ក្នុងសន្ទនាតាមវីដេអូខលរយៈពេលជាង ១១០ នាទីកាលពីថ្ងៃសុក្រ ទី១៨ មិនា ប្រធានាធិបតីអាមេរិកលោកចូ បៃដិន បានព្យាយាមបញ្ចុះបញ្ចូលប្រធានាធិបតីចិនលោកស៊ី ជីនភីងកុំឱ្យផ្ដល់ជំនួយឱ្យប្រទេសរុស្ស៊ីក្នុងការលុកលុយចូលប្រទេសអ៊ុយក្រែន ដែលការសន្ទនានេះគឺជាចំណុចដ៏សំខាន់មួយដែលការកំណត់ទិសដៅនៃសង្គ្រាមនេះ។
សារព័ត៌មានចិនបានរាយការណ៍ថាលោកស៊ី បានប្រាប់លោកបៃដិនថា ទាំងចិន និងអាមេរិក មានទំនួលខុសត្រូវក្នុងការធានាសន្តិភាព ដែលហាក់ដូចជាមានន័យថាលោកមិនចង់ធ្វើឱ្យសង្គ្រាមនេះកាន់តែក្ដៅជាងមុនទេ។ បើទោះជាយ៉ាងនេះក៏ដោយ សេតវិមាន បាននិយាយថាការព្រួយបារម្ភអំពីអន្តរាគមន៍ជួយក្រុងម៉ូស្គូ ដោយក្រុងប៉េកាំង គឺនៅមិនទាន់បាត់នៅឡើយ។
«យើងមានការព្រួយបារម្ភនោះ» អ្នកនាំពាក្យសេតវិមានលោកស្រីជេន ផ្សាគី បាននិយាយបែបនេះ ហើយបន្តទៀតថាលោកបៃនដិន «បានរៀបរាប់លម្អិតអំពីផលប៉ះពាល់និងផលវិបាកប្រសិនបើចិនផ្ដល់ជំនួយជាសម្ភារៈដល់រុស្ស៊ី ខណៈដែលពួកគេធ្វើការវាយប្រហារយ៉ាងឃោរឃៅប្រឆាំងនឹងទីក្រុង និងជនស៊ីវិលអ៊ុយក្រែន ហើយនោះ គឺជាអ្វីដែលយើងនឹងឃ្លាំមើល ហើយពិភពលោកនឹងកំពុងមើល»។
ប៉ុន្តែលោកស្រីបានបដិសេធមិនបញ្ជាក់ថា អាមេរិកនឹងចាត់វិធានការអ្វីខ្លះ ក្នុងករណីរឿងនេះកើតឡើង។
ប្រទេសចិនមានព្យាយាមបង្ហាញជំហរអព្យាក្រឹតក្នុងសង្គ្រាមនេះ ដោយបដិសេធមិនថ្កោលទោសភាគីណាមួយ ប៉ុន្តែប៉ុន្មានសប្ដាហ៍មុនការលុកលុយរបស់រុស្ស៊ីចាប់ផ្ដើម ក្រុងប៉េកាំង និងក្រុងម៉ូស្គូបានប្រកាសថា ភាពជាដៃគូរបស់ពួកគេគឺ «គ្មានដែនកំណត់»ទេ។ ភាពស្រពិចស្រពិលក្នុងជំហររបស់ចិន បានធ្វើឱ្យលោកខាងលិចព្រួយបារម្ភថាក្រុងប៉េកាំងអាចនឹងផ្ដល់ជំនួយឱ្យក្រុងម៉ូស្គូ។
បើទោះជាយ៉ាងនេះក៏ដោយ មេដឹកនាំចិនអាចកំពុងពិចារណាជំហររបស់ពួកគេឡើងវិញ ដោយសារទិដ្ឋភាពដ៏ក្រៀមក្រំនៅទឹកដីប្រទេសអ៊ុយក្រែន និងភាពរួបរួមដាក់ទណ្ឌកម្មលើរុស្ស៊ី ដោយសម្ព័ន្ធមិត្តអាមេរិកនៅអឺរ៉ុប និងអាស៊ី៕