៤ ​ថ្ងៃ ​បន្ទាប់ពី​លោក​ វ្ល៉ា​ឌី​មៀរ​ ពូ​ទីន បញ្ជា​ឱ្យ​ចាប់ផ្ដើម​ការ​លុក​​លុយ​ចូល​ប្រទេស​អ៊ុយ​ក្រែ​ន ​ទា​ហាន​រុស្ស៊ីបាន​ចូល​កាន់កាប់​ក្រុង​ម៉ា​ការី​វ ប្រមាណ ៦៥ គីឡូម៉ែត្រ​ពី​រដ្ឋធានី​កៀវ​។ ប៉ុន្តែ​នៅ​សប្ដាហ៍​នេះ​ កងកម្លាំង​អ៊ុយ​ក្រែ​ន​បាន​ប្រ​កាស​ថា ​ពួកគេ​បាន​ចូលកាន់​កាប់​ក្រុង​ម៉ា​ការី​វ​ឡើងវិញ​ហើយ ក្នុងការ​វាយប្រហារ​ត​បត​វិញ​ធ្វើឱ្យ​ទាហាន​រុស្ស៊ី​ដកថយ​។​

​វីដេអូ​បង្ហោះ​លើ​បណ្ដាញ​សង្គម Facebook ដោយ​អគ្គស្នងការ​ប៉ូលិស​រដ្ឋធានី​កៀវ​ បង្ហាញ​ទិដ្ឋភាព​ខូចខាត និង​បោះបង់ចោល​នៃ​ក្រុង​ម៉ា​ការី​វ​។ ១ ​ថ្ងៃ​ក្រោយមក ក្រសួងការពារជាតិ​អ៊ុយ​ក្រែ​ន បានប្រកាសថា​៖ «​ទង់ជាតិ​អ៊ុយ​ក្រែ​នប​ង្ហោះ​លើ​ក្រុង​ម៉ា​ការី​វ​សត្រូវ ត្រូវបាន​រុញចេញ​»​។​

​រឿង ​«​រំដោះ​»​ នេះ​ត្រូវបាន​ផ្សព្វ​ផ្សាយ​ពេញ​បណ្ដាញ​សង្គម ហើយ​សារព័ត៌មាន​មួយចំនួន​បាន​រាយ​ការណ៍​ថា ​កងទ័ព​រុស្ស៊ី​ពិតជា​បាន​ដកថយ​ចេញពី​ក្រុង​នេះ​ពិតមែន​។ ប៉ុន្តែ​រឿងនេះ គឺ​ហាក់ដូចជា​មិន​ពិត ខណៈពេលដែល​អភិបាល​ក្រុង​ម៉ា​ការី​វ​ លោក​ វ៉ា​ឌី​ម​តូ​កា ​និយាយថា កងទ័ព​រុស្ស៊ី​នៅ​គ្រប់គ្រង ​១ ​ភាគ ​៦ ​នៃ​ក្រុង​នេះ​។​

​នៅ​ប្រទេស​អ