ការលុកលុយប្រទេសអ៊ុយក្រែន ដោយប្រទេសរុស្ស៊ី ដែលជាអ្នកផ្គត់ផ្គង់ថាមពលធំបំផុតរបស់សហភាពអឺរ៉ុប បានបង្ហាញច្បាស់អំពីការពឹងផ្អែកយ៉ាងខ្លាំងរបស់ប្រទេសអាល្លឺម៉ង់ អ៊ីតាលី និងប្រទេសអឺរ៉ុបដទៃទៀត លើការនាំចូលថាមពលពីរុស្ស៊ី។ ការដាក់សម្ពាធទាមទារឱ្យសហភាពអឺរ៉ុបកាត់ផ្ដាច់ការនាំចូលពីរុស្ស៊ី បានធ្វើឱ្យបណ្ដារដ្ឋាភិបាលក្នុងប្លុកនេះពន្លឿនផែនការរបស់ពួកគេ ដើម្បីកាត់ការពឹងផ្អែកលើប្រភពថាមពលឥន្ធនៈហ្វូស៊ីល ហើយស្វែងរកប្រភពផ្សេងទៀត។
ការអនុវត្តការផ្លាស់ប្ដូរប្រភពថាមពលរបស់អឺរ៉ុបដោយរលូនគឺនឹងមានការលំបាក។ ឥឡូវនេះ នៅពេលដែលសេដ្ឋកិច្ចកំពុងធ្លាក់ចុះដោយសារឆ្នាំទី២ នៃការរីករាលដាលជំងឺកូវីដ ១៩ សង្គ្រាមនៅអ៊ុយក្រែន និងការកើនឡើងតម្លៃនៃថាមពលនៅជុំវិញពិភពលោក ការលំបាកក្នុងការធ្វើបែបនេះ បានលេចចេញយ៉ាងច្បាស់។
ការបង្វែរការវិនិយោគពីប្រេង ឧស្ម័ន និងធ្យូងថ្ម ទៅរកប្រភពថាមពលកកើតវិញដូចជាថាមពលខ្យល់ និងពន្លឺព្រះអាទិត្យរួមជាមួយនិងការដាក់កំណត់ ឬការយកពន្ធលើការបញ្ចេញកាបូន និងការសាងសង់ហេដ្ឋារចនាសម្ព័ន្ធបញ្ជូនអគ្គិសនី គឺសំខាន់ណាស់ក្នុងការធ្វើការផ្លាស់ប្ដូរនេះ។ ប៉ុន្តែក្នុងអំឡុងពេលនៃអន្តរកាល វិធានការទាំងនេះទំនងនឹងបង្កឱ្យកើនឡើងតម្លៃសម្រាប់ អ្នកប្រើប្រាស់ ហើយអាចក្លាយជាការសម្រេចចិត្តនយោបាយដ៏លំបាកមួយសម្រាប់មេដឹកនាំប្រទេសទាំងនេះ។
ក្រៅពីជំរុញការបង្វែរទៅរកថាមពលកកើតវិញ សង្គ្រាមនៅអ៊ុយក្រែន ក៏បានធ្វើឱ្យរដ្ឋាភិបាលអឺរ៉ុបមួយចំនួនពិចារណាពន្យារផែនការបិទអណ្ដូងរ៉ែធ្យូងថ្ម អណ្ដូងប្រេង និងអណ្ដូងឧស្ម័នរបស់ពួកគេ ដើម្បីជំនួសការនាំចូលពីរុស្ស៊ី និងធ្វើឱ្យតម្លៃធ្លាក់ចុះវិញ។
នៅប្រទេសអាល្លឺម៉ង់ ដែលជាសេដ្ឋកិច្ចអឺរ៉ុបធំជាងគេ រដ្ឋាភិបាលកំពុងរៀបចំផែនការបើករោងចក្រអគ្គិសនីដើរដោយធ្យូងថ្ម ដែលទើបតែបិទថ្មីៗនេះឡើងវិញ ដើម្បីត្រៀមជាបម្រុងសម្រាប់ពេលដែលចាំបាច់ប្រើប្រាស់។ អាល្លឺម៉ង់ក៏កំពុងពន្លឿនការសាងសង់ស្ថានីយទទួលឧស្ម័នធម្មជាតិរាវ ដើម្បីនាំចូលឧស្ម័នធម្មជាតិពីប្រភពផ្សេងពីរុស្ស៊ី។ នេះគឺវិធានការរបស់ប្រទេសដែលនាំមុខគេក្នុងការបង្វែរទៅរកប្រភពថាមពលកកើតវិញ។
ប្រទេសដទៃទៀត ដូចជាប៉ូឡូញ ដែល ៧០ ភាគរយនៃតម្រូវការថាមពលរបស់ពួកគេត្រូវបានបំពេញដោយធ្យូងថ្ម បានលើកឡើងថាកង្វះថាមពលនៅពេលថ្មីៗនេះគឺជាភ័ស្តុតាងដែលបង្ហាញថា ការបិទអណ្ដូងរ៉ែនេះ គឺជាកំហុស។
យ៉ាងណាមិញ ក្នុងកម្រិតណាមួយទ្វីបអឺរ៉ុប បានក្លាយជាមន្ទីរពិសោធន៍ឈានមុខគេសម្រាប់ការសាកល្បងនៃការផ្លាស់ប្ដូរប្រភពថាមពល។ សហភាពអឺរ៉ុបបានអនុម័តពន្ធលើការបញ្ចេញកាបូនចាប់តាំងពី ២០ ឆ្នាំមុនមកម្ល៉េះ។ ពួកគេបានត្រួសត្រាយផ្លូវសម្រាប់ប្រព័ន្ធជួញដូរឥណទាននៃការបញ្ចេញឧស្ម័នផ្ទះកញ្ចក់ ដែលកំណត់កម្រិតឧស្ម័នបញ្ចេញឧស្ម័នផ្ទះកញ្ចក់ហើយបង្កើតទីផ្សារ ដើម្បីជួញដូរកម្រិតនេះ។ វិធានការនេះបានធ្វើឱ្យឧស្សាហកម្មបង្កការបំពុលច្រើនបំផុត ដូចជាឧស្សាហកម្មចម្រាញ់ដែក និងស៊ីម៉ងត៍ ធ្វើការសម្អាត។
