សហរដ្ឋអាមេរិកហាក់ដូចជាចង់ប្រាប់ពិភពលោកថា ខ្លួនមិនមែនជាគោលដៅនៃការវាយប្រហារដោយមីស៊ីលរបស់អ៊ីរ៉ង់នៅក្នុងប្រទេសអ៊ីរ៉ាក់ កាលពីថ្ងៃអាទិត្យនោះទេ។
អ៊ីរ៉ង់បានអះអាងថាខ្លួនបានធ្វើការវាយប្រហារលើ «មជ្ឈមណ្ឌលចារកម្ម» របស់អ៊ីស្រាអែលនៅទីក្រុងអឺប៊ីល នៅភាគខាងជើងនៃប្រទេសអ៊ីរ៉ាក់។ ប៉ុន្តែសារព័ត៌មានក្នុងតំបន់ បានរាយការណ៍ថាមីស៊ីលអ៊ីរ៉ង់បានធ្លាក់ជិតស្ថានកុងស៊ុលថ្មីរបស់អាមេរិក ដែលកំពុងស្ថិតក្រោមការសាងសង់។ បន្ថែមពីលើនេះអ៊ីស្រាអែលបានបដិសេធមិនធ្វើការអត្ថាធិប្បាយលើការអះអាងរបស់អ៊ីរ៉ង់។
នេះគឺជាការវាយប្រហារជិតវត្តមានអាមេរិកនៅអ៊ីរ៉ាក់លើកដំបូង ចាប់តាំងពីក្រុងតេអេរ៉ង់ធ្វើការវាយប្រហារលើមូលដ្ឋានទ័ពអាកាស អេន អាល់ អាសាដ កាលពីខែមករា ឆ្នាំ ២០២០ ដែលជាការសងសឹកចំពោះការសម្លាប់ឧត្ដមសេនីយ៍របស់ខ្លួន ១ រូប ដោយអាមេរិក។
«សហរដ្ឋអាមេរិកមិនមែនជាគោលដៅដែលបានគ្រោងទុកនោះទេ» អ្នកនាំពាក្យក្រសួងការបរទេសអាមេរិកលោក នេដ ប្រៃស និយាយបែបនេះ ហើយបន្តទៀតថា៖ «ពាក្យចចាមអារ៉ាមរបស់សារព័ត៌មានជាសាមញ្ញគឺខុស»។
ការវាយប្រហារនេះ បានកើតឡើងចំពេលដែលមហាអំណាចពិភពលោកកំពុងចរចាដើម្បីស្ដារកិច្ចព្រមព្រៀងនុយក្លេអ៊ែរអ៊ីរ៉ង់។ ប្រសិនបើការចរចាបានសម្រេច មានន័យថាអ៊ីរ៉ង់នឹងអាចនាំចេញប្រេងរាប់លានបារ៉ែលក្នុង១ថ្ងៃ ខណៈពេលដែលលោកខាងលិចកំពុងស្វែងរកអ្វីមកជំនួសការនាំចូលប្រេងពីរុស្ស៊ី។
ការទទួលស្គាល់ថា អាមេរិកគឺជាគោលដៅរបស់ការវាយប្រហាររបស់អ៊ីរ៉ង់ នឹងតម្រូវឱ្យអាមេរិកធ្វើការវាយប្រហារសងសឹកអ៊ីរ៉ង់វិញ ចំពេលដែលក្រុងវ៉ាស៊ីនតោនចង់ប្រើមធ្យោបាយការទូតដើម្បីដោះស្រាយភាពតានតឹងជាមួយក្រុងតេអេរ៉ង់៕