ក្នុងបទសម្ភាសជាមួយទូរទស្សន៍ CNN ប្រធានាធិបតីហ្វាំងឡង់ លោក សូលី នីនិស្តូ ដែលបានទើបតែបានជួបតាមទូរស័ព្ទជាមួយប្រធានាធិបតីរុស្ស៊ី វ្ល៉ាឌីមៀរ ពូទីន បាននិយាយថា មេដឹកនាំរុស្ស៊ីរូបនេះ «មានបញ្ជី» ការទាមទាររបស់គាត់ប៉ុន្តែ «វាហាក់ដូចជាការផ្លាស់ប្ដូររដ្ឋាភិបាលអ៊ុយក្រែនមិនមាននៅក្នុងបញ្ជីទៀតទេ»។
ក្នុងចំណោមមេដឹកនាំលោកខាងលិចលោកនីនិស្តូមានទំនាក់ទំនងញឹកញាប់ជាងគេជាមួយលោក ពូទីន។
ទាក់ទងនឹងជំនួបចុងក្រោយគេ លោក នីនិស្តូ និយាយថា៖ «ពូទីន មានបញ្ជីរបស់គាត់ យើងទាំងអស់គ្នាដឹងហើយ ប៉ុន្តែវាហាក់ដូចជាការផ្លាស់ប្ដូររដ្ឋាភិបាលអ៊ុយក្រែនមិនមាននៅក្នុងបញ្ជីទៀតទេ។ នៅពេលខ្ញុំសួរលោក លោកនិយាយថា វា [ការផ្លាស់ប្ដូររដ្ឋាភិបាល] មិនដែលនៅលើបញ្ជីនោះទេ»។
លោកបន្ថែមទៀតថា៖ «គាត់ច្បាស់ណាស់ពេលខ្ញុំនិយាយថា តើអ្នកបោះបង់ការទាមទារនោះទេ គាត់ថាគាត់មិនដែលទាមទារវាទេ»។
មន្ត្រី និងអ្នកវិភាគលោកខាងលិចជាច្រើនបានឃើញថា កងកម្លាំងរុស្ស៊ីបានផ្ដោតលើការវាសម្រុកទៅកាន់រដ្ឋធានីកៀវ ធ្វើឱ្យពួកគេប៉ាន់ស្មានថា គោលដៅចម្បងរបស់លោក ពូទីន ក្នុងការលុកលុយចូលប្រទេសអ៊ុយក្រែន គឺការផ្ដួលរំលំរដ្ឋាភិបាលរបស់លោកប្រធានាធិបតី វ៉ូឡូឌីមៀរ ហ្សេឡេនស្គី ហើយតែងតាំងរដ្ឋាភិបាលថ្មីមួយ ដែលនឹងគាំទ្ររុស្ស៊ី និងប្រឆាំងការចូលជាសមាជិកនៃអង្គការណាតូ។
មុនការលុកលុយរបស់រុស្ស៊ីចាប់ផ្ដើម ចារកម្មរបស់លោកខាងលិច បានអះអាងថាលោក ពូទីន បានជ្រើសរើសបេក្ខជនរួចរាល់ហើយ សម្រាប់ថ្នាក់ដឹកនាំរដ្ឋាភិបាលថ្មីរបស់អ៊ុយក្រែន។
បន្ថែមពីលើនេះ លោក ពូទីន និងមន្ត្រីជាន់ខ្ពស់រុស្ស៊ីជាច្រើនទៀតបាននិយាយថា គោលដៅមួយនៃការលុកលុយរបស់ពួកគេ គឺការបោសសម្អាតលទ្ធិណាស៊ីនិយមក្នុងរដ្ឋាភិបាលអ៊ុយក្រែន ដែលកំពុងប្រព្រឹត្តអំពើប្រល័យពូជសាសន៍លើជនជាតិរុស្ស៊ី និងជនជាតិជ្វីហ្វ បើទោះបីលោក ហ្សេឡេនស្គី គឺជាជនជាតិជ្វីហ្វក៏ដោយ។
