កាលពីថ្ងៃអង្គារ ទី ១៥ មីនា នាយករដ្ឋមន្ត្រីនៃប្រទេសប៉ូឡូញ ស្លូវេនី និងសាធារណរដ្ឋឆេក បានធ្វើដំណើរទស្សនកិច្ចទៅកាន់រដ្ឋធានីកៀវនៃប្រទេសអ៊ុយក្រែន ហើយបានជួបជាមួយលោកប្រធានាធិបតី វ៉ុលូឌីមៀរ ហ្សេលេនស្គី ក្នុងការបង្ហាញការគាំទ្រចំពោះអ៊ុយក្រែន បើទោះបីជាការបាញ់ផ្លោងរបស់រុស្ស៊ីកាន់តែខិតជិតចំណុចកណ្ដាលនៃក្រុងក៏ដោយ។
បើទោះបីជាមានការព្រួយបារម្ភនៅក្នុងសហភាពអឺរ៉ុបអំពីហានិភ័យសុវត្ថិភាពនៃការធ្វើដំណើរនៅក្នុងតំបន់សង្គ្រាមក៏ដោយ នាយករដ្ឋមន្ត្រីប៉ូឡូញលោក ម៉ាថាអូស ម៉ូរ៉ាវីកគី ឧបនាយករដ្ឋមន្ត្រីប៉ូឡូញលោក ចារ៉ូស្ល កាហ្សីនស្គី នាយករដ្ឋមន្ត្រីសាធារណរដ្ឋឆេក លោក ពេត្រុស ហ្វីអាឡា និងនាយករដ្ឋមន្ត្រីស្លូវេនីលោក ចាណេស ចានសា បានធ្វើដំណើរតាមរថភ្លើងទៅកាន់ក្រុងកៀវ ដើម្បីបង្ហាញថា ភាគច្រើននៃប្រទេសអ៊ុយក្រែន គឺនៅស្ថិតក្រោមការគ្រប់គ្រងរបស់រដ្ឋាភិបាលក្រុងកៀវ។
មេដឹកនាំអឺរ៉ុបកណ្ដាលទាំង៣រូបបាននិយាយថា ពួកគេគឺកំពុងបំពេញបេសកកម្មមួយរបស់សហភាពអឺរ៉ុប ប៉ុន្តែមន្ត្រីសហភាពអឺរ៉ុបនិយាយថាមេដឹកនាំទាំង ៣ បានធ្វើដំណើរទស្សនកិច្ចនេះដោយការសម្រេចចិត្តឯករាជ្យរបស់ពួកគេ។ ប្រទេសទាំង ៣ គឺជាអតីតប្រទេសក្នុងប្លុកកុម្មុយនីស្ត ប៉ុន្តែឥឡូវបានប្រែខ្លួនជាសមាជិកនៃសហភាពអឺរ៉ុប និងអង្គការណាតូ។
យ៉ាងណាមិញ ប៉ុន្មានម៉ោងមុនមេដឹកនាំទាំងនេះធ្វើដំណើរដល់ក្រុងកៀវ កងកម្លាំងលុកលុយរុស្ស៊ីបានបន្តការបាញ់ផ្លោងយ៉ាងខ្លាំងចូលរដ្ឋធានីរបស់អ៊ុយក្រែន។ អគារគេហដ្ឋានកម្ពស់ ១៥ ជាន់មួយបានរងគ្រាប់ផ្លោង ដែលបង្កឱ្យមានអគ្គភ័យ។ មនុស្សម្នាក់បានស្លាប់ ហើយជាច្រើនទៀត បន្តជាប់នៅក្នុងអគារនោះ៕