កាលពីថ្ងៃអាទិត្យទី ២០ មីនាក្នុងកិច្ចសម្ភាសន៍មួយលើកម្មវិធី «Face The Nation» របស់ប៉ុស្តិ៍ទូរទស្សន៍ CBS ឯកអគ្គរដ្ឋទូតចិនប្រចាំក្រុងវ៉ាស៊ីនតោនលោក ឈីន ហ្គាំង បាននិយាយថា ប្រទេសចិនមាន «មិត្តភាពទំនាក់ទំនងអ្នកជិតខាងល្អជាមួយរុស្ស៊ី»។
នៅពេលដែលពិធីការិនីកម្មវិធីលោកស្រី ម៉ាហ្កា រ៉េត ប្រ៊េនណាន ចោទសួរថា «ហេតុអ្វីបានជាអ្នកមិនអាចថ្កោលទោសនេះថា ជាការឈ្លានពាន?» លោក ឈីន បានឆ្លើយថា៖ «កុំឆោត ការថ្កោលទោសមិនអាចដោះស្រាយបញ្ហាទេ។ ខ្ញុំនឹងភ្ញាក់ផ្អើលប្រសិនបើរុស្ស៊ីនឹងដកថយដោយសារការថ្កោលទោស»។
លោក ឈីន បន្តទៀតថា៖ «យើងបានបញ្ជាក់យ៉ាងច្បាស់រួចហើយថា អធិបតេយ្យភាពជាតិ និងបូរណភាពទឹកដីនៃប្រទេសទាំងអស់ រួមទាំងអ៊ុយក្រែន គួរតែត្រូវបានគោរព និងការពារ។ ប៉ុន្តែដូចដែលខ្ញុំបាននិយាយ ការថ្កោលទោសមិនអាចជួយបានទេ។ អ្វីដែលយើងត្រូវការគឺការទូតល្អដោយផ្អែកលើចក្ខុវិស័យ ប្រាជ្ញា និងភាពក្លាហាន»។
លោកប្រធានាធិបតី ស៊ី ជីនភីង បានព្យាយាមបង្ហាញអព្យាក្រឹតភាព និងបានអំពាវនាវឱ្យមាន «ការអត់ធ្មត់» ពីប្រទេសរុស្ស៊ី ប៉ុន្តែមន្ត្រី និងសារព័ត៌មានចិនមួយចំនួនបានជួយបន្ទរការផ្សព្វផ្សាយគាំទ្រការលុកលុយរបស់រុស្ស៊ី។ ភាពស្រពេចស្រពិលនេះបានធ្វើឱ្យលោកខាងលិចព្រួយបារម្ភ ចំពេលដែលមានការរាយការណ៍ថាចិនបានបង្ហាញការបើកចំហចំពោះការបំពេញសំណើរបស់រុស្ស៊ីដើម្បីផ្ដល់ជំនួយយោធា។
«មានព័ត៌មានប្រឌិតថាចិននឹងផ្ដល់ជំនួយយោធាដល់រុស្ស៊ី។ យើងច្រានចោលវា» លោក ឈីន និយាយបែបនេះ ហើយបន្តទៀតថា៖ «អ្វីដែលចិនកំពុងធ្វើគឺការបញ្ជូនអាហារ ថ្នាំពេទ្យ ពូកភួយ និងអាហារបំប៉នទារក មិនមែនអាវុធ និងគ្រាប់រំសេវមិនថាភាគីណាទេ ហើយប្រឆាំងនឹងសង្គ្រាមដូចខ្ញុំបាននិយាយ អ្នកដឹងហើយ យើងនឹងអ្វីគ្រប់យ៉ាងដើម្បីបន្ថយវិបត្តិ»៕
វីដេអូ៖