ពួកគេក៏នាំមុខគេក្នុងវិស័យស្ថានីយថាមពលខ្យល់នៅតាមឆ្នេរសមុទ្រ។ បន្ថែមពីលើនេះអឺរ៉ុបកំពុងត្រៀមវិនិយោគប្រាក់រាប់ពាន់លានទៅលើគម្រោងប្រើប្រាស់ឧស្ម័នអ៊ីដ្រូហ្ស៊ែន ជាមធ្យោបាយសម្រាប់ស្តុកទុក ឬដឹកជញ្ជូនថាមពលផលិតដោយមធ្យោបាយកកើតវិញដូចជាខ្យល់។
បើទោះជាយ៉ាងនេះក៏ដោយមធ្យោបាយទាំងនេះ គឺនៅប្រឈមនឹងឧបសគ្គបច្ចេកទេស ហិរញ្ញវត្ថុ និយតកម្ម និងនយោបាយនៅឡើយទេ។ សមត្ថភាពដើម្បីផលិតថាមពលក្នុងតម្លៃទាបដោយមធ្យោបាយទាំងនេះ រួមជាមួយការស្តុកទុក និងដឹកជញ្ជូនឥន្ធនៈថ្មីដូចជាអ៊ីដ្រូហ្ស៊ែនសម្រាប់ប្រើប្រាស់ក្នុងយានយន្ត គឺនឹងត្រូវចំណាយពេលជាច្រើនឆ្នាំទៀត។ បន្ថែមពីលើនេះទៅទៀតក្រុមហ៊ុនថាមពលកកើតវិញជាច្រើននៅប្រឈមនឹងបញ្ហាប្រាក់ចំណេញនៅឡើយ ហើយរំពឹងយ៉ាងខ្លាំងលើឧបត្ថម្ភធនពីរដ្ឋាភិបាល។
ឧបសគ្គទាំងនេះរួមជាមួយសម្ពាធពីការប្រែប្រួលអាកាសធាតុបានបង្ខំឱ្យរដ្ឋាភិបាលមួយចំនួនពិចារណាប្រើប្រាស់មធ្យោបាយដែលពួកគេមិនចង់ធ្វើកាលពីមុន។
អាល្លឺម៉ង់បាននិយាយថា ការបន្តដំណើរការរោងចក្រថាមពលនុយក្លេអ៊ែរនៅសល់ចំនួន ៣ របស់ខ្លួនហួសឆ្នាំនេះ គឺត្រូវចំណាយច្រើនពេក។ ប៉ុន្តែប្រភពថាមពលនុយក្លេអ៊ែរបានឃើញមានការរស់ឡើងវិញនៅប្រទេសផ្សេង។
ចក្រភពអង់គ្លេស និងបារាំង បាននិយាយថា ពួកគេកំពុងគ្រោងវិនិយោគលើម៉ាស៊ីនប្រតិកម្មនុយក្លេអ៊ែរតូចជាងមុន ដែលអាចផលិតក្នុងចំនួនច្រើនជាងមុន ដើម្បីបំពេញចន្លោះប្រហោងនៃការផ្គត់ផ្គង់របស់ខ្លួន។
ក្នុងរយៈពេលខ្លី ភាគច្រើននៃអ្វីដែលសហភាពអឺរ៉ុបកំពុងស្នើឡើងពាក់ព័ន្ធនឹងការប្ដូរប្រភពផ្គត់ផ្គង់ឥន្ធនៈហ្វូស៊ីល ជាពិសេសឧស្ម័នធម្មជាតិពីប្រទេសរុស្ស៊ីបែរទៅរកអ្នកផ្គត់ផ្គង់ផ្សេងទៀតដូចជាសហរដ្ឋអាមេរិក កាតា និងអាស៊ែបៃហ្សង់ ហើយបំពេញឃ្លាំងស្តុកទុករបស់ខ្លួនជាបម្រុង។ ហានិភ័យធំបំផុតនៃសកម្មភាពរបស់អឺរ៉ុប គឺការបង្កើនតម្លៃបន្ថែមទៀត ដែលខ្ពស់ជាងឆ្នាំមុនប្រហែល ៥ ដងរួចទៅហើយ នៅក្នុងទីផ្សារដែលការផ្គត់ផ្គង់ខ្វះខាតដោយសារក្រុមហ៊ុននានាមានការប្រុងប្រយ័ត្នក្នុងការវិនិយោគលើប្រេងឥន្ធនៈដែលពិភពលោកចង់បញ្ចប់ប្រើប្រាស់។
ក្នុងរយៈពេលវែងជាងនេះ អឺរ៉ុប និងចក្រភពអង់គ្លេសហាក់ដូចជាចង់ពន្លឿនដំណើរការឈានមុខគេលើពិភពលោករបស់ពួកគេនៅក្នុងវិស័យថាមពលកកើតឡើងវិញ និងការខិតខំប្រឹងប្រែងផ្សេងទៀតដើម្បីកាត់បន្ថយការបញ្ចេញឧស្ម័នផ្ទះ បើទោះបីជាត្រូវមានការចំណាយដ៏ច្រើន និងការរំខានខ្លាំងក៏ដោយ៕