នៅពេលដែលវីរុសកូរ៉ូណាបង្ហាញខ្លួនជាលើកដំបូងនៅប្រទេសចិននៅចុងឆ្នាំ ២០១៩ និងដើមឆ្នាំ ២០២០ លោកប្រធានាធិបតី ស៊ី ជីនភីង បានប្រកាស «សង្គ្រាមរបស់ប្រជាជន» ប្រឆាំងនឹងជំងឺរាតត្បាត ហើយបានចាប់ផ្ដើមអ្វីដែលបានក្លាយជាយុទ្ធសាស្ត្រតឹងរ៉ឹងបំផុតក្នុងពិភពលោក ដើម្បីលុបបំបាត់ការឆ្លង។
៣ ឆ្នាំក្រោយមក ប្រទេសចិនកំពុងប្រឈមមុខនឹងវ៉ារ្យ៉ង់ ដែលបង្កឆ្លងយ៉ាងរហ័ស និងដោយស្ងាត់ៗ ធ្វើឱ្យលោកស៊ីធ្វើការកែលម្អយុទ្ធសាស្ត្ររបស់លោក ដោយបញ្ជាមន្ត្រីក្រោមឱវាទឱ្យចាត់វិធានការកាត់ផ្ដាច់ការឆ្លង ប៉ុន្តែក៏ឱ្យព្យាយាមរក្សាផលប៉ះពាល់ដល់សេដ្ឋកិច្ចឱ្យនៅកម្រិតទាបបំផុត។
ខណៈពេលដែលប្រទេសចិនប្រឈមមុខនឹងការរីករាលដាលធំបំផុត ចាប់តាំងពីការរីករាលដាលដំបូងនៅទីក្រុងវូហាន ក្រុងប៉េកាំងនិយាយថាវិធានការរបស់ខ្លួន គឺគួរតែមានវិសាលភាពច្បាស់លាស់ជាងមុន។ មន្ត្រីចិន ថ្មីៗនេះទើបតែបង្ហាញការគាំទ្រចំពោះការធ្វើតេស្តតាមគេហដ្ឋានជាជាងការប្រមូលផ្ដុំមនុស្សធ្វើតេស្តក្នុងខ្នាតធំ ហើយទើបតែឈប់អនុវត្តវិធានការដែលប្រើប្រាស់ធនធានច្រើន ដូចជា វិធានការបញ្ជូនគ្រប់ករណីវិជ្ជមានទាំងអស់ទៅមន្ទីរពេទ្យ ដោយមិនមានការបែងចែករវាងករណីធ្ងន់ធ្ងរ ឬករណីស្រាល។
រហូតមកទល់ពេលនេះ ចំនួនករណីវិជ្ជមាននៅប្រទេសចិន គឺមានទំហំតូច ប្រសិនបើធៀបនឹងចំនួនប្រជាជនសរុប ដោយមានករណីស្លាប់ត្រឹមតែ ២ ប៉ុណ្ណោះ។ ប៉ុន្តែនៅពេលថ្មីៗនេះ ករណីភាគច្រើននៃករណីវិជ្ជមានជាង ៣២ ០០០ ករណីនៅខេត្តជាច្រើន គឺជាករណីឆ្លងអនុវ៉ារ្យ៉ង់ BA.2 នៃវ៉ារ្យ៉ង់អូមីក្រុង។
ការរីករាលដាលលើកនេះអាចដាក់សម្ពាធយ៉ាងខ្លាំងលើប្រព័ន្ធសុខាភិបាលចិន ប្រសិនបើគ្រប់ករណីវិជ្ជមាន ត្រូវបានបញ្ជូនទៅមន្ទីរពេទ្យ ដែលជាវិធានការទើបតែបញ្ឈប់នៅពេលថ្មីៗនេះ។ វាក៏អាចប៉ះពាល់ដល់កងទ័ពអាវស និងបុគ្គលិកស្ម័គ្រចិត្តរបស់ចិនផងដែរ ដែលមានការទទួលខុសត្រូវលើការធ្វើតេស្តប្រជាជនរាប់លាននាក់ និងឃ្លាំមើលប្រជាជនកំពុងធ្វើចត្តាឡីស័ក។ បន្ថែមពីលើនេះ ការបិទខ្ទប់រយៈពេលវែង និងមានទាយទុកមុនបាន អាចប៉ះពាល់យ៉ាងខ្លាំងលើរោងចក្រដែលមានចំណូលទាប ឬអាចឈានដល់ការបាត់បង់ការងារជាច្រើននៅវិស័យដទៃទៀត។
កាលពីសប្ដាហ៍មុនលោក ស៊ី បានជំរុញដល់មន្ត្រីទាំងអស់ឱ្យចាត់វិធានការ ដែលមាន «ប្រសិទ្ធភាពអតិបរមា» តែមាន «ផលប៉ះពាល់អប្បបរមា» ដើម្បីគ្រប់គ្រងការរីករាលដាល ដែលឆ្លុះបញ្ចាំងការព្រួយបារម្ភអំពីការធ្លាក់ចុះនៃកំណើនសេដ្ឋកិច្ច។ ប៉ុន្តែការបញ្ជារបស់លោកឱ្យកាត់ផ្ដាច់ការឆ្លងឱ្យបានឆាប់រហ័ស បានធ្វើឱ្យមានការចោទសួរថា តើពួកគេនឹងបន្ធូរបន្ថយវិធានការដល់កម្រិតណា ដើម្បីចៀសវាងផលប៉ះពាល់។ មន្ត្រីសុខាភិបាលចិនបាននិយាយថា បើទោះបីវិសាលភាពនៃវិធានការត្រូវបានកំណត់ច្បាស់លាស់ជាងមុន គេមិនមានផែនការបន្ធូរបន្ថយវិធានការនោះទេ។
អ្នកវិភាគជាច្រើន បាននិយាយថា វិធានការដ៏តឹងរ៉ឹងទាំងនេះ គឺដោយសារគណបក្សកុម្មុយនីស្តចិនប្រកាន់ជំហរមិនអត់ឱនចំពោះមន្ត្រីថ្នាក់ក្រោម ប្រសិនបើមានការរីកដាលនៅទីកន្លែងដែលពួកគេកំពុងគ្រប់គ្រង។ គេបានចង្អុលទៅករណីបណ្ដេញមន្ត្រីដឹកនាំក្រុងជីលីន និងការបណ្ដេញមន្ត្រីរាប់សិបនាក់នៅក្រុងដទៃទៀត ជុំវិញបញ្ហាការឆ្លើយតបនឹងការរីករាលដាលជំងឺកូវីដ ១៩ នៅពេលថ្មីនេះ។
សម្រាប់ប្រជាជនជាច្រើននៅប្រទេសចិន ជីវិតរស់នៅប្រចាំថ្ងៃបានរងផលប៉ះពាល់យ៉ាងខ្លាំងពីរលកឆ្លងថ្មីនេះ។ មនុស្សរាប់សិបលាននាក់ កំពុងស្ថិតក្រោមការបិទខ្ទប់ប្រភេទណាមួយ។ រោងចក្រជាច្រើនបានផ្អាកការងារ ហើយរថយន្តដឹកទំនិញបានពន្យារការដឹកជញ្ជូន ធ្វើឱ្យប៉ះពាល់យ៉ាងខ្លាំងដល់ខ្សែចង្វាក់ផ្គត់ផ្គង់។ នៅទីក្រុងធំៗ ដូចជា ក្រុងស៊ាងហៃ និងក្រុងស៊ិនជិន បានមានភាពស្ងប់ស្ងាត់មិនប្រក្រតី ខណៈពេលដែលការិយាល័យការងារ និងសាលាត្រូវបានបិទ ហើយប្រជាជនត្រូវបានបញ្ជាមិនឱ្យចាកចេញពីគេហដ្ឋានរបស់ពួកគេ។
នៅក្រុងសៀងហៃ អាជ្ញាធរមិនបានអនុវត្តវិធានការបិទខ្ទប់ក្រុងទាំងមូលទេ ប៉ុន្តែបានធ្វើការតាមដានការឆ្លង ដើម្បីបិទខ្ទប់តំបន់មានហានិភ័យឆ្លងខ្ពស់។ បើទោះជាយ៉ាងក៏ដោយ ការបិទខ្ទប់តំបន់បែបនេះ នឹងនៅតែបង្កផលប៉ះពាល់សេដ្ឋកិច្ចដដែល។
សម្រាប់ពេលបច្ចុប្បន្ន វិធានការដ៏តឹងរ៉ឹងរបស់ចិន គឺនៅមានការគាំទ្រពីប្រជាជនចិន ខណៈពេលដែលពួកគេ ចង់ចៀសវាងទិដ្ឋភាពក្រៀមក្រំ ដែលជំងឺកូវីដ ១៩ បានបង្កនៅប្រទេសដទៃទៀត ឬក្នុងទឹកដីក្រុងហុងកុង ដែលបានរងការរីករាលដាលយ៉ាងខ្លាំង។
រូបភាពអ្នកជំងឺ និងសាកសពជាច្រើននៅខាងក្រៅមន្ទីរពេទ្យនៅក្រុងហុងកុង បានធ្វើឱ្យមានការស្លន់ស្លោយ៉ាងខ្លាំងក្នុងចំណោមប្រជាជនចិនដីគោក។
យ៉ាងណាមិញ ជាមួយនឹងមេរោគបំប្លែងថ្មី ការតាមដានខ្សែចម្លងពីមនុស្សទៅមនុស្សគឺហាក់ដូចជាកាន់តែលំបាក។ ភូមិមួយនៅជិតទីក្រុងស៊ិនជិនត្រូវបានដាក់ក្រោមការបិទខ្ទប់ជិត ៣ សប្ដាហ៍ បន្ទាប់ពីរកឃើញករណីវិជ្ជមាន។ ភូមិនេះត្រូវបានដោះចេញពីការបិទខ្ទប់ បន្ទាប់ពីលែងមានករណីវិជ្ជមាន ប៉ុន្តែប៉ុន្មានថ្ងៃក្រោយមកបានត្រឡប់ទៅរកការបិទខ្ទប់វិញ ដោយសាររកឃើញករណីវិជ្ជមានឡើងវិញ។
បើទោះបីជាអាជ្ញាធរចិនអាចទប់ស្កាត់រលកឆ្លងលើកនេះបានក៏ដោយ ក៏អ្នកជំនាញជាច្រើននិយាយថា ពួកគេនឹងមិនអាចចៀសចេញពីរលកឆ្លងបន្ថែមទៀតនៅពេលអនាគត ដូច្នេះប្រទេសចិនត្រូវតែរៀបចំផែនការដើម្បីត្រៀមខ្លួនរស់នៅជាមួយនឹងជំងឺនេះ៕