នៅពេលដែលមានការចេញផ្សាយអត្ថបទមួយដោយបញ្ញវន្តគោលនយោបាយសាធារណ: ១ រូប មានតំណែងជាន់ខ្ពស់ក្នុងរដ្ឋាភិបាលចិន ដែលជំរុញឱ្យក្រុងប៉េកាំងផ្ដាច់ទំនាក់ទំនងជាមួយប្រធានាធិបតីរុស្ស៊ី វ្ល៉ាឌីមៀរ ពូទីន ដោយសារការលុកលុយអ៊ុយក្រែន ការប្រតិកម្មនៅលើបណ្ដាញអ៊ីនធឺណិតបានកើតឡើងយ៉ាងរហ័ស។
ដើមឡើយអត្ថបទរបស់លោកហ៊ូ វ័យ អនុប្រធានមជ្ឈមណ្ឌលស្រាវជ្រាវគោលនយោបាយសាធារណ:នៃទីស្ដីការគណៈរដ្ឋមន្ត្រីចិន ត្រូវបានចែកចាយក្នុងចំណោមថ្នាក់ដឹកនាំកំពូលនៅសម័យប្រជុំប្រចាំឆ្នាំនៃសភាប្រជាជនចិន។ ក្រោយលោកហ៊ូ បានបញ្ជូនអត្ថបទនេះឱ្យចេញផ្សាយជាភាសាចិន និងអង់គ្លេសលើគេហទំព័រ US-China Perception Monitor (USCPM) របស់អង្គការអាមេរិក Carter Center ដែលរហូតមកដល់ពេលនេះបានទទួលការចូលមើលជាង ១ លានដងទាំងក្នុង និងក្រៅប្រទេសចិន។ ការចេញផ្សាយនេះត្រូវចែកចាយលើបណ្ដាញសង្គមចិន និងគេហទំព័រសារព័ត៌មានក្រៅផ្លូវការ។
អត្ថបទបានបង្កឱ្យមានប្រតិកម្មយ៉ាងខ្លាំង ដោយមានអ្នករិះគន់លោកហ៊ូថា បានសរសេរអត្ថបទ «មិនគិតពីផលប៉ះពាល់ និងគ្រោះថ្នាក់»។ ប៉ុន្មានថ្ងៃបន្ទាប់ពីការចេញផ្សាយគេហទំព័រ USCPM ត្រូវបានរារាំងមិនឱ្យនៅប្រទេសចិន។
ក្នុងអត្ថបទនោះលោកហ៊ូ បានសរសេរថារុស្ស៊ីកំពុងប្រឈមនឹងការបរាជ័យ ហើយប្រទេសចិនត្រូវការកាត់ផ្ដាច់ទំនាក់ទំនងជាមួយលោកពូទីន ដើម្បីចៀសវាងឈរជាមួយភាគីចាញ់សង្គ្រាម ហើយដើម្បីជៀសវាងរងការឡោមព័ទ្ធដោយអាមេរិក និងលោកខាងលិច។
ជំហរផ្លូវការរបស់រដ្ឋាភិបាលចិនគឺអព្យាក្រឹតភាព ប៉ុន្តែមុនការលុកលុយកើតឡើងបានប្រកាសថាភាពជាដៃគូរវាងក្រុងប៉េកាំង និងក្រុងម៉ូស្គូ គឺគ្មានដែនកំណត់ទេ ហើយក្រោយសង្គ្រាមចាប់ផ្ដើមមន្ត្រីនិងសារព័ត៌មានចិនមួយចំនួនបានបង្ហាញការគាំទ្រចំពោះរុស្ស៊ី។ លោកហ៊ូសរសេរថាជំហរស្រពេចស្រពិលបែបនេះគឺគ្រោះថ្នាក់ណាស់ ហើយចិនត្រូវតែជ្រើសរើសជំហរជាក់លាក់មួយ៕