ក្តីសង្ឃឹមសម្រាប់ក្រុមហ៊ុនលោកខាងលិចមួយចំនួន ដែលបានជួលយន្តហោះឱ្យក្រុមហ៊ុនអាកាសចរណ៍ក្នុងប្រទេសរុស្ស៊ី ចាប់ផ្ដើមរលុបម្ដងបន្តិចៗ ដោយសារអាជ្ញាធរនៅទីនោះមានបំណងរក្សាទុកយន្តហោះទាំងនេះ ខណៈពេលដែលប្រធានាធិបតីរុស្ស៊ី លោក វ្ល៉ាឌីមៀរ ពូទីន បានពិភាក្សាដោយបើកចំហអំពីការធ្វើជារឹបអូសទ្រព្យសម្បត្តិរបស់អាជីវកម្មបរទេស។
គិតត្រឹមថ្ងៃព្រហស្បតិ៍ មានយន្តហោះចំនួន ៥២៣ គ្រឿង ដែលក្រុមហ៊ុនលោកខាងលិច បានជួលទៅឱ្យក្រុមហ៊ុនអាកាសចរណ៍រុស្ស៊ី។ នេះបើយោងតាម IBA ដែលជាក្រុមហ៊ុនប្រឹក្សាយោបល់វិស័យអាកាសចរណ៍។ ក្នុងចំណោមនោះ យន្តហោះ ១០១ គ្រឿង គឺជួលដោយក្រុមហ៊ុនអាកាសចរណ៍ S7 Airlines និង ៨៩ គ្រឿង ជួលទៅឱ្យក្រុមហ៊ុន Aeroflot។ ក្រុមហ៊ុនអាកាសចរណ៍ទាំង ២ បានបញ្ឈប់ការហោះហើរអន្តរជាតិដោយលុបបំបាត់រាល់ឱកាសនៃការកាន់កាប់យន្តហោះនៅលើដីបរទេសឡើងវិញ។
ជាការឆ្លើយតបទៅនឹងការលុកលុយរបស់លោក វ្ល៉ាឌីមៀ ពូទីន ទៅលើអ៊ុយក្រែន សហភាពអឺរ៉ុប ចក្រភពអង់គ្លេស សហរដ្ឋអាមេរិក និងកាណាដា បានលុបចោលការជួលយន្តហោះទាំងអស់ ដែលការសម្រេចនេះ នឹងមានប្រសិទ្ធភាពចាប់ពីថ្ងៃទី ២៨ ខែមីនា តទៅ។ ក្រុមហ៊ុនម្ចាស់យន្តហោះ បានរឹបអូសយកយន្តហោះរុស្ស៊ីជួលជាច្រើនគ្រឿង នៅក្នុងទីក្រុងក្រៅរុស្ស៊ី បើគិតជាសាច់ប្រាក់មានតម្លៃប្រមាណជាង ១២ ទៅ ១៥ ពាន់លានដុល្លារ។
លោក Vitaly Guzhva សាស្ត្រាចារ្យផ្នែកហិរញ្ញវត្ថុនៅសាកលវិទ្យាល័យ Embry-Riddle Aeronautical University បាននិយាយថា៖ «ការយល់ស្របជាទូទៅ គឺយើងប្រហែលជាយកវាមកវិញ លែងបានហើយ»។
ក្រុមហ៊ុន AerCap ដែលជាក្រុមហ៊ុនជួលយន្តហោះដ៏ធំបំផុតរបស់ពិភពលោកសម្រាប់យន្តហោះពាណិជ្ជកម្ម មានយន្តហោះជួលចំនួន ១៤២ គ្រឿង នៅក្នុងប្រទេសរុស្ស៊ី ច្រើនជាងក្រុមហ៊ុនដទៃទៀត។ នេះបើយោងតាម IBA។
ក្រុមហ៊ុន AerCap បានបដិសេធមិនធ្វើអត្ថាធិប្បាយទេ ប៉ុន្តែបាននិយាយនៅក្នុងការប្រកាសហិរញ្ញវត្ថុថ្មីៗនេះថា យន្តហោះរបស់ខ្លួននៅក្នុងប្រទេសរុស្ស៊ីមាន គឺប្រហែលស្មើនឹង ៥ ភាគរយនៃយន្តហោះសរុបរបស់ខ្លួន។ ក្រុមហ៊ុន SMBC Aviation Capital ដែលមានយន្តហោះ ៣៥ គ្រឿង ជាប់ក្នុងរុស្ស៊ីក៏មិនបានអត្ថាធិប្បាយលើអនាគតនៃយន្តហោះរបស់ពួកគេដែរ។
