ក្រសួងការបរទេសអាល់ហ្សេរីបានកោះហៅឯកអគ្គរដ្ឋទូតរបស់ខ្លួនប្រចាំទីក្រុងម៉ាឌ្រីដឱ្យត្រឡប់មកវិញ ក្នុងការតវ៉ាប្រឆាំងការសម្រេចចិត្តរបស់រដ្ឋាភិបាលអេស្ប៉ាញក្នុងការគាំទ្រផែនការស្វ័យភាពប្រទេសម៉ារ៉ុក សម្រាប់ដែនដីមានជម្លោះសាហារ៉ាខាងលិច។
ប្រទេសម៉ារ៉ុក ចាត់ទុកសាហារ៉ាខាងលិចដែលជាទឹកដីមានធនធានផូស្វ័រ និងប្រភពនេសាទអាត្លង់ទិកជាផ្នែកសំខាន់នៃទឹកដីរបស់ខ្លួន។
សេចក្ដីថ្លែងការណ៍ចេញផ្សាយដោយប្រព័ន្ធផ្សព្វផ្សាយផ្លូវការរបស់ប្រទេសអាល់ហ្សេរី កាលពីថ្ងៃសៅរ៍ បានថ្កោលទោស «ការផ្លាស់ប្ដូរភ្លាមៗ» ដោយទីក្រុងម៉ាឌ្រីដដែលពីមុនបានរក្សាអព្យាក្រឹតភាពនៅក្នុងជម្លោះនេះដែលមានអាយុរាប់ទសវត្សរ៍សម្រាប់ទឹកដីរវាងម៉ារ៉ុកនិងចលនាឯករាជ្យរណសិរ្ស Polisario។
កាលពីថ្ងៃសុក្រ រដ្ឋមន្ត្រីការបរទេសអេស្ប៉ាញលោក Jose Manuel Albares បានគាំទ្រសំណើឆ្នាំ ២០០៧ របស់ប្រទេសម៉ារ៉ុកដើម្បីផ្ដល់ស្វ័យភាពតំបន់សាហារ៉ាខាងលិចក្រោមអធិបតេយ្យភាពរបស់ខ្លួនដោយអះអាងថាវាជា «មូលដ្ឋានដ៏សំខាន់បំផុតប្រាកដនិយម និងគួរឱ្យជឿជាក់» ដើម្បីបញ្ចប់ជម្លោះដ៏រ៉ាំរ៉ៃ។
ទន្ទឹមនឹងនេះចលនារណសិរ្ស Polisario បានចោទប្រកាន់ប្រទេសអេស្ប៉ាញថា បានធ្វើកំហុសធ្ងន់ធ្ងរបន្ទាប់ពីបានផ្លាស់ប្ដូរជំហររបស់ខ្លួន។ក្រុមនេះនិយាយថា «អង្គការសហប្រជាជាតិសហភាពអាហ្វ្រិក សហភាពអឺរ៉ុបតុលាការយុត្តិធម៌អន្តរជាតិតុលាការយុត្តិធម៌អឺរ៉ុបនិងអង្គការក្នុងតំបន់ទាំងអស់ គឺមិនទទួលស្គាល់អធិបតេយ្យភាពម៉ារ៉ុកលើតំបន់សាហារ៉ាខាងលិចទេ»។
ក្រុមឯករាជ្យ Polisario ដែលគាំទ្រដោយអាល់ហ្សេរីចាប់ផ្ដើមកាន់អាវុធក្នុងទសវត្សរ៍ឆ្នាំ ១៩៧០ ហើយបានបន្តទាមទារឱ្យមានការបោះឆ្នោតប្រជាមតិឯករាជ្យសម្រាប់សាហារ៉ាខាងលិចដោយផ្អែកលើកិច្ចព្រមព្រៀងឆ្នាំ ១៩៩១ ដែលរួមបញ្ចូលបទឈប់បាញ់។ ប្រទេសម៉ារ៉ុក ចាត់ទុកសាហារ៉ាខាងលិចដែលជាទឹកដីមានធនធានផូស្វ័រនិងប្រភពនេសាទអាត្លង់ទិកជាផ្នែកសំខាន់នៃទឹកដីរបស់ខ្លួន។ ចំណាត់ការកាលពីថ្ងៃសុក្រ បានបង្កឱ្យមានការភ្ញាក់ផ្អើលនិងការឆ្លើយតបដ៏ខឹងសម្បាពីសំណាក់ក្រុម Polisario៕