.jpg)
រដ្ឋមន្ត្រីការបរទេសរុស្ស៊ីលោក សឺហ្គេ ឡាវរ៉ូវ បាននិយាយថា ក្រុងម៉ូស្គូបានទទួលការធានាជាលាយលក្ខណ៍អក្សរពីក្រុងវ៉ាស៊ីនតោនថា ការដាក់ទណ្ឌកម្មដោយលោកខាងលិចលើរុស្ស៊ីជុំវិញការលុកលុយចូលអ៊ុយក្រែន នឹងមិនប៉ះពាល់ដល់ទំនាក់ទំនងពាណិជ្ជកម្ម និងកិច្ចសហប្រតិបត្តិការរបស់ខ្លួនជាមួយអ៊ីរ៉ង់ ក្នុងក្របខ័ណ្ឌនៃកិច្ចព្រមព្រៀងនុយក្លេអ៊ែរឆ្នាំ ២០១៥ នោះទេ។
ការលើកឡើងរបស់លោកឡាវរ៉ូវកាលពីថ្ងៃអង្គារ ដែលធ្វើឡើងខណៈទទួលដំណើរទស្សនកិច្ចរដ្ឋមន្ត្រីការបរទេសអ៊ីរ៉ង់លោកហូសេន អាមីរ៉ាប់ដូឡាហានមកកាន់ក្រុងម៉ូស្គូ អាចជាសញ្ញាបង្ហាញថាអាមេរិកបានបំពេញតាមការទាមទាររបស់រុស្ស៊ីឱ្យមានការធានាថាទណ្ឌកម្មលោកខាងលិចនឹងមិនរារាំងដល់អនាគតនៃពាណិជ្ជកម្មរវាងរុស្ស៊ី និងអ៊ីរ៉ង់ទេ។
កាលពីសប្ដាហ៍មុន ក្រុងម៉ូស្គូបានធ្វើការទាមទារទាំងនេះ ចំពេលមានសេចក្តីរាយការណ៍ថាការស្ដារកិច្ចព្រមព្រៀងនុយក្លេអ៊ែរអ៊ីរ៉ង់ជិតបានសម្រេចហើយ បន្ទាប់ពីការចរចាជាង ១១ ខែ។ ភាគីសហរដ្ឋអាមេរិកបាននិយាយថា ការទាមទារនាទីចុងក្រោយរបស់អ៊ីរ៉ង់គឺ «មិនពាក់ព័ន្ធ» នោះទេ ហើយភាគីបារាំង អាល្លឺម៉ង់ និងអង់គ្លេសនិយាយថា ការទាមទារបែបនេះអាចធ្វើឱ្យការចរចាបរាជ័យ។
ក្នុងសន្និសីទសារព័ត៌មានរួមមួយលោក ឡាវរ៉ូវ និងលោក អាមីរ៉ាប់ដូឡាហាន បានច្រានចោលការលើកឡើងថា ការទាមទាររបស់រុស្ស៊ី មិនមែនជាឧបសគ្គសម្រាប់ការចរចាដើម្បីស្ដារកិច្ចព្រមព្រៀងនុយក្លេអ៊ែរទេ។
បើទោះជាយ៉ាងនេះក៏ដោយលោកអាមីរ៉ាប់ដូឡាហាន បានសង្កត់ធ្ងន់ថា អ៊ីរ៉ង់គឺជាភាគី «រឹងមាំ និងឯករាជ្យ» នៅក្នុងការចរចា ហើយនឹងមិនអនុញ្ញាតឱ្យសម្ពាធរារាំងកិច្ចសហប្រតិបត្តិការរបស់ខ្លួនជាមួយប្រទេសណាមួយឡើយ៕
