យន្តហោះ Boeing 737-800 មួយគ្រឿងរបស់ក្រុមហ៊ុន China Eastern Airlines ធ្លាក់ដាំក្បាលចុះនៅពេលកំពុងធ្វើដំណើរក្នុងល្បឿន ៨៤២ គីឡូម៉ែត្រក្នុង ១ ម៉ោង និងនៅកម្ពស់ជិត ៩ គីឡូម៉ែត្រ បណ្ដាលឱ្យអ្នកដំណើរលើយន្តហោះ និងបុគ្គលិកសរុបចំនួន ១៣២ នាក់ ស្លាប់កាលពីថ្ងៃចន្ទ។
ក្រុមហ៊ុនអាកាសចរណ៍ដដែលបាននិយាយថាខ្លួនចូលរួមរំលែកទុក្ខយ៉ាងក្រៀមក្រំដល់អ្នកដំណើរនិងបុគ្គលិកនៅលើយន្តហោះទាំងអស់។ពួកគេនិយាយថាមូលហេតុនៃការធ្លាក់យន្តហោះនេះកំពុងស្ថិតនៅក្រោមការស៊ើបអង្កេតនៅឡើយ។
អ្នកនាំពាក្យក្រុមហ៊ុន Boeing បាននិយាយនៅក្នុងសេចក្ដីថ្លែងការណ៍មួយថា៖ «យើងកំពុងធ្វើការជាមួយអតិថិជនក្រុមហ៊ុនអាកាសចរណ៍របស់យើងហើយត្រៀមខ្លួនជាស្រេចដើម្បីខិតខំប្រឹងប្រែងបំពេញការងារនេះ»។
គ្រោះថ្នាក់បែបនេះជាធម្មតាពាក់ព័ន្ធនឹងកត្តាជាច្រើនហើយអ្នកជំនាញបានព្រមានថាយន្តហោះនេះ ហោះលឿនពេកប៉ុន្តែមិនមានការសន្និដ្ឋានណាមួយអំពីមូលហេតុដែលអាចកើតមាន ជាពិសេសចំពេលដែលព័ត៌មាននៅមិនទាន់បានផ្ដល់ពេញលេញនៅឡើយ។
ជើងហោះហើរ MU5735 កាលនោះគឺកំពុងធ្វើដំណើរពីទីក្រុងគុនមីងភាគនិរតីនៃខេត្តយូណានឆ្ពោះទៅទីក្រុងក្វាងចូវរដ្ឋធានីខេត្តក្វាងទុងជាប់ព្រំដែនហុងកុងមុនពេលវាធ្លាក់។
ជាការឆ្លើយតបនឹងការធ្លាក់នេះក្រុមហ៊ុនអាកាសចរណ៍ China Eastern Airlines ក៏បានផ្អាកដំណើរការយន្តហោះ Boeing 737-800 របស់ខ្លួនទាំងអស់។ឯភាគហ៊ុនរបស់ក្រុមហ៊ុន Boeing ទៀតសោតក៏បានធ្លាក់ចុះជាង ៤% ផងដែរ។ការធ្លាក់នេះ កើតឡើង៣ ឆ្នាំ បន្ទាប់ពីម៉ូដែល Boeing មួយទៀតគឺ 737 Max ត្រូវបានផ្អាកនៅទូទាំងពិភពលោកបន្ទាប់ពីការធ្លាក់ចំនួន២លើក ក្នុងចន្លោះពេល ៧ ខែ៕