.jpg)
តុលាការយុត្តិធម៌អន្តរជាតិ (ICJ) នៅក្រុងឡាអេ ប្រទេសហូឡង់ បានបញ្ជាឱ្យរុស្ស៊ីបញ្ឈប់ការលុកលុយចូលប្រទេសអ៊ុយក្រែន ដោយនិយាយថា តុលាការមិនឃើញភ័ស្តុតាងណាមួយដែលគាំទ្រហេតុផលរបស់រុស្ស៊ីសម្រាប់ចាប់ផ្ដើមសង្គ្រាមនោះទេ ដែលរួមមានការអះអាងថា អ៊ុយក្រែនកំពុងប្រព្រឹត្តអំពើប្រល័យពូជសាសន៍លើជនជាតិរុស្ស៊ីនៅខាងកើតប្រទេស។
តុលាការ ICJ បានសម្រេចដោយសំឡេង ១៣ ទល់នឹង ២ ក្នុងការអនុម័តការបញ្ជាថា «សហព័ន្ធរុស្ស៊ីត្រូវផ្អាកជាបន្ទាន់នូវប្រតិបត្តិការយោធាដែលខ្លួនបានចាប់ផ្ដើមនៅថ្ងៃទី ២៤ កុម្ភៈ ២០២២ នៅលើទឹកដីអ៊ុយក្រែន»។ មានតែចៅក្រមរុស្ស៊ី និងចិនទេដែលបានបោះឆ្នោតប្រឆាំងនឹងសាលក្រមនេះ។
ប្រធានតុលាការ ICJ លោកស្រី ចូន ដូណាហ្យូ ចៅក្រមអាមេរិក បាននិយាយថា តុលាការ «មិនមានភ័ស្តុតាងក្នុងដៃដែលបញ្ជាក់» ការអះអាងរបស់រុស្ស៊ីថា មានអំពើប្រល័យពូជសាសន៍នៅក្នុងទឹកដីអ៊ុយក្រែន។ បន្ថែមពីលើនេះលោកស្រីនិយាយថា លោកស្រីមិនជឿថាអនុសញ្ញាស្ដីអំពីអំពើប្រល័យពូជសាសន៍ផ្ដល់អាជ្ញាធរណាមួយសម្រាប់ «ការប្រើប្រាស់កម្លាំងយោធានៅក្នុងទឹកដីរបស់រដ្ឋមួយផ្សេងទៀត»។
លោកស្រីបន្ថែមទៀតថា៖ «តុលាការចាត់ទុកថា អ៊ុយក្រែនអាចមានសិទ្ធិ មិនស្ថិតក្រោមប្រតិបត្តិការយោធារបស់សហព័ន្ធរុស្ស៊ី»។
សាលក្រមតុលាការ ICJ មានទម្ងន់ផ្លូវច្បាប់ក្រោមធម្មនុញ្ញរបស់អង្គការសហប្រជាជាតិ ដែល «បង្កើតកាតព្វកិច្ចផ្លូវច្បាប់អន្តរជាតិ សម្រាប់ភាគីណាមួយដែលពាក់ព័ន្ធនឹងការបញ្ជាទាំងនេះ» ប៉ុន្តែតុលាការ ICJ មិនមានមធ្យោបាយដើម្បីអនុវត្តសាលក្រមរបស់ខ្លួនទេ ហើយរំពឹងទាំងស្រុងទៅលើការអនុលោមដោយស្ម័គ្រចិត្តរបស់ភាគីពាក់ព័ន្ធ។ រុស្ស៊ីទំនងនឹងមិនអនុលោមតាមសាលក្រមនេះទេ ប៉ុន្តែវាបានផ្ដល់ការបដិសេធចំពោះហេតុផលមួយរបស់រុស្ស៊ីក្នុងការចាប់ផ្ដើមសង្គ្រាម៕
