កាលពីថ្ងៃអង្គារ កន្លងទៅ សហភាពអឺរ៉ុបបានអនុម័តជាផ្លូវការនូវការដាក់ទណ្ឌកម្មថ្មីប្រឆាំងនឹងរុស្ស៊ីជុំវិញការលុកលុយចូលអ៊ុយក្រែនដែលរួមមានការហាមឃាត់ការវិនិយោគក្នុងវិស័យថាមពលរុស្ស៊ីការនាំចេញទំនិញប្រណីតនិងការនាំចូលផលិតផលដែកពីប្រទេសរុស្ស៊ី។
ទណ្ឌកម្មដែលចូលជាធរមានបន្ទាប់ពីការបោះពុម្ពផ្សាយក្នុងទិនានុប្បវត្តិផ្លូវការរបស់សហភាពអឺរ៉ុបកាលពីថ្ងៃអង្គារ នេះក៏បានបង្កកទ្រព្យសម្បត្តិរបស់មេដឹកនាំអាជីវកម្មជាច្រើនទៀតដែលគាំទ្ររដ្ឋរុស្ស៊ីរួមទាំងម្ចាស់ក្លឹបបាល់ទាត់អង់គ្លេស Chelsea លោក Roman Abramovich ផងដែរ។
គណៈកម្មការអឺរ៉ុបបាននិយាយនៅក្នុងសេចក្ដីថ្លែងការណ៍មួយកាលពីថ្ងៃអង្គារថាទណ្ឌកម្ម រួមមានការហាមឃាត់យ៉ាងទូលំទូលាយលើការវិនិយោគថ្មីនៅទូទាំងវិស័យថាមពលរុស្ស៊ីជាមួយនឹងករណីលើកលែងមានកម្រិតសម្រាប់ថាមពលនុយក្លេអ៊ែរស៊ីវិលនិងការដឹកជញ្ជូនផលិតផលថាមពលមួយចំនួនត្រឡប់ទៅសហភាពអឺរ៉ុប»។
វិធានការនេះនឹងប៉ះពាល់ដល់ក្រុមហ៊ុនសំខាន់ៗរបស់រុស្ស៊ីដូចជា Rosneft Transneft និង Gazprom Neft (GZPFY) ប៉ុន្តែសមាជិកសហភាពអឺរ៉ុបនឹងនៅតែអាចទិញប្រេងនិងឧស្ម័នពីពួកគេបាន។ប្លុកនេះបានឈានដល់កិច្ចព្រមព្រៀងបឋមលើការដាក់ទណ្ឌកម្មថ្មីកាលពីថ្ងៃចន្ទហើយក៏គ្មានការជំទាស់ណាមួយត្រូវបានលើកឡើងមុនកាលបរិច្ឆេទកំណត់ទេ៕