ខណៈពេលដែលក្រុមហ៊ុនខាងលិចនឹងត្រូវប្រឈមនឹងការខាតបង់ប្រាក់កក់លើប្រាក់ចំណូលក៏ដូចជាតម្លៃនៃយន្តហោះទាំងនេះ ស្ថានភាពនៅរុស្ស៊ីហាក់ដូចជាមិននាំឱ្យមានការក្ស័យធននៃឧស្សាហកម្មនោះទេ ហើយធ្ងន់ធ្ងរជាងនេះទៅទៀត វានាំឱ្យមានការចោទសួរអំពីមូលដ្ឋានច្បាប់សម្រាប់ឧស្សាហកម្មនេះ ពោលគឺសិទ្ធិរបស់ភតិកៈ ឬម្ចាស់កម្មសិទ្ធិក្នុងការកាន់កាប់យន្តហោះ ដែលបានបំពានលក្ខខណ្ឌនៃការជួលរបស់ពួកគេ។
សហភាពអឺរ៉ុប បានអនុញ្ញាតឱ្យមានច្រករបៀងអាកាសតូចមួយសម្រាប់ការត្រឡប់មកវិញនូវយន្តហោះដែលបានជួលពីប្រទេសរុស្ស៊ី ប៉ុន្តែចាប់តាំងពីទីភ្នាក់ងារដឹកជញ្ជូនផ្លូវអាកាសសហព័ន្ធរុស្ស៊ី «បានណែនាំ» ថា ជើងហោះហើរអន្តរជាតិទាំងអស់ចេញពីប្រទេសរុស្ស៊ី គួរតែត្រូវបានផ្អាកដោយក្រុមហ៊ុនអាកាសចរណ៍ក្រោមដែនសមត្ថកិច្ចរបស់ខ្លួន ចាប់ពីថ្ងៃទី ៦ ខែមីនា មកការអនុញ្ញាតរបស់សហភាពអឺរ៉ុបចាត់ទុកថា ជាមោឃៈ។ ទីភ្នាក់ងារនេះ ត្រូវបានគេស្គាល់ថា Rosaviatsiya ក៏ «ណែនាំ» ជើងហោះហើរមកកាន់ប្រទេសរុស្ស៊ី ត្រូវផ្អាក បន្ទាប់ពីថ្ងៃទី ៨ ខែមីនា។
ជាធម្មតានៃកិច្ចសន្យាជួលយន្តហោះសម្រាប់ម្ចាស់ អាចស្នើសុំឱ្យតុលាការក្នុងតំបន់ធ្វើការអនុវត្តកិច្ចសន្យា ហើយបន្ទាប់មកចូលរួមជាមួយអ្នកជួល ដើម្បីបញ្ជូនយន្តហោះត្រឡប់មកវិញដើម្បីសម្អាត និងសេវាកម្មជួលឡើងវិញ។ យន្តការផ្លូវច្បាប់គឺ "អនុសញ្ញា Cape Town" ដែលជាកិច្ចព្រមព្រៀងអន្តរជាតិដែលអនុញ្ញាតឱ្យអ្នកផ្ដល់ប្រាក់កម្ចីដែលមានការធានា ដូចជាអ្នកជួលអាចកាន់កាប់វត្ថុបញ្ចាំរបស់ពួកគេមកវិញពោល គឺយន្តហោះនេះឯង។
បើតាមការអធិប្បាយពីសារព័ត៌មាន The Financial Times តាមយន្តការនេះដំណើរការទំនងនឹងមិនដូចបំណងដោយមានករណីលើកលែង និងការពន្យារពេលតិចតួច។ ប្រទេសរុស្ស៊ី គឺជាប្រទេសហត្ថលេខីនៃអនុសញ្ញា Cape Town ប៉ុន្តែការចុះហត្ថលេខាប្រៀបបាននឹងការចុះហត្ថលេខាដោយទឹកថ្នាំរលុបអ៊ីចឹង៕
វីដេអូ៖