រុស្ស៊ីបានព្រមានថា ខ្លួននឹងបាញ់ប្រហារទៅលើការដឹកជញ្ជូនសព្វាវុធរបស់លោកខាងលិចទៅកាន់ក្រុងកៀវ ដោយការគំរាមនេះ នឹងបង្កើនហានិភ័យនៃការប៉ះទង្គិចដោយផ្ទាល់រវាងក្រុងម៉ូស្គូ និងអង្គការណាតូ ក្នុងអំឡុងពេលនៃសង្គ្រាមអ៊ុយក្រែន។
កាលពីថ្ងៃសៅរ៍ អនុរដ្ឋមន្ត្រីការបរទេសរុស្ស៊ីលោក សឺហ្គេ រីយ៉ាបកូវ បាននិយាយថា «ការសប់បំប៉ោងប្រទេសអ៊ុយក្រែន ជាមួយនឹងអាវុធពីគ្រប់ប្រទេស» គឺ «មិនមែនគ្រាន់តែជាចលនាដ៏គ្រោះថ្នាក់នោះទេ វាជាអ្វីដែលប្រែក្បួនរថយន្តទាំងនេះទៅជាគោលដៅយោធាស្របច្បាប់»។
ប្រធានាធិបតីអាមេរិក លោក ចូ បៃដិន និងមេដឹកនាំលោកខាងលិច បានច្រានចោលសំណើឱ្យបង្កើតតំបន់ហាមឃាត់មិនឱ្យហោះហើរនៅលើអ៊ុយក្រែន ហើយនិយាយថា អង្គការណាតូនឹងមិនត្រូវទាញចូលក្នុងការប្រយុទ្ធជាមួយរុស្ស៊ី ឬបញ្ជូនទាហានទៅការពារអ៊ុយក្រែនទេ។
បើទោះជាយ៉ាងនេះក៏ដោយ លោកខាងលិចបានបញ្ជូនជំនួយអាវុធជាច្រើនទៅឱ្យអ៊ុយក្រែន។ សហរដ្ឋអាមេរិកបានសន្យាផ្ដល់ជំនួយយោធាចំនួនជាង ៦,៥ ពាន់លានដុល្លារទៅឱ្យអ៊ុយក្រែន។ ចក្រភពអង់គ្លេសបានបញ្ជូនមីស៊ីលប្រឆាំងរថក្រោះប្រភេទ NLAW និង Javelin ចំនួន ៣ ៦១៥ គ្រាប់ ខណៈរដ្ឋសមុទ្របាល់ទិក ដែលជាប្រទេសអតីតសមាជិកសហភាពសូវៀត លីទុយអានី ឡាតវី និងអេស្តូនី បានបញ្ជូនអាវុធប្រឆាំងរថក្រោះជាង ១០ ០០០ គ្រាប់។
លោក រីយ៉ាបកូវ ក៏បានចោទប្រកាន់អាមេរិកថា បានបង្កឱ្យទំនាក់ទំនងកាន់តែតានតឹង៕
វីដេអូ៖