សេតវិមានបានបង្ហាញសញ្ញាថា សហរដ្ឋអាមេរិកនិងសម្ព័ន្ធមិត្តអឺរ៉ុបរបស់ខ្លួន មានបំណងបង្កើនការដាក់ទណ្ឌកម្មលើរុស្ស៊ីនៅសប្ដាហ៍នេះ ខណៈពេលដែលខ្លួននិយាយថា សង្គ្រាមនៅទឹកដីអ៊ុយក្រែន «នឹងមិនបញ្ចប់ដោយងាយឬឆាប់រហ័សឡើយ»។
ទីប្រឹក្សាសន្តិសុខអាមេរិកលោកជេក ស៊ួលីវ៉ាន់ បាននិយាយថា លោកចូបៃដិនគ្រោងនឹងប្រកាសវិធានការទាំងនេះក្នុងអំឡុងពេលដំណើរទស្សនកិច្ចទៅកាន់ទ្វីបអឺរ៉ុបដែលចាប់ផ្ដើមនៅទីក្រុងប្រ៊ុចសែលដោយប្រធានាធិបតីអាមេរិករូបនេះគ្រោងជួបជាមួយដៃកូណាតូនិងចូលរួមកិច្ចប្រជុំក្រុមប្រឹក្សាអឺរ៉ុបនិងកិច្ចប្រជុំកំពូលនៃក្រុមប្រទេសអ្នកមាន G7។
លោកស៊ូលីវ៉ាន់និយាយថា៖ «លោកប្រធានាធិបតីនឹងចូលរួមជាមួយដៃគូរបស់យើងក្នុងការដាក់ទណ្ឌកម្មបន្ថែមទៀតលើប្រទេសរុស្ស៊ីហើយរឹតបន្តឹងទណ្ឌកម្មដែលមានស្រាប់ដើម្បីបង្ក្រាបការគេចវេះនិងធានាការអនុវត្តដ៏រឹងមាំ»។បើទោះជាយ៉ាងនេះក៏ដោយលោកស៊ូលីវ៉ាន់បានបដិសេធមិនបញ្ជាក់ថាវិធានការដាក់ទណ្ឌកម្មបន្ថែមនឹងរួមមានអ្វីខ្លះទេ។
យ៉ាងណាមិញលោកស៊ូលីវ៉ាន់និយាយថា លោកបៃដិន នឹងពិភាក្សាអំពីការកែសម្រួលរយៈពេលវែងចំពោះវត្តមានរបស់ណាតូនៅក្នុងផ្នែកខាងកើតរបស់អឺរ៉ុបក៏ដូចជាសកម្មភាពរួមគ្នាលើការពង្រឹងសន្តិសុខថាមពលក្នុងតំបន់និងកាត់បន្ថយការពឹងផ្អែកលើការនាំចូលឧស្ម័នរបស់រុស្ស៊ី។
លោកបៃដិនក៏នឹងធ្វើដំណើរទៅកាន់ប្រទេសប៉ូឡូញ ដោយនៅទីនោះលោកជួបសំណេះសំណាលជាមួយទាហានអាមេរិកដែលដាក់ពង្រាយក្នុងបេសកកម្មរបស់ណាតូ៕