅថ្ងៃទី ២២ មករា ដើម្បីត្រៀមកងកម្លាំងដើម្បីធ្វើប្រតិបត្តិការប្រឆាំងនឹងក្រុមផ្ដាច់ខ្លួននៅតំបន់ដុនបាសនៅខែមីនា។
រុស្ស៊ីមិនបាននិយាយថា ពួកគេរកឃើញឯកសារនេះនៅឯណាទេ។
អ្នកនាំពាក្យក្រសួងការពារជាតិរុស្ស៊ីលោកឧត្ដមសេនីយ៍ត្រី អ៊ីហ្គ័រ កូណាសេនកូវ បាននិយាយថា៖ «ឯកសារអនុម័តលើរចនាសម្ព័ន្ធអង្គភាព និងបុគ្គលិកនៃក្រុមយុទ្ធវិធីទំហំកងវរសេនាតូចនៃកងពលតូចប្រតិបត្តិការទី៤ នៃឆ្មាំជាតិអ៊ុយក្រែន ការរៀបចំរចនាសម្ព័ន្ធការគាំទ្រដ៏ទូលំទូលាយ និងការផ្ទេរវាទៅបម្រើការជាមួយកងពលតូចវាយប្រហារតាមអាកាសទី៨០»។
លោកបន្ថែមទៀតថា៖ «ខ្ញុំសូមបញ្ជាក់ថា អង្គភាពទ័ពវាយប្រហារតាមអាកាសរបស់អ៊ុយក្រែននេះត្រូវបានបណ្ដុះបណ្ដាលតាំងពីឆ្នាំ ២០១៦ ដោយគ្រូបង្ហាត់ជនជាតិអាមេរិក និងអង់គ្លេស»។
រុស្ស៊ីបានធ្វើការអះអាងម្ដងហើយម្ដងទៀតអំពីសកម្មភាពរបស់អ៊ុយក្រែនប្រឆាំងនឹងក្រុមផ្ដាច់ខ្លួននៅតំបន់ដុនបាស ដែលរួមមានការអះអាងរបស់លោកប្រធានាធិបតី វ្ល៉ាឌីមៀរ ពូទីន ថាអ៊ុយក្រែនកំពុងប្រព្រឹត្តអំពើប្រល័យពូជសាសន៍លើជនជាតិរុស្ស៊ីនៅទីនោះ។ រុស្ស៊ីបានប្រើលេសទាំងនេះដើម្បីធ្វើការលុកលុយចូលក្នុងទឹកដីអ៊ុយក្រែន៕
វីដេអូ៖