យ៉ាងណាមិញ លោក នីនិស្តូ បាននិយាយថា ការទាមទាររបស់លោក ពូទីន ក៏រួមមានការទទួលស្គាល់ជាផ្លូវការថាឧបទ្វីបគ្រីមា គឺជាដែនដីរបស់រុស្ស៊ី ការទទួលស្គាល់ឯករាជភាពតំបន់ផ្ដាច់ខ្លួននៅតំបន់ដុនបាស ហើយការផ្ដល់ការកាន់កាប់តំបន់ដុនបាសទាំងមូលទៅឱ្យក្រុមផ្ដាច់ខ្លួន។
កាលពីសម័យសហភាពសូវៀតមេដឹកនាំសូវៀត លោក នីគីតា គ្រូសឆេវ បានកាត់ដែនដីគ្រីមាពីរុស្ស៊ីទៅឱ្យអ៊ុយក្រែន ដើម្បីរក្សាភាពស្មោះត្រង់របស់ថ្នាក់ដឹកនាំអ៊ុយក្រែន។ បន្ទាប់ពីការដួលរលំនៃសហភាពប្រធានាធិបតីរុស្ស៊ី លោក បូរីស យេលសិន បានទទួលស្គាល់ថា ឧបទ្វីបគ្រីមា គឺជាទឹកដីរបស់អ៊ុយក្រែន។ ប៉ុន្តែបន្ទាប់បដិវត្តន៍ផ្ដួលរលំរបបគាំទ្ររុស្ស៊ី កាលពីឆ្នាំ ២០១៤ រុស្ស៊ីបានបញ្ជូនកងកម្លាំងទៅកាត់យកឧបទ្វីបគ្រីមាមករុស្ស៊ីវិញ។
នៅឆ្នាំ ២០១៤ ដដែលសង្គ្រាមផ្ដាច់ខ្លួនបានកើតឡើងនៅតំបន់ដុនបាសនៅខាងកើតប្រទេសអ៊ុយក្រែន ដែលមានប្រជាជនភាគច្រើនជាជនជាតិរុស្ស៊ី ឬជននិយាយភាសារុស្ស៊ី។ មកត្រឹមពេលថ្មីៗ សង្គ្រាមនៅដុនបាស បានជាប់គាំង ខណៈក្រុមផ្ដាច់ខ្លួនគ្រប់គ្រងទឹកដីមួយភាគធំ ហើយរដ្ឋាភិបាលអ៊ុយក្រែននៅគ្រប់គ្រងចំណុចសំខាន់ៗជាច្រើន។ ឥឡូវនេះ លោក ពូទីន ហាក់បីដូចជាចង់ឱ្យអ៊ុយក្រែនបោះបង់តំបន់ដុនបាសទាំងមូល។
លោក នីនិស្តូ បាននិយាយថា លោក ពូទីន ក៏ចង់ឱ្យអ៊ុយក្រែនប្រកាន់ជំហរអព្យាក្រឹតមិនចូលបក្សសម្ព័ន្ធ ជាពិសេសអង្គការណាតូ។ លោកបានកត់សម្គាល់ថា ការទាមទារនេះអាចងាយសម្រេចបានជាងគេ ដោយសារការលើកឡើងរបស់លោក ហ្សេឡេនស្គី ថាលោកអាចបោះបង់គោលបំណងចង់ចូលជាសមាជិកអង្គការណាតូ ដោយសារសម្ព័ន្ធភាពលោកខាងលិចហាក់ដូចជា «មិនបានត្រៀមខ្លួនទទួលយកអ៊ុយក្រែន» នៅឡើយទេ។
រីឯគោលដៅរបស់រុស្ស៊ីក្នុង «រំសាយយោធា» របស់អ៊ុយក្រែន លោក នីនិស្តូ និយាយថា លោក ពូទីន ចាត់ទុកវាថា មិនជាការទាមទារនោះទេ ដោយសារកងកម្លាំងលុកលុយរបស់រុស្ស៊ី កំពុងអនុវត្តការរំសាយយោធាអ៊ុយក្រែនទៅហើយ។ គេនៅមិនទាន់ច្បាស់ថា រុស្ស៊ីមានន័យដូចម្ដេចនៅពេលដែលពួកគេនិយាយថា «រំសាយយោធា» អ៊ុយក្រែន។
បន្ទាប់ពីមានការទាមទារទាំងអស់នេះ លោក នីនិស្តូ បានកត់សម្គាល់ថាដើម ឡើយការដាក់សម្ពាធលើអ៊ុយក្រែន គឺជានុយសម្រាប់ធ្វើការទាមទារការធានាសន្តិសុខពីលោកខាងលិច និងអង្គការណាតូ ប៉ុន្តែឥឡូវនេះលោក ពូទីន ហាក់ដូចជាធ្វើការផ្ដោតការទាមទារពាក់ព័ន្ធនឹងអ៊ុយក្រែនច្រើនជាងវិញ។
យ៉ាងណាមិញលោក នីនិស្តូ និយាយថា លោក ពូទីន យល់ដឹងយ៉ាងច្បាស់អំពីហានិភ័យដ៏ខ្ពស់នៃការវាយប្រហារលើទឹកដីរបស់សមាជិកអង្គការណាតូ ហើយបើទោះបីជាការជួបជាមួយមេដឹកនាំលោកខាងលិចដូចជាប្រធានាធិបតីបារាំង អធិការបតីអាល្លឺម៉ង់ និងជាមួយខ្លួនលោកផ្ទាល់មិនសូវបានផ្លែផ្កាក៏ដោយលោកហាក់ដូចជាចង់រក្សា និងបន្តទំនាក់ទំនងទាំងនេះ។ ប៉ុន្តែលោក ពូទីន បានព្រមានថា ប្រសិនបើណាតូជ្រៀតជ្រែកដោយផ្ទាល់ក្នុងសង្គ្រាមអ៊ុយក្រែន «រឿងដ៏អាក្រក់នឹងកើតឡើង»។
ប្រទេសហ្វាំងឡង់ និងប្រទេសជិតខាងរបស់ខ្លួន ស៊ុយអែត បានប្រកាន់ជំហរអព្យាក្រឹតមិនចូលបក្សសម្ព័ន្ធចាប់តាំងពីសម័យសង្គ្រាមត្រជាក់មក ហើយមកដល់ពេលនេះពួកគេនៅមិនទាន់ចូលជាសមាជិកអង្គការណាតូ នៅឡើយទេ។
អ្នកនាំពាក្យក្រសួងការបរទេសរុស្ស៊ី លោក ស្រីម៉ារីយ៉ា ហ្សាការ៉ូវ៉ា បានព្រមានថា៖ «ហ្វាំងឡង់ និងស៊ុយអែតមិនគួររៀបចំគោលនយោបាយសន្តិសុខរបស់ពួកគេដោយផ្អែកលើការបំផ្លាញសន្តិសុខរបស់ប្រទេសដទៃទេ ហើយការចូលជាសមាជិកអង្គការណាតូអាចបង្កឱ្យមានផលវិបាកយ៉ាងធ្ងន់ធ្ងរ ហើយនឹងប្រឈមមុខនឹងផលវិបាកផ្នែកយោធា និងនយោបាយមួយចំនួន»។
ពាក់ព័ន្ធនឹងការលុកលុយរបស់រុស្ស៊ីចូលអ៊ុយក្រែន លោក នីនិស្ដូ និយាយថា ហ្វាំងឡង់ «មិនខ្លាចទេ ប៉ុន្តែភ្ញាក់ឡើងពេញលេញហើយ»។ លោកក៏បានបានបញ្ជាក់ថា ហ្វាំងឡង់រក្សាសិទ្ធិសម្រេចចិត្តដោយខ្លួនឯងក្នុងការចូលជាសមាជិកណាតូដែរ ឬទេ៕
វីដេអូ៖