.jpg)
អ្នកពន្លត់អគ្គិភ័យ កំពុងពន្លត់ភ្លើងដែលឆេះប្លុកអគារដោយសារបាញ់ផ្លោងនៅក្នុងសង្កាត់ Sviatoshynsky ក្នុងទីក្រុងកៀវភាគខាងលិចកាលពីថ្ងៃទី ១៥ មីនា។ AFP
សហរដ្ឋអាមេរិកបានប្រាប់សម្ព័ន្ធមិត្តរបស់ខ្លួនថា ចិនបានបង្ហាញសញ្ញាថា ពួកគេមានឆន្ទៈចំពោះការផ្ដល់ជំនួយយោធា បន្ទាប់ពីទទួលសំណើសុំឧបករណ៍ ដែលរួមមានប្រព័ន្ធការពារដែនអាកាស ពីរុស្ស៊ីដើម្បីគាំទ្រការលុកលុយចូលក្នុងប្រទេសអ៊ុយក្រែន។ នេះបើតាមការរាយការណ៍របស់កាសែត Financial Times ផ្អែកលើប្រភពដឹងអំពីការបញ្ជូនសារការទូតរវាងអាមេរិក និងសម្ព័ន្ធមិត្តពួកគេ។
បើតាមប្រភពទាំងនេះ ខ្លឹមសារនៃសារការទូតរបស់ក្រុងវ៉ាស៊ីនតោន បានអះអាងថា រុស្ស៊ីបានស្នើសុំជំនួយឧបករណ៍ ៥ ប្រភេទពីចិន ដែលរួមមានមីស៊ីលការពារដែនអាកាស ឧបករណ៍ទាក់ទងចារកម្មដ្រូន រថពាសដែក និងរថយន្តដឹកជញ្ជូន។ ប៉ុន្តែមន្ត្រីជាន់ខ្ពស់អាមេរិក ១ រូបបាននិយាយថា បញ្ជីមានភាពមិនត្រឹមត្រូវ ប៉ុន្តែមិនធ្វើការបំភ្លឺបន្ថែមទៀតទេ។
យ៉ាងណាមិញ សារការទូតដែលក្រសួងការបរទេសអាមេរិកបញ្ជូនទៅសម្ព័ន្ធមិត្តនៅអឺរ៉ុប និងអាស៊ី មិនបានបញ្ជាក់ទំហំ និងពេលវេលា នៃជំនួយដែលចិន នឹងផ្ដល់ឱ្យរុស្ស៊ី។ អាមេរិកក៏មិនបានបញ្ជាក់ប្រាប់ក្នុងសារនេះថាពួកគេបានប្រភពព័ត៌មានមកពីណាទេ។
កាលពីថ្ងៃអាទិត្យ ស្ថានទូតចិនប្រចាំក្រុងវ៉ាស៊ីនតោន បាននិយាយថា ពួកគេមិនដឹងអំពីសំណើណាមួយពីរុស្ស៊ី ឬថា ប្រទេសចិន បានយល់ព្រមផ្ដល់ជំនួយទាំងនេះ។ កាលពីថ្ងៃចន្ទរុស្ស៊ីក៏បានច្រានចោលថា ខ្លួនមិនធ្វើសំណើទៅកាន់ប្រទេសចិនទេ។
មន្ត្រីក្រសួងការពារជាតិអាមេរិកបានបដិសេធមិនអត្ថាធិប្បាយថា តើចិនបានយល់ព្រមផ្ដល់ជំនួយដល់រុស្ស៊ីដែរ ឬទេ ប៉ុន្តែបានព្រមានថា ប្រទេសចិន នឹងប្រឈមផលប៉ះពាល់យ៉ាងធ្ងន់ធ្ងរ ប្រសិនបើពួកគេផ្ដល់ជំនួយទៅឱ្យរុស្ស៊ី។
ប្រទេសចិន បានព្យាយាមបង្ហាញខ្លួនជាភាគីអព្យាក្រឹត បើទោះបីជាទំនាក់ទំនងជាមួយរុស្ស៊ីកំពុងតែរីកចម្រើនក៏ដោយ។ មន្ត្រី និងសារព័ត៌មានចិនមួយចំនួនបានបង្ហាញភាពលម្អៀងចំពោះរុស្ស៊ី ហើយក៏ជួយផ្សព្វផ្សាយការអះអាងរបស់រុស្ស៊ីថា អាមេរិក និងអ៊ុយក្រែន កំពុងអនុវត្តកម្មវិធីអាវុធជីវសាស្ត្រ៕
