សហរដ្ឋអាមេរិកបានទស្សន៍ទាយយ៉ាងត្រឹមត្រូវថា រុស្ស៊ីនឹងធ្វើការលុកលុយចូលក្នុងទឹកដីអ៊ុយក្រែន បើទោះបីជាមានការច្រានចោលពីក្រុងម៉ូស្គូ និងការមិនជឿថា វានឹងកើតឡើងដោយអឺរ៉ុបក៏ដោយ។ ប៉ុន្តែការទស្សន៍ទាយថា តើសង្គ្រាមនេះនឹងត្រូវបញ្ចប់ដោយរបៀបណា គឺហាក់ដូចជាពិបាកណាស់។
ឥឡូវនេះមានកិច្ចប្រឹងប្រែងការទូតចំនួន ៣ ផ្សេងគ្នាក្រោមការសម្របសម្រួលនៃមេដឹកនាំបារាំងអ៊ីស្រាអែល និងតួកគី ដើម្បីចាប់ផ្ដើមការចរចាបញ្ឈប់សង្គ្រាម។ ប៉ុន្តែរហូតមកដល់ពេលនេះកិច្ចខិតខំប្រឹងប្រែងបានជួបនឹងជញ្ជាំងថ្ម ខណៈពេលដែលប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចៀសវាងចូលរួមក្នុងកិច្ចចរចាធំដុំណាមួយ។ នៅអាមេរិកគេបានបង្កើតគំរូសម្រាប់ព្យាករសង្គ្រាមដោយគំរូមួយបង្ហាញអំពីសង្គ្រាមអូសបន្លាយយូរអង្វែងដែលនឹងបង្កការស្លាប់ និងការបំផ្លិចបំផ្លាញមិនចាំបាច់ក្នុងប្រទេសអ៊ុយក្រែន ខណៈពេលដែលគំរូមួយទៀតបានព្យាករថា គោលដៅរបស់រុស្ស៊ី គឺកាត់យកដែនខាងត្បូង និងខាងកើតរបស់អ៊ុយក្រែន ដើម្បីបង្កើនតំណភ្ជាប់ផ្លូវគោកពីដែនដីរុស្ស៊ីមកកាន់ឧបទ្វីបគ្រីមា។
សេណារីយោគួរឱ្យភ័យខ្លាចបំផុត គឺអង្គការណាតូត្រូវទាញចូលក្នុងសង្គ្រាមនេះដោយផ្ទាល់មិនថា ដោយអចេតនា ឬដោយចេតនា។ កាលពីថ្ងៃអាទិត្យ ការព្រួយបារម្ភអំពីសេណារីយោនេះ បានកើនឡើងយ៉ាងខ្លាំងបន្ទាប់ពីរុស្ស៊ីបានបាញ់មីស៊ីលទៅលើមូលដ្ឋានទ័ពមួយនៅភាគខាងលិចប្រទេសអ៊ុយក្រែន ជិតព្រំដែន ជាមួយប្រទេសប៉ូឡូញ ដែលជាសមាជិកនៃអង្គការណាតូ។ នៅចុងសប្ដាហ៍រុស្ស៊ី បានព្រមានថា ការដឹកជញ្ជូនអាវុធពីលោកខាងលិចចូលមកប្រទេសអ៊ុយក្រែន គឺជា «គោលដៅស្របច្បាប់» សម្រាប់ការវាយប្រហារ។
មានចំណុចមូលមតិមួយក្នុងចំណោមមន្ត្រីអាមេរិក និងអឺរ៉ុប៖ ព្រឹត្តិការណ៍ ២ សប្ដាហ៍ចុងក្រោយនេះបានបង្ហាញថា ផែនការលុកលុយរបស់រុស្ស៊ីជាប់ស្ទះដោយបញ្ហាជាច្រើនហើយរយៈពេល ២ ទៅ៣សប្ដាហ៍ខាងមុខ នឹងបង្ហាញថាអ៊ុយក្រែនអាចបន្តឈរជារដ្ឋហើយចរចាការបញ្ចប់សង្គ្រាមបានដែរ ឬទេ? រហូតមកដល់ពេលនេះ សូម្បីតែការព្រមព្រៀងដ៏សាមញ្ញដូចជាការបង្កើតច្រកមនុស្សធម៌ ក៏ប្រឈមនឹងការលំបាកផងដែរ។ ឥឡូវនេះគេកំពុងមានការព្រួយបារម្ភថា ភាពយឺតយ៉ាវក្នុងការលុកលុយអាចជំរុញឱ្យលោក ពូទីន ចាត់វិធានការធ្ងន់ធ្ងរជាងមុនហើយពង្រីកការលុកលុយបន្ថែមទៀត។
ប្រទេសម៉ុលដាវី ដែលជាប្រទេសក្រីក្របំផុតនៅអឺរ៉ុប មានប្រជាជនដ៏តិចមានតំបន់ផ្ដាច់ខ្លួននិយាយភាសារុស្ស៊ីហើយត្រូវបានគេចាត់ទុកថា ងាយរងគ្រោះបំផុត គឺកំពុងមានការព្រួយបារម្ភយ៉ាងខ្លាំងថា រុស្ស៊ីអាចបន្តការលុកលុយចេញពីអ៊ុយក្រែនចូលមកក្នុងទឹកដីរបស់ខ្លួន។ បន្ថែមពីលើនេះ មានការព្រួយបារម្ភថ្មីនៅប្រទេសហ្សកហ្ស៊ី ដែលបានធ្វើសង្គ្រាមជាមួយប្រទេសរុស្ស៊ីកាលពីឆ្នាំ ២០០៨ ជុំវិញតំបន់ផ្ដាច់ខ្លួនចំនួន ២ ដែលមកដល់ឥឡូវនេះ សង្គ្រាមនេះ គឺហាក់បីដូចជាការសាកល្បងការលុកលុយបែបនេះ មុននឹងអនុវត្តលើប្រទេសធំដូចជាអ៊ុយក្រែន។
យ៉ាងណាមិញ រដ្ឋបាលប្រធានាធិបតីអាមេរិក ចូ បៃដិន បានបញ្ជាក់យ៉ាងថា កងទ័ពអាមេរិកនឹងមិនចូលប្រយុទ្ធដោយផ្ទាល់ជាមួយទាហានរុស្ស៊ីទេ លុះត្រាតែរុស្ស៊ីធ្វើការវាយប្រហារណាមួយទៅលើសមាជិកអង្គការណាតូ។
កាលពីដើមសប្ដាហ៍ មានក្ដីសង្ឃឹមផុសចេញថា ការចរចាពិតប្រាកដនឹងចាប់ផ្តើមដែលអាចបង្កើតច្រករបៀងមនុស្សធម៌សម្រាប់ប្រជាជនអ៊ុយក្រែន ដើម្បីគេចចេញការបាញ់ផ្លោង និងការវាយប្រហារដោយមីស៊ីល ហើយប្រហែលជានាំទៅដល់ការចរចាសន្តិភាព។ អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ បាននិយាយថា ប្រសិនបើអ៊ុយក្រែនធ្វើការកែប្រែរដ្ឋធម្មនុញ្ញមកប្រកាន់ជំហរ «អព្យាក្រឹតភាព» ជាជាងចង់ចូលអង្គការណាតូ ទទួលស្គាល់ឯករាជ្យភាពតំបន់ផ្ដាច់ខ្លួន ហើយទទួលស្គាល់ថា ឧបទ្វីបគ្រីមា គឺជាដែនដីរបស់រុស្ស៊ីនោះការប្រយុទ្ធបញ្ឈប់ភ្លាមៗ។
ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បង្ហាញការបើកចំហចំពោះចរចាលើការទាមទាររបស់រុស្ស៊ី។ លោកបាននិយាយថា អ៊ុយក្រែនបានកាត់បន្ថយបំណងចង់ចូលជាសមាជិកអង្គការណាតូ ដោយលើកឡើងថា សម្ព័ន្ធភាពលោកខាងលិចហាក់ដូចជា «មិនបានត្រៀមខ្លួនទទួលយកអ៊ុយក្រែន»។ ខណៈពេលដែលលោក ហ្សេឡេនស្គី មិនបាននិយាយថា លោកនឹងបោះបង់ទឹកដីទាំងនេះឱ្យរុស្ស៊ី លោកបាននិយាយថា៖ «យើងអាចពិភាក្សា និងស្វែងរកការសម្របសម្រួលមួយអំពីរបៀបយើងរស់នៅលើទឹកដីទាំងនេះ»។
បើទោះជាយ៉ាងនេះក៏ដោយ គេនៅមិនទាន់ច្បាស់ទេថា លោក ពូទីន នឹងទទួលយកកិច្ចព្រមព្រៀងណាមួយចរចាជាមួយលោក ហ្សេឡេនស្គី។ មេដឹកនាំលោកខាងលិចដែលបានជួបតាមទូរស័ព្ទជាមួយលោក ពូទីន បានមើលឃើញថា លោក ពូទីន ហាក់ដូចជានៅប្ដេជ្ញាបន្តសង្គ្រាមនេះ ហើយការចរចា គឺគ្រាន់តែការបង្វែរអារម្មណ៍ពីសកម្មភាពយោធារុស្ស៊ីនៅទឹកដីអ៊ុយក្រែន។
ក្ដីសង្ឃឹមដ៏ល្អបំផុតនោះគឺថា លោក ពូទីន សន្និដ្ឋានថា គាត់ត្រូវតែកាត់បន្ថយគោលដៅរបស់គាត់ក្រោយពីប្រឈមមុខនឹងការដាក់ទណ្ឌកម្មសេដ្ឋកិច្ចជាពិសេសទណ្ឌកម្មលើធនាគារកណ្តាលរបស់រុស្ស៊ី។ ប៉ុន្តែប្រសិនបើលោក ហ្សេឡេនស្គី ពិតជាធ្វើកិច្ចព្រមព្រៀងជាមួយលោក ពូទីន នោះអាចនាំឱ្យមានការសម្រេចចិត្តដ៏លំបាកមួយសម្រាប់សហរដ្ឋអាមេរិកនិងលោកខាងលិច៖ ថាតើត្រូវដកទណ្ឌកម្មណាមួយដែលខ្លួនបានសម្របសម្រួលជាមួយប្រទេសនានាជុំវិញពិភពលោក៕