សហរដ្ឋអាមេរិក និងណាតូ ជឿថា «ឆាប់ៗនេះ» បេឡារុសអាចចូលរួមជាមួយរុស្ស៊ីក្នុងការលុកលុយចូលប្រទេសអ៊ុយក្រែន។ នេះបើតាមការរាយការណ៍ដោយ CNN ផ្អែកប្រភពមួយចំនួនដែលបាននិយាយថា ប្រទេសនេះបានចាត់វិធានការរួចរាល់ហើយ ដើម្បីត្រៀមធ្វើបែបនេះ។
មន្ត្រីយោធាអង្គការណាតូ ១ រូបនិយាយថា បេឡារុស «ទំនង» នឹងចូលរួមសង្គ្រាមនេះ ដោយសារការលុកលុយរបស់រុស្ស៊ី កំពុងត្រូវការជំនួយយ៉ាងខ្លាំង។
មន្ត្រីចារកម្មណាតូ ១ រូប បាននិយាយដោយឡែកថា រដ្ឋាភិបាលបេឡារុស គឺកំពុងរៀបចំបរិស្ថានដើម្បី «បង្កើតហេតុផលសម្រាប់ការវាយលុកដោយបេឡារុសប្រឆាំងនឹងអ៊ុយក្រែន»។
ប្រភពគណបក្សប្រឆាំងបេឡារុសបាននិយាយថា កងកម្លាំងបេឡារុសរាប់ពាន់នាក់បានត្រៀមខ្លួន ដើម្បីឆ្លងចូលប្រទេសអ៊ុយក្រែន នៅក្នុងរយៈពេលប៉ុន្មានថ្ងៃខាងមុខនេះ។ ក្នុងទស្សនៈរបស់ប្រភពនេះការចូលរួមរបស់បេឡេរុស មិនសូវមានផលប្រយោជន៍យោធាប៉ុន្មានទេ ប៉ុន្តែមានឥទ្ធិពលភូមិសាស្ត្រនយោបាយដ៏ធំមួយសម្រាប់រុស្ស៊ី ដែលអាចធ្វើការអះអាងថា មានប្រទេសចូលរួមគាំទ្រជាមួយខ្លួន។
ប្រទេសរុស្ស៊ី បានប្រើប្រាស់ទឹកដីរបស់បេឡារុស ដើម្បីបើកការវាយប្រហារឆ្ពោះទៅកាន់ក្រុងកៀវដោយកាលពីមុនសង្គ្រាមចាប់ផ្ដើមក្រុងម៉ូស្គូ បានអះអាងថា ទាហានរាប់ម៉ឺននាក់ប្រមូលផ្ដុំក្នុងទឹកដីនោះ គឺដើម្បីធ្វើសមយុទ្ធរួមគ្នាជាមួយកងកម្លាំងបេឡេរុស។
រហូតមកដល់ពេលនេះ បេឡារុសមិនទាន់បញ្ជូនជាផ្លូវការទាហានរបស់ខ្លួនឱ្យចូលរួមក្នុងការលុកលុយរបស់រុស្ស៊ី ប៉ុន្តែបានរងការដាក់ទណ្ឌកម្មយ៉ាងខ្លាំងពីលោកខាងលិចដោយសារការអនុញ្ញាតឱ្យកងកម្លាំងរុស្ស៊ីប្រើប្រាស់ទឹកដីរបស់ខ្លួនក្នុងការលុកលុយនេះ។
បន្ថែមពីលើនេះ បេឡារុសបានធ្វើវិសោធនកម្មរដ្ឋធម្មនុញ្ញរបស់ខ្លួនកាលពីខែមុនដែលអាចអនុញ្ញាតឱ្យរុស្ស៊ីដាក់ពង្រាយទ័ព ឬអាវុធនុយក្លេអ៊ែរជាអចិន្រៃ្តយ៍នៅក្នុងទឹកដីរបស់ខ្លួន៕
វីដេអូ៖