តម្លៃភាគហ៊ុនក្រុមហ៊ុនរុករករ៉ែធ្យូងថ្មនៅក្នុងប្រទេសឥណ្ឌូនេស៊ី ដែលជាអ្នកនាំចេញធ្យូងថ្មដ៏ធំបំផុតរបស់ពិភពលោកបានហក់ឡើងយ៉ាងខ្លាំងក្រោមឥទ្ធិពលនៃការកើនឡើងតម្លៃឥន្ធនៈក្រោយមានការលុកលុយរបស់រុស្ស៊ីលើអ៊ុយក្រែន។ ប៉ុន្តែការគំរាមកំហែងនៃការហាមឃាត់ការនាំចេញមួយទៀតដោយរដ្ឋាភិបាល កំពុងរារាំងអ្នកផលិតពីការបង្កើនការនាំចេញភ្លាមៗដែលទំនងនឹងរក្សាការកើនឡើងតម្លៃមួយរយៈ។
តម្លៃធ្យូងថ្ម បានឡើងដល់កម្រិតខ្ពស់កាលពីសប្ដាហ៍មុន (ដោយយកតម្លៃពីមូលបត្រធ្យូងថ្ម Newcastle ជាគោល) ពោលគឺ កើនឡើងដល់ ៤០០ ដុល្លារ ក្នុង ១ តោន ថ្លៃជាងតម្លៃដែលឡើងខ្ពស់បំផុតក្នុងខែតុលា ឆ្នាំមុនគឺ ២៦៩ ដុល្លារ ក្នុង ១ តោន។ អាស្រ័យហេតុ នេះហើយ ទើបតម្លៃភាគហ៊ុនរបស់អ្នកជីករ៉ែធ្យូងថ្មកំពូលរបស់ឥណ្ឌូនេស៊ី បានហក់ឡើងដោយបន្ថែមទៅលើការកើនឡើងពីមុនរបស់ពួកគេដែលកើនឡើងដោយសារតម្រូវការថាមពលដែលដឹកនាំដោយប្រទេសចិន ចំពេលមានការស្ទុះងើបឡើងវិញនៃសេដ្ឋកិច្ចពិភពលោក ក្រោយការបិទខ្ទប់ដោយសារជំងឺកូវីដ ១៩។
ក្រុមហ៊ុន Adaro Energy Indonesia កើនឡើងខ្ពស់ជាងគេដោយភាគហ៊ុនរបស់ខ្លួនបានកើនឡើង ២៩ ភាគរយ ចាប់តាំងពីប្រទេសរុស្ស៊ី បានចាប់ផ្ដើមការលុកលុយរបស់ខ្លួនលើអ៊ុយក្រែននៅថ្ងៃទី ២៤ ខែកុម្ភៈ។ ក្រុមហ៊ុន Indika Energy និងក្រុមហ៊ុន Bukit Asam ដែលជាមានរដ្ឋជាម្ចាស់ភាគហ៊ុន ក៏បានឃើញការកើនឡើងភាគរយ ២ ខ្ទង់ផងដែរ។
លទ្ធផលនៃការកើនឡើងតម្លៃភាគហ៊ុនកាន់តែកើនឡើងក្នុងប៉ុន្មានថ្ងៃថ្មីៗនេះ ដោយសារការរឹតបន្តឹងការនាំចេញរបស់រដ្ឋាភិបាលដែលរារាំងអ្នករុករករ៉ែឥណ្ឌូនេស៊ីពីការទាញយកចំណូលភ្លាមៗក្នុងអំឡុងពេលនៃការឡើងថ្លៃនេះ។
បច្ចុប្បន្នឥណ្ឌូនេស៊ី គឺជាប្រទេសនាំចេញធ្យូងថ្មធំជាងគេលើពិភពលោក បន្ទាប់ពីអូស្ត្រាលី និងរុស្ស៊ី។ ផលិតផលរបស់ពួកគេភាគច្រើនឆ្ពោះទៅអាស៊ីអាគ្នេយ៍ និងភាគខាងកើតនៃទ្វីប ខណៈរុស្ស៊ីភាគច្រើនបញ្ជូនទៅកាន់អាស៊ីខាងកើត និងអឺរ៉ុប។
លោក Rory Simington អ្នកវិភាគចម្បងរបស់ក្រុមហ៊ុន Wood Mackenzie បានប្រាប់ Nikkei Asia នៅក្នុងបទសម្ភាសតាមអ៊ីមែលថា៖ «យើងនឹងឃើញមានឱកាសបន្ថែមសម្រាប់ធ្យូងថ្មឥណ្ឌូនេស៊ីនៅក្នុងទីផ្សារដែលមានស្រាប់ដូចជាប្រទេសជប៉ុន និងកូរ៉េខាងត្បូង ក៏ដូចជានៅក្នុងទីផ្សារអឺរ៉ុបផងដែរ»។
រហូតមកដល់ពេលនេះ ទណ្ឌកម្មអន្តរជាតិដែលដាក់លើទីក្រុងម៉ូស្គូ ភាគច្រើនមិនរាប់បញ្ចូលលើវិស័យថាមពលទេ ប៉ុន្តែសហរដ្ឋអាមេរិក និងចក្រភពអង់គ្លេសកាលពីសប្ដាហ៍មុន បានចាប់ផ្ដើមហាមឃាត់ការនាំចូលឥន្ធនៈពីប្រទេសរុស្ស៊ី ខណៈពេលដែលការរឹតបន្តឹងផ្នែកហិរញ្ញវត្ថុ និងហានិភ័យនៃការផ្គត់ផ្គង់បានជំរុញឱ្យអ្នកទិញមួយចំនួនងាកទៅរកការផ្គត់ផ្គង់ពីប្រទេសផ្សេងរួចទៅហើយ។
ដោយឡែកក្រុមហ៊ុនធ្យូងថ្មឥណ្ឌូនេស៊ីបានទទួលការសាកសួរពីអ្នកទិញថ្មីមកពីទ្វីបអឺរ៉ុប។ នេះបើយោងតាមលោក Hendra Sinadia នាយកប្រតិបត្តិនៃសមាគមរុករករ៉ែធ្យូងថ្មឥណ្ឌូនេស៊ី។
លោកបានប្រាប់អ្នកយកព័ត៌មាននៅទីក្រុងហ្សាការតា កាលពីថ្ងៃទី ៩ ខែមីនាថា៖ «ពួកគេកំពុងស្វែងរកលទ្ធភាព ដើម្បីជំនួសធ្យូងថ្មដែលនាំចូលពីប្រទេសរុស្ស៊ី»។
លោកបានបន្ថែមថា ទោះបីជាយ៉ាងណាក៏ដោយ បច្ចុប្បន្ននេះអ្នករុករករ៉ែកំពុងផ្តោតលើការបំពេញនូវកាតព្វកិច្ចទីផ្សារក្នុងស្រុករបស់ពួកគេដែលអ្នកនាំចេញត្រូវតែបែងចែក ២៥ ភាគរយនៃទិន្នផលធ្យូងថ្មរបស់ពួកគេសម្រាប់ការលក់ក្នុងស្រុក។
រដ្ឋាភិបាលឥណ្ឌូនេស៊ី កំពុងកំណត់គោលដៅទិន្នផលធ្យូងថ្មចំនួន ៦៦៣ លានតោននៅឆ្នាំនេះ កើនឡើង ៨ ភាគរយ ពីឆ្នាំ ២០២១។ ក្នុងចំណោមចំនួននោះ ២៥ ភាគរយ ឬប្រហែល ១៦៦ លានតោន ត្រូវបានបែងចែកសម្រាប់ការផ្គត់ផ្គង់ក្នុងស្រុកនៅសល់សម្រាប់ការនាំចេញ។
រដ្ឋមន្ត្រីហិរញ្ញវត្ថុឥណ្ឌូនេស៊ី Sri Mulyani Indrawati បាននិយាយថា ប្រាក់ចំណូលរដ្ឋបានមកពីវិស័យរ៉ែ និងធ្យូងថ្ម រួមទាំងពន្ធនាំចេញ និងសួយសារអាករបានឈានដល់ ៨,៧ ពាន់លានដុល្លារ កាលពីឆ្នាំមុនដែលជាចំនួនខ្ពស់បំផុតក្នុងរយៈពេល ៥ ឆ្នាំចុងក្រោយនេះ។ នោះតំណាងឱ្យប្រហែល ៦ ភាគរយនៃប្រាក់ចំណូលរដ្ឋសរុបក្នុងឆ្នាំ ២០២១ ដែលបានកើនឡើងជាង ២០ ភាគរយ ពីឆ្នាំ ២០២០។
លោក Maisam Hasnain អនុប្រធាន និងជាអ្នកវិភាគជាន់ខ្ពស់នៅក្រុមហ៊ុន Moody''s Investors Service បាននិយាយថា៖ «ការកើនឡើងនៃតម្លៃធ្យូងថ្មនាពេលថ្មីៗនេះ នឹងជំរុញប្រាក់ចំណូលពីការនាំចេញរបស់អ្នកជីករ៉ែធ្យូងថ្មឥណ្ឌូនេស៊ី។ ប៉ុន្តែបរិមាណនាំចេញរបស់អ្នករុករករ៉ែ និងកំណើនប្រាក់ចំណូលអាចនឹងត្រូវបានរារាំងដោយគោលនយោបាយក្នុងស្រុក និងតម្លៃលើការលក់ដល់ឧបករណ៍ប្រើប្រាស់អគ្គិសនីក្នុងស្រុក។
បន្ថែមពីនេះ អាកាសធាតុមិនល្អ គឺជាបញ្ហាប្រឈមមួយទៀត។ បាតុភូតអាកាសធាតុ La Nina ដែលបង្កឡើងដោយភាពត្រជាក់នៃមហាសមុទ្រប៉ាស៊ីហ្វិក កំពុងរារាំងទិន្នផលនៅក្នុងប្រទេសឥណ្ឌូនេស៊ី និងអ្នកផលិតធ្យូងថ្មផ្សេងទៀត ដូចជាអូស្ត្រាលីជាដើម។
ការកើនឡើងនៃតម្រូវការថាមពលសកល បានទាញតម្លៃឥន្ធនៈប្រកួត ប្រជែងដូចជាប្រេង និងឧស្ម័ន ខណៈពេលដែលថាមពលកកើតឡើងវិញមិនទាន់មានការរីកចម្រើនលឿនគ្រប់គ្រាន់ដើម្បីកាត់បន្ថយការខ្វះខាត។ កត្តាទាំងនេះអាចរួមចំណែកក្នុងការរក្សាតម្លៃធ្យូងថ្មឱ្យឡើងថ្លៃ ហើយបម្រើជាប្រយោជន៍ដល់ផលិតករក្នុងស្រុកផងដែរ៕