.jpg)
លោក វ្ល៉ាឌីមៀរ ពូទីន (ឆ្វេង) និងលោក ស៊ី ជីនភីង ក្នុងអំឡុងជំនួបនៅទីក្រុងប៉េកាំង។ AFP
ជំនួបកំពូលកាលពីដើមខែកុម្ភៈ រវាងប្រធានាធិបតីរុស្ស៊ី លោក វ្ល៉ាឌីមៀរ ពូទីន និងសមភាគីចិនលោក ស៊ី ជីនភីង ក្នុងអំឡុងព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំង ឆ្នាំ ២០២២ កើតឡើងចំពេលរុស្ស៊ី កំពុងមានវិបត្តិទំនាក់ទំនងជាមួយលោកខាងលិច។ បន្ទាប់ពីជំនួបនេះ ពួកគេបានប្រកាសថា ភាពជាដៃគូរវាងប្រទេសទាំង ២ គឺ «គ្មានដែនកំណត់»។ តើកិច្ចសហប្រតិបត្តិការស្អិតល្មួតរវាងរុស្ស៊ី និងចិន ពិតជាគ្មានព្រំដែនកំណត់ឬយ៉ាងណា?
ជំនួបកំពូលខាងលើនេះ បានគូសបញ្ជាក់ពីបំណងរួមក្នុងការពង្រឹងកិច្ចសហប្រតិបត្តិការឱ្យកាន់តែស៊ីជម្រៅ ដោយផ្ដោតលើភូមិសាស្ត្រនយោបាយ និងថាមពល។
ចិនបានបង្ហាញក្ដីព្រួយបារម្ភផ្នែកសន្តិសុខរបស់រុស្ស៊ីជាមួយអង្គការណាតូ ប៉ុន្តែមិនមានឃើញជាវិធានការណាបន្ថែមធ្វើឡើង ដើម្បីឆ្លើយតបនឹងការព្រួយបារម្ភទាំងនេះទេ។
ប្រទេសចិន បានសម្ដែងការយល់ស្របចំពោះគោលនយោបាយរបស់ទីក្រុងម៉ូស្គូ ចំពោះអង្គការណាតូ និងលោកខាងលិច ដោយសារតែប្រទេសទាំង ២ មានក្ដីព្រួយបារម្ភរួមគ្នាមួយ គឺគោលនយោបាយរបស់សហរដ្ឋអាមេរិក។
សេចក្ដីថ្លែងការណ៍រួមរុស្ស៊ី-ចិន បានប្រកាសថា ទំនាក់ទំនងប្រទេសទាំង ២ លើសពីសម្ព័ន្ធភាពទៅទៀតហើយកិច្ចសហប្រតិបត្តិការនេះ មិនមានព្រំដែនទេ។ រដ្ឋទាំង ២ បានបង្ហាញការគាំទ្រផ្នែកការទូត និងនយោបាយសម្រាប់គ្នាទៅវិញទៅមក ដើម្បីពង្រីកជំហរអន្តរជាតិរបស់ពួកគេប្រឆាំងនឹងភាពចលាចលសកល និងក្នុងតំបន់។ កិច្ចប្រជុំកំពូលបង្ហាញពីការបង្កើនតុល្យភាព និងភាពស្មើគ្នារវាងទីក្រុងម៉ូស្គូ និងទីក្រុងប៉េកាំង ប៉ុន្តែជំហាននេះ បានធ្វើឱ្យមានការផ្លាស់ប្ដូរយ៉ាងខ្លាំងនៅក្នុងទំនាក់ទំនងប្រទេសទាំង ២។
សេចក្ដីថ្លែងការណ៍ថ្មីៗនេះ បាននិយាយថា ចិនបានឈរជើងជាមួយជំហររបស់រុស្ស៊ីប្រឆាំងនឹងការពង្រីកអង្គការណាតូ។ ប្រទេសចិន គោរព និងគាំទ្រសំណើរបស់រុស្ស៊ីសម្រាប់ការធានាសន្តិសុខរយៈពេលវែងស្របច្បាប់នៅក្នុងទ្វីបអឺរ៉ុប។
ជាជាងការចូលទៅក្នុងសម្ព័ន្ធភាពយោធាពេញលេញទីក្រុងម៉ូស្គូ និងប៉េកាំង ទំនងអាចធ្វើឱ្យប្រសើរឡើងនូវកិច្ចសហប្រតិបត្តិការសន្តិសុខរបស់ពួកគេ និងធ្វើឱ្យប្រសើរឡើងនូវអន្តរប្រតិបត្តិការ ដោយគ្មានកាតព្វកិច្ចផ្លូវការណាមួយឡើយ។ រុស្ស៊ីមិនចង់ចូលរួមក្នុងជម្លោះជាច្រើនរបស់ចិននៅអាស៊ីទេ ហើយចូលចិត្តរក្សាជំហរអព្យាក្រឹត។ ដូចគ្នាដែរ ចំពោះជម្លោះរបស់ចិន និងរុស្ស៊ី ជាមួយអង្គការណាតូ ទីក្រុងប៉េកាំងផ្ដល់តម្លៃដល់កិច្ចសហប្រតិបត្តិការសេដ្ឋកិច្ចរបស់ខ្លួនជាមួយអឺរ៉ុប និងអាមេរិក ហើយគ្មានបំណងចង់ជាប់ក្នុងជម្លោះអ៊ុយក្រែនទេ។
វិបត្តិយោធានៅអ៊ុយក្រែនធ្វើឱ្យចិនស្ថិតក្នុងស្ថានភាពលំបាក ខណៈដែលខ្លួនព្យាយាមចៀសវាងទាំងការយល់ព្រមឬថ្កោលទោសសកម្មភាពរបស់ទីក្រុងម៉ូស្គូ ដោយបញ្ជាក់ពីដំណោះស្រាយដោយសន្តិវិធី ទាំងការបដិសេធមិនរិះគន់រុស្ស៊ី ឬហៅសកម្មភាពរបស់ប្រទេសនេះថា ជាការឈ្លានពាន ទាំងការប្រឆាំងទណ្ឌកម្មរបស់លោកខាងលិច និងបន្ទោសសហរដ្ឋអាមេរិកចំពោះការបរាជ័យក្នុងការអនុវត្តកិច្ចព្រមព្រៀងទីក្រុង Minsk។
សេចក្តីថ្លែងការណ៍ទាំងនេះតំណាងឱ្យការយល់ដឹងរបស់ចិនចំពោះសកម្មភាពរបស់រុស្ស៊ី ប៉ុន្តែមិនមែនជាសញ្ញានៃការគាំទ្រដោយផ្ទាល់ ឬអ្វីផ្សេងទៀតក្រៅពីសុច្ឆន្ទៈការទូតនោះទេ។ វានៅតែត្រូវបានគេមើលឃើញថា តើការគាំទ្រផ្នែកសេដ្ឋកិច្ច ប៉ុន្មានដែលចិននឹងមានឆន្ទៈក្នុងការផ្តល់ ឱ្យរុស្ស៊ី និងរបៀបដែលវានឹងដោះស្រាយជាមួយអង្គភាពរុស្ស៊ីក្រោមការដាក់ ទណ្ឌកម្មរបស់អាមេរិក និងអឺរ៉ុប ដោយពិចារណាលើសារៈសំខាន់ដ៏ធំនៃកិច្ចសហប្រតិបត្តិការសេដ្ឋកិច្ចរបស់ខ្លួនជាមួយលោកខាងលិច និងការប្រឈមនៃទណ្ឌកម្មបន្ទាប់បន្សំដែលខ្លួនតែងចៀសវាង៕
វីដេអូ៖
