អ្នកនាំពាក្យក្រសួងការបរទេសរុស្ស៊ីបាននិយាយថា ស្ថានទូតសហរដ្ឋអាមេរិកនៅទីក្រុងម៉ូស្គូ កាលពីថ្ងៃពុធ បានទទួលបញ្ជីឈ្មោះអ្នកការទូតរបស់ខ្លួនដែលត្រូវបានប្រកាសថា ជាជនមិនត្រូវបានស្វាគមន៍ (persona non grata) នៅក្នុងអ្វីដែលប្រព័ន្ធផ្សព្វផ្សាយរុស្ស៊ីបាននិយាយថា ជាការឆ្លើយតបទៅនឹងសកម្មភាពរបស់សហរដ្ឋអាមេរិក ដែលបណ្ដេញបុគ្គលិកការទូតរុស្ស៊ីនៅអង្គការសហប្រជាជាតិ។
ក្រុងវ៉ាស៊ីនតោន កាលពីខែមុនបាននិយាយថា ខ្លួនកំពុងបណ្ដេញអ្នកការទូតរុស្ស៊ី ១២ នាក់ នៅបេសកកម្មអង្គការសហប្រជាជាតិក្នុងទីក្រុងញូវយ៉ក ជុំវិញបញ្ហាសន្តិសុខជាតិ ហើយក្រោយមកបានប្រកាសថា ខ្លួននឹងបណ្ដេញជនជាតិរុស្ស៊ីបន្ថែមនៅអង្គការសហប្រជាជាតិ ដែលខ្លួនបាននិយាយថា ជាភ្នាក់ងារចារកម្ម។
ទីភ្នាក់ងារព័ត៌មាន Interfax បាននិយាយថា ប្រទេសរុស្ស៊ី ដែលច្រានចោលការចោទប្រកាន់នោះបានប្រាប់សហរដ្ឋអាមេរិកកាលពីថ្ងៃពុធថា ខ្លួននឹងបណ្ដេញអ្នកការទូតអាមេរិកមួយចំនួន ដើម្បីឆ្លើយតបនឹងការបណ្ដេញចេញបុគ្គលិករុស្ស៊ីនៅអង្គការសហប្រជាជាតិ។
អ្នកនាំពាក្យក្រសួងការបរទេសអាមេរិកមួយរូបបាននិយាយថា៖ «យើងអាចបញ្ជាក់បានថា ស្ថានទូតអាមេរិកបានទទួលបញ្ជីអ្នកការទូតដែលបានប្រកាសថា ជាជនមិនត្រូវបានស្វាគមន៍ពីក្រសួងការបរទេសរុស្ស៊ីនៅថ្ងៃទី ២៣ ខែមីនា»។
អ្នកនាំពាក្យនេះបាននិយាយថា៖ «នេះ គឺជាជំហានដែលមិនមានប្រយោជន៍ និងគ្មានផលិតភាពចុងក្រោយបង្អស់របស់រុស្ស៊ីក្នុងទំនាក់ទំនងទ្វេភាគីរបស់យើង។ ឥឡូវនេះ វាកាន់តែមានសារៈសំខាន់ដែលប្រទេសរបស់យើងមានបុគ្គលិកការទូតចាំបាច់សម្រាប់ជួយសម្រួលដល់ការទំនាក់ទំនងរវាងរដ្ឋាភិបាលរបស់យើង»។
ទាំងអ្នកនាំពាក្យ និងទីភ្នាក់ងារព័ត៌មាន Interfax មិនបានបញ្ជាក់ពីចំនួនមនុស្សដែលរងផលប៉ះពាល់ ឬ ពេលណាដែលពួកគេនឹងត្រូវចាកចេញនោះទេ៕
វីដេអូ៖