.jpg)
លោកនាយករដ្ឋមន្ត្រីប៉ូឡូញ Mateusz Morawiecki ធ្វើសន្និសីទកាសែត។ AFP
កាលពីថ្ងៃពុធ ប្រទេសប៉ូឡូញ បានបញ្ជាឱ្យបណ្ដេញជនជាតិរុស្ស៊ីចំនួន ៤៥ នាក់ ដែលរដ្ឋាភិបាលសង្ស័យថា ជាមន្ត្រីទីភ្នាក់ចារកម្មដោយបានប្រើប្រាស់ឋានៈជាមន្ត្រីការទូត ដើម្បីបិទបាំងប្រតិបត្តិការនៅក្នុងប្រទេសប៉ូឡូញ។
ទីភ្នាក់ងារសន្តិសុខផ្ទៃក្នុងរបស់ ប្រទេសប៉ូឡូញ បាននិយាយថា ខ្លួនបានស្នើសុំឱ្យក្រសួងការបរទេសដកជនជាតិរុស្ស៊ីទាំងនេះជាបន្ទាន់ ដែលត្រូវបានពិពណ៌នាថា ជាគ្រោះថ្នាក់ដល់សន្តិសុខរបស់ប្រទេសប៉ូឡូញ។
លោក Stanislaw Zaryn អ្នកនាំពាក្យភ្នាក់ងារសន្តិសុខប៉ូឡូញបាននិយាយថា៖ «មនុស្សទាំងនេះហើយដែលបានធ្វើប្រតិបត្តិការដោយប្រើឋានៈការទូតរបស់ពួកគេ ប៉ុន្តែតាមពិតធ្វើសកម្មភាពចារកម្មប្រឆាំងនឹងប៉ូឡូញ»។
ក្រសួងការបរទេសប្រទេសនេះ បានកោះហៅឯកអគ្គរដ្ឋទូតរុស្ស៊ីលោក Sergei Andreev និងផ្ដល់លិខិតជូនដំណឹងមួយឱ្យលោកស្ដីអំពីការបណ្ដេញបុគ្គលិក ៤៥ នាក់ នៃស្ថានទូត និងបេសកកម្មពាណិជ្ជកម្មរបស់រុស្ស៊ីទៅកាន់ប្រទេសប៉ូឡូញ។
លោក Andreev មិនមែនជាមនុស្សម្នាក់ស្ថិតក្នុងចំណោមអ្នកដែលត្រូវបានបណ្តេញចេញនោះទេ ហើយលោកក៏បានរិះគន់ការសម្រេចចិត្តនេះដោយប្រាប់អ្នកសារព័ត៌មានបន្ទាប់ពីកិច្ចប្រជុំថា អ្នកដែលត្រូវបានបណ្តេញចេញពីប្រទេសប៉ូឡូញកំពុងអនុវត្តសកម្មភាពការទូត និងពាណិជ្ជកម្មធម្មតា។ លោកបាននិយាយថា រុស្ស៊ីមានសិទ្ធិឆ្លើយតបតាមមូលដ្ឋានទៅវិញទៅមក។
អ្នកនាំពាក្យក្រសួងការបរទេសប៉ូឡូញលោក Lukasz Jasina បាននិយាយថា ជនជាតិរុស្ស៊ីទាំងនេះត្រូវបានផ្ដល់ពេល ៧ ថ្ងៃ ដើម្បីចាកចេញពីប្រទេសលើកលែងតែបុរសម្នាក់ ដែលត្រូវចាកចេញក្នុងរយៈពេល ៤៨ ម៉ោង ដោយសារគាត់អាចបង្កគ្រោះថ្នាក់ជាងគេ។ លោក Jasina មិនបានបញ្ជាក់ថា ហេតុអ្វីបានជាបុគ្គលទាំងនេះរងការចោទប្រកាន់ចារកម្មទេ ប៉ុន្តែបន្តនិយាយថា ពួកគេបង្កហានិភ័យដល់សន្តិសុខប៉ូឡូញ៕
វីដេអូ៖
