.jpg)
តុលាការក្រុងម៉ូស្គូបាននិយាយកាលពីថ្ងៃ ចន្ទថា ក្រុមហ៊ុន Meta មានទោសពីបទសកម្មភាពជ្រុលនិយមដែលនឹងឈានដល់ការហាមឃាត់មិនឱ្យប្រើប្រាស់បណ្ដាញសង្គម Facebook និង Instagram នៅក្នុងទឹកដីរុស្ស៊ី ប៉ុន្តែសេចក្ដីសម្រេចនេះនឹងមិនប៉ះពាល់ដល់វេទិកាបញ្ជូនសារ WhatsApp របស់ក្រុមហ៊ុនដដែលទេ។
ក្រុមហ៊ុន Meta មិនបានឆ្លើយតបនឹងសំណើសុំការអត្ថាធិប្បាយទេបន្ទាប់ពីតុលាការខណ្ឌ Tverskoi នៃទីក្រុងម៉ូស្គូបាននិយាយនៅក្នុងសេចក្ដីថ្លែងការណ៍មួយថា សម្រេចគាំទ្រពាក្យបណ្ដឹងរបស់រដ្ឋអាជ្ញារុស្ស៊ីដែលស្នើឱ្យមានការហាមឃាត់សកម្មភាពរបស់ក្រុមហ៊ុននេះនៅលើទឹកដីរុស្ស៊ី។
ទីភ្នាក់ងារព័ត៌មាន Interfax បានរាយការណ៍ថាមេធាវីរបស់ក្រុមហ៊ុន Meta អ្នកស្រី Victoria Shakina បានប្រាប់តុលាការថា ក្រុមហ៊ុនមិនបានធ្វើសកម្មភាពជ្រុលនិយមនិងគាំទ្រការស្អប់ខ្ពើមរុស្ស៊ី (Russophobia) នោះទេ។
នៅមិនទាន់មានច្បាស់នៅឡើយទេថា តើ Meta នឹងបន្តប្ដឹងទៅសាលាឧទ្ធរណ៍ចំពោះការហាមប្រាមសកម្មភាពរបស់ Facebook និង Instagram ក្នុងប្រទេសរុស្ស៊ីក្រោមហេតុផលនៃសកម្មភាពជ្រុលនិយមឬយ៉ាងណានោះទេ។ យ៉ាងណាមិញការលើកឡើងពីសារព័ត៌មានរុស្ស៊ី TASS ដែលត្រូវបានគេដាក់បម្រាមបានលើកឡើងថា ចៅក្រម Olga Solopova នឹងអនុវត្តនូវសេចក្ដីសម្រេចខាងលើភ្លាមៗ។
កាលពីល្ងាចថ្ងៃចន្ទនិយតករផ្នែកទូរគមនាគមន៍ Roskomnadzor បាននិយាយថា ខ្លួននឹងដកក្រុមហ៊ុន Meta ចេញពីបញ្ជីអង្គភាពបរទេសដែលប្រតិបត្តិការលើអ៊ីនធឺណិតក្នុងប្រទេសរុស្ស៊ីព្រមទាំង បណ្ដាញសង្គម Instagram និង Facebook ពីការចុះឈ្មោះបណ្តាញសង្គមក្នុងប្រទេសផងដែរ៕
