កាលពីថ្ងៃពុធ ទី ២៣ ខែមីនា រដ្ឋមន្ត្រីការបរទេសអាមេរិក លោក អាន់តូនី ប្ល៊ីនកែន បាននិយាយថា សហរដ្ឋអាមេរិកបានវាយតម្លៃថា កងកម្លាំងរុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅអ៊ុយក្រែន ហើយនឹងធ្វើការដើម្បីពួកគេទទួលខុសត្រូវកំហុស។
ក្នុងសេចក្ដីថ្លែងការណ៍មួយលោក ប្លីនកែន និយាយថា៖ «ថ្ងៃនេះ ខ្ញុំអាចប្រកាសដោយផ្អែកលើព័ត៌មានដែលមាននាពេលបច្ចុប្បន្ន រដ្ឋាភិបាលសហរដ្ឋអាមេរិកវាយតម្លៃថា សមាជិកនៃកងកម្លាំងរុស្ស៊ីបានប្រព្រឹត្តឧក្រិដ្ឋកម្មសង្គ្រាមនៅអ៊ុយក្រែន»។
លោកប្ល៊ីនកែន បានលើកឡើងអំពីរបាយការណ៍ឧប្បត្តិហេតុជាច្រើននៅក្រុងម៉ារីអូប៉ូល ដូចជាការទម្លាក់គ្រាប់បែកលើមន្ទីរសម្ភព និងការវាយប្រហារលើសាលមហោស្រព ដែលជាកន្លែងជ្រកកោណជនស៊ីវិល ដែលមានការសរសេរនៅខាងយ៉ាងច្បាស់នៅពីខាងក្រៅថា «កុមារ»។
លោកចោទប្រកាន់រុស្ស៊ីថា បានប្រើប្រាស់យុទ្ធសាស្ត្រឃោរឃៅ ដូចក្នុងការកម្ទេចក្រុងហ្គ្រូហ្សីនី ឆេឆិនី និងក្រុងអាលេប៉ូ ប្រទេសស៊ីរី ដើម្បី «បំបែកឆន្ទៈរបស់ប្រជាជន»។
ការលើកឡើងរបស់លោក ប្ល៊ីនកែន បែបនេះបានកើតឡើងប៉ុន្មានថ្ងៃ បន្ទាប់ពីក្រសួងការពារជាតិអាមេរិកនិយាយថា ពួកគេបានឃើញ «ភ័ស្តុតាងយ៉ាងច្បាស់ថា ក្នុងរយៈពេល ១ សប្ដាហ៍ចុងក្រោយនេះ រុស្ស៊ីបានកំណត់គោលដៅដោយចេតនាលើហេដ្ឋារចនាសម្ព័ន្ធស៊ីវិល។
លោក ប្ល៊ីនកែន និងលោកប្រធានាធិបតី ចូ បៃដិន បានធ្វើដំណើរទៅកាន់ក្រុងប្រ៊ុចសែល ដើម្បីចូលរួមក្នុងកិច្ចប្រជុំវិសាមញ្ញរបស់អង្គការណាតូ។ អគ្គលេខាធិការអង្គការណាតូ លោកជេន ស្តូលតេនប៊ឺក និយាយថា ប្រធានាធិបតីអ៊ុយក្រែន លោក វ៉ុឡូឌីមៀរ ហ្សេលេស្គី គ្រោងថ្លែងសុន្ទរកថានៅកិច្ចប្រជុំនេះ៕