កាលពីថ្ងៃអាទិត្យ ទី ១៣ ខែមីនា ប្រទេសអ៊ីរ៉ង់ បានប្រកាសទទួលខុសត្រូវចំពោះការវាយប្រហារមីស៊ីលនៅជិតស្ថានកុងស៊ុលអាមេរិកមួយនៅភាគខាងជើងប្រទេសអ៊ីរ៉ាក់ ដោយនិយាយថា ការវាយប្រហារនេះ គឺជាការសងសឹកចំពោះការវាយប្រហាររបស់អ៊ីស្រាអែលនៅប្រទេសស៊ីរី កាលពីដើមសប្ដាហ៍មុន ដែលសម្លាប់ទាហានកងកម្លាំងឆ្មាំបដិវត្តន៍អ៊ីរ៉ង់ចំនួន ២ រូប។
ការវាយប្រហារនេះបានទាក់ទាញការថ្កោលទោសយ៉ាងធ្ងន់ធ្ងរពីរដ្ឋាភិបាលអ៊ីរ៉ាក់ ដែលបានហៅវាថា ជា «ការបំពានច្បាប់ និងបទដ្ឋានអន្តរជាតិ» ហើយទាមទារឱ្យមានការបំភ្លឺពីថ្នាក់ដឹកនាំអ៊ីរ៉ង់។ ក្រសួងការបរទេសអ៊ីរ៉ាក់ បានកោះហៅឯកអគ្គរដ្ឋទូតអ៊ីរ៉ង់ប្រចាំក្រុងបាកដាដ ដើម្បីធ្វើការតវ៉ាការវាយប្រហារនេះ ដោយនិយាយថា វាគឺជាការរំលោភដល់អធិបតេយ្យភាពរបស់អ៊ីរ៉ាក់។
សហរដ្ឋអាមេរិក ក៏ថ្កោលទោសការវាយប្រហារនេះផងដែរ ប៉ុន្តែនិយាយថា ខ្លួនហាក់ដូចជាមិនមែនជាគោលដៅនៃការវាយប្រហារទេ ហើយមិនមានការខាតបង់អគារ ឬបុគ្គលិកទេ។
ដើមឡើយអ៊ីរ៉ាក់បានរាយការណ៍ថា ស្ថានកុងស៊ុលថ្មីរបស់អាមេរិកនៅក្រុងអាប៊ីល បានរងការវាយប្រហារ ប៉ុន្តែក្រោយមានការបំភ្លឺថា ស្ថានកុងស៊ុលអាមេរិកមិនបានរងការវាយប្រហារទេ ដោយមានការរាយការណ៍ថា មីស៊ីលបានធ្លាក់លើអគារគេហដ្ឋាននៅជិតនោះ កងកម្លាំងឆ្មាំបដិវត្តន៍អ៊ីរ៉ង់បាននិយាយនៅលើគេហទំព័ររបស់ពួកគេថា គោលដៅនៃការវាយប្រហារនេះ គឺមជ្ឈមណ្ឌលចារកម្មរបស់អ៊ីស្រាអែលនៅក្រុងអាប៊ីល ប៉ុន្តែមិនបានផ្ដល់ព័ត៌មានលម្អិតបន្ថែមទៀតទេ។ មុនការវាយប្រហារនេះកើតឡើង កងឆ្មាំបដិវត្តន៍បានប្ដេជ្ញាសងសឹកការវាយប្រហារដោយអ៊ីស្រាអែលនៅប្រទេសស៊ីរី ដែលបានសម្លាប់ទាហានរបស់ខ្លួនចំនួន ២ រូប៕