កាលពី​ថ្ងៃ​សៅរ៍ ទី ​២៦ មីនា ​ប្រ​ធានា​ធិបតី​អាមេរិក ​លោក ​ចូ បៃ​ដិ​ន បាន​និយាយថា ប្រធានាធិបតី​រុស្ស៊ី​ លោក​ វ្ល៉ា​ឌី​មៀរ ពូ​ទីន «​មិនអាចបន្ត​កាន់អំណាច​បានទេ​» ហើយ​ប្រកាសថា ការ​លុកលុយ​របស់​រុស្ស៊ី​ចូល​អ៊ុយ​ក្រែ​ន «​ការបរាជ័យ​ជា​យុទ្ធសាស្ត្រ​» ខណៈដែល​លោក​ប្ដេជ្ញា​បន្ត​ផ្ដល់ជំនួយ​ឱ្យ​អ៊ុយ​ក្រែ​ន​។​

​ក្នុងការ​ថ្លែង​សុន្ទរកថា នៅ​ក្រុង​វ៉ា​សូវី ប្រទេស​ប៉ូឡូញ លោក​ បៃ​ដិ​ន ​បាន​និយាយថា​៖ «​សម្រាប់​ជា​ប្រ​យោជន៍​របស់​ព្រះ បុរស​នេះ មិនអាច​បន្ត​កាន់អំណាច​បានទេ​»​។​

​នេះ​គឺ​ហាក់បីដូចជា​លើកដំបូង​ដែល​លោក​ បៃ​ដិ​ន បានទាមទារ​យ៉ាងច្បាស់​ឱ្យមាន​ការដក​លោក ពូ​ទីន ​ចេញពី​អំណាច ហើយ​ផ្ទុយស្រឡះ​ពី​ការលើកឡើង​មុនៗ​របស់​សេត​វិមាន ដែល​បាន​សង្កត់ធ្ងន់ថា ការផ្លាស់ប្ដូរ​របប​ដឹកនាំ​រុស្ស៊ី គឺ​មិន​​មែន​គោលនយោបាយ​របស់​សហ​​រដ្ឋ​អាមេរិក​ទេ​។ ភ្លាមៗ​បន្ទាប់ពី​ការ​​លើកឡើង​របស់លោក​ បៃ​ដិ​ន ​សេត​វិមាន​បាន​ច្រានចោល​ថា លោក បៃ​ដិ​ន ​មិន​ទាមទារ​ឱ្យមាន​ការ​ផ្លាស់ប្ដូរ​របប​ទេ​។​

​មន្ត្រី​សេត​វិមាន​ ១​ រូប​បាន​និយាយថា​៖ «​ចំណុច​គោល​របស់លោក​ប្រធានាធិបតីគឺថា លោក ពូ​ទីន គឺ​មិនអាច​អនុញ្ញាត​ប្រើ​អំណាច​លើ​ប្រទេសជិតខាង ឬ​តំបន់​ទេ​។ លោក​មិនបាន​ពិភាក្សា​អំពី​អំណាច​លោក ពូ​ទីន​ នៅក្នុង​រុស្ស៊ី ឬ​ការផ្លាស់ប្ដូរ​របប​នោះទេ​»​។​

​យ៉ាងណាមិញ ការលើកឡើង​បែបនេះ បានធ្វើ​ឡើង​នៅ​ផ្នែក​ចុងក្រោយ​នៃ​ការ​ថ្លែង​សុន្ទរកថា​មួយ​ដែល​លោក​ បៃ​ដិ​ន ​ព្យាយាម​សង្កត់ធ្ងន់​លើ​សារៈ​សំខាន់​នៃ​សកម្មភាព​រួម ដោយ​គូស​​បញ្ជាក់​ទាំង​ជំនួយ​ផ្ដល់ឱ្យ​អ៊ុយ​ក្រែ​ន និង​ការដាក់ទណ្ឌកម្ម​ដែល​បាន​វាយ​លុក​សេដ្ឋកិច្ច​រុស្ស៊ី ដែល​បានធ្វើឱ្យ​ប្រា​ក់រូ​ប្លិ៍​ក្លាយជា​កម្ទេច «Ruble into Rubble»​។ លោក ​បៃ​ដិ​ន ​ក៏បាន​និយាយ​ផងដែរ​ថា «​សង្គ្រាម​នេះ គឺជា​ការបរាជ័យ​ជា​យុទ្ធសាស្ត្រ​សម្រាប់​ប្រទេស​រុស្ស៊ី​ រួចទៅហើយ​» ដោយ​អះអាងថា លោក ពូ​ទីន បាន​គិតថា ប្រជាជន​អ៊ុយ​ក្រែ​ន «​នឹង​រាថយ ហើយ​មិន​តដៃ​»៕

វីដេអូ៖