រុស្ស៊ីបានស្នើសុំជំនួយយោធា និងសេដ្ឋកិច្ចពីចិន បន្ទាប់ពីបើកការលុកលុយចូលអ៊ុយក្រែន នេះបើតាមការលើកឡើងរបស់មន្ត្រីអាមេរិកជាច្រើនរូប ធ្វើឱ្យមានការព្រួយបារម្ភក្នុងសេតវិមានអំពីកិច្ចខិតខំប្រឹងប្រែងរបស់ខ្លួន ដើម្បីគាំទ្រអ៊ុយក្រែន។
ព័ត៌មាននេះដំបូងត្រូវបានរាយការណ៍កាសែត Financial Times ដោយផ្អែកលើប្រភពក្នុងរដ្ឋាភិបាលអាមេរិក ហើយការរាយការណ៍ក្រោយមកត្រូវបានបញ្ជាក់ដោយសារព័ត៌មានលោកខាងលិចដទៃទៀត។ បើទោះជាយ៉ាងនេះក៏ដោយ ប្រភពទាំងនេះ មិនបានបង្ហាញព័ត៌មានលម្អិតថា រុស្ស៊ីបានស្នើសុំអ្វីខ្លះទេ។ សេតវិមានមិនបានធ្វើការអត្ថាធិប្បាយណាមួយលើការរាយការណ៍ទាំងនេះទេ។
ប្រភពមួយដែលដឹងអំពីស្ថានភាពនេះបាននិយាយថាសហរដ្ឋអាមេរិក គឺកំពុងត្រៀមជូនដំណឹងទៅឱ្យសម្ព័ន្ធរបស់ខ្លួន ខណៈពេលដែលពួកគេឃើញសញ្ញាថា ប្រទេសចិន កំពុងត្រៀមជួយរុស្ស៊ី។ ប្រភពមួយចំនួនបាននិយាយថា រុស្ស៊ីកំពុងខ្វះខាតអាវុធប្រភេទមួយចំនួន ខណៈការលុកលុយចូលប្រទេសអ៊ុយក្រែនឈានដល់សប្ដាហ៍ទី៣។
អ្នកនាំពាក្យស្ថានទូតចិនប្រចាំក្រុងវ៉ាស៊ីនតោនលោក លីវ ប៉េងយូ បាននិយាយថា លោកមិនដឹងអំពីគំនិតណាមួយដែលចិននឹងជួយរុស្ស៊ីទេ។
«ចិនមានការព្រួយបារម្ភ និងសោកស្ដាយយ៉ាងខ្លាំងចំពោះស្ថានភាពអ៊ុយក្រែន» លោក លីវ និយាយបែបនេះហើយបន្តទៀតថា៖ «យើងសង្ឃឹមយ៉ាងមុតមាំថា ស្ថានការណ៍នឹងធូរស្រាល ហើយសន្តិភាពនឹងត្រលប់មកវិញឱ្យឆាប់បំផុត»។
ការរាយការណ៍នេះបានកើតឡើង ខណៈពេលដែលទីប្រឹក្សាសន្តិសុខរបស់សេតវិមានលោក ជេក សូលីវ៉ាន់ កំពុងត្រៀមធ្វើដំណើរទៅទីក្រុងរ៉ូម ដើម្បីជួបជាមួយនឹងប្រមុខការទូតនៃបក្សកុម្មុយនីស្តចិនលោកយ៉ាង ជៀរឈី។
មុននឹងចាកចេញទៅទីក្រុងរ៉ូម លោក សូលីវ៉ាន់ បានធ្វើការព្រមានថាក្រុងប៉េកាំង ឬនរណាផ្សេងទៀតនឹងប្រឈមមុខនឹងផលប៉ះពាល់យ៉ាងខ្លាំងប្រសិនបើពួកគេជួយក្រុងម៉ូស្គូ ជៀសវាងពីការដាក់ទណ្ឌកម្ម ប៉ុន្តែលោកបដិសេធមិនបញ្ជាក់ថាអាមេរិកនឹងចាត់វិធានការដូចម្ដេចប្រសិនរឿងនេះកើតឡើង៕