សង្គ្រាមនៅអ៊ុយក្រែនបង្កឱ្យមានការភ្ញាក់ផ្អើលដល់ទីផ្សារថាមពលពិភពលោក ប៉ុន្តែនៅពេលបច្ចុប្បន្ន មានការព្រួយបារម្ភពីវិបត្តិកាន់តែជ្រៅជាងនេះទៅទៀត គឺវិបត្តិកង្វះអាហារ។
ការផ្គត់ផ្គង់ស្រូវសាលី ពោត និងស្រូវបាឡីមួយផ្នែកធំរបស់ពិភពលោកត្រូវបានជាប់គាំងនៅក្នុងប្រទេសរុស្ស៊ី និងអ៊ុយក្រែន ដោយសារតែសង្គ្រាម ខណៈពេលដែលការផ្គត់ផ្គង់ជីគីមីរបស់ពិភពលោកមួយផ្នែកធំជាងនេះទៅទៀត ត្រូវបានជាប់គាំងនៅក្នុងប្រទេសរុស្ស៊ី និងបេឡារុសផងដែរ។
លទ្ធផលបន្សល់ពីបញ្ហាខាងលើ គឺកើនឡើងតម្លៃអាហារ និងជីនៅជុំវិញពិភពលោក។ ចាប់តាំងពីការលុកលុយកាលពីខែមុន តម្លៃស្រូវសាលីបានកើនឡើង ២១ ភាគរយ ស្រូវបាឡី ៣៣ភាគរយ និងជីប្រភេទមួយចំនួនបានកើន ៤០ ភាគរយ។
ភាពចលាចលនេះ ត្រូវបានផ្សំឡើងដោយបញ្ហាប្រឈមសំខាន់ៗមានស្រាប់ដែលកំពុងបង្កកើនឡើងតម្លៃ និងបង្អាក់ការផ្គត់ផ្គង់រួមមានវិបត្តិរាតត្បាត ឧបសគ្គនៃការដឹកជញ្ជូន តម្លៃថាមពលខ្ពស់ គ្រោះរាំងស្ងួត ទឹកជំនន់ និងអគ្គិភ័យវាលស្រែនាពេលថ្មីៗនេះ។
ឥឡូវនេះ អ្នកសេដ្ឋកិច្ច អង្គការជំនួយ និងមន្ត្រីរដ្ឋាភិបាល កំពុងព្រមានអំពីផលប៉ះពាល់ ការកើនឡើងនៃភាពស្រេក-ឃ្លានពិភពលោក។
គ្រោះមហន្តរាយដែលកំពុងលេចចេញជាលទ្ធផលនៃសង្គ្រាមដ៏ធំមួយនៅក្នុងយុគសម័យសកលភាវូបនីយកម្ម។ តម្លៃអាហារ ជី ប្រេង ឧស្ម័ន និងសូម្បីតែលោហធាតុ ដូចជា អាលុយមីញ៉ូម នីកែល និងប៉ាឡាដ្យូម សុទ្ធតែកើនឡើងយ៉ាងឆាប់រហ័សហើយអ្នកជំនាញរំពឹងថា នឹងកាន់តែអាក្រក់ទៅៗដោយសារផលប៉ះពាល់វិបត្តិសង្គ្រាមអ៊ុយក្រែននេះ។
លោក David Beasley នាយកប្រតិបត្តិនៃកម្មវិធីស្បៀងអាហារពិភពលោកដែលជាទីភ្នាក់ងារអង្គការសហប្រជាជាតិផ្ដល់អាហារដល់មនុស្ស ១២៤ លាននាក់ ក្នុង ១ ថ្ងៃ បាននិយាយថា៖ «វិបត្តិអ៊ុយក្រែន ត្រូវបានរួមបញ្ចូលគ្រោះមហន្តរាយមួយនៅលើកំពូលនៃគ្រោះមហន្តរាយដែលមិនធ្លាប់មានពីមុនមក តាំងពីសង្គ្រាមលោកលើកទី២»។
កសិដ្ឋានអ៊ុយក្រែន បានខកខានរដូវដាំដុះ និងច្រូតកាត់ដ៏សំខាន់ៗហើយ។ ដោយឡែករោងចក្រជីនៅអឺរ៉ុប កំពុងកាត់បន្ថយផលិតកម្មយ៉ាងខ្លាំងដោយសារតែតម្លៃថាមពលខ្ពស់។ កសិករពីប្រទេសប្រេស៊ីល ដល់រដ្ឋតិចសាស់សហរដ្ឋអាមេរិក កំពុងកាត់បន្ថយការប្រើជីដែលគំរាមកំហែងទំហំនៃការប្រមូលផលបន្ទាប់ផងដែរ។
ប្រទេសចិន ដែលប្រឈមមុខនឹងខូចខាតដំណាំស្រូវសាលីដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍ បន្ទាប់ពីទឹកជំនន់ធ្ងន់ធ្ងរ ក៏គ្រោងនឹងទិញការផ្គត់ផ្គង់ដែលធ្លាក់ចុះកាន់តែច្រើនរបស់ពិភពលោក។
ចំណែកប្រទេសឥណ្ឌា ដែលជាធម្មតានាំចេញស្រូវសាលីក្នុងបរិមាណតិចតួចបានឃើញតម្រូវការពីបរទេសកើនឡើងច្រើនជាង ៣ ដង បើធៀបនឹងពេលដដែលកាលឆ្នាំមុន។
បន្ថែមពីនេះ នៅក្នុងខែកុម្ភៈ តម្លៃចាប់ហួយរបស់សហរដ្ឋអាមេរិក បានកើនឡើងរួចហើយ ៨,៦ ភាគរយកាលពីឆ្នាំមុន ដែលជាការកើនឡើងដ៏ធំបំផុតក្នុងរយៈពេល ៤០ ឆ្នាំ។ នេះបើយោងតាមទិន្នន័យរបស់រដ្ឋាភិបាល។
សម្រាប់អ្នកដែលរស់នៅក្បែរគែមនៃអសន្តិសុខស្បៀងស្រាប់នោះ ក៏មើលឃើញការកើនឡើងនៃតម្លៃចុងក្រោយបំផុតអាចជំរុញមនុស្សជាច្រើនប្រឈមនឹងអសន្តិសុខស្បៀងបន្ថែមទៀត។
គួរបញ្ជាក់ផងដែរថា ភាពអត់ឃ្លានបានកើនឡើងប្រហែល ១៨ ភាគរយក្នុងអំឡុងពេលជំងឺរាតត្បាតដល់មនុស្សចន្លោះ ពី ៧២០ លាននាក់ ទៅ ៨១១ លាននាក់។ កាលពីដើមខែនេះ អង្គការសហប្រជាជាតិបាននិយាយថា ឥទ្ធិពលនៃសង្គ្រាមលើទីផ្សារអាហារពិភពលោកតែមួយមុខអាចបណ្ដាលឱ្យមនុស្សពី ៧,៦ លាននាក់ទៅ ១៣,១ លាននាក់បន្ថែមទៀត ប្រឈមនឹងវិបត្តិស្រេកឃ្លាន។
ការចំណាយរបស់កម្មវិធីស្បៀងអាហារពិភពលោកបានកើនឡើង ៧១ លានដុល្លារអាមេរិកក្នុង ១ ខែ ដែលគ្រប់គ្រាន់ដើម្បីកាត់បន្ថយភាពអត់ឃ្លានប្រចាំថ្ងៃសម្រាប់មនុស្ស ៣,៨ លាននាក់ប៉ុណ្ណោះ។
ទោះយ៉ាងណាក្ដី ការកើនឡើងតម្លៃស្បៀងអាហារ គឺជាកត្តាជំរុញឱ្យមានការចលាចលក្នុងសង្គម និងនយោបាយជាយូរយារណាស់មកហើយនៅក្នុងបណ្ដាប្រទេសក្រីក្រនៅអាហ្វ្រិក និងអារ៉ាប់ ហើយមនុស្ស ជាច្រើនបានឧបត្ថម្ភធនដល់អាហារបំប៉ន ដូចជានំប៉័ងក្នុងកិច្ចខិតខំប្រឹងប្រែងដើម្បីចៀសវាងបញ្ហាបែបនេះ៕
វីដេអូ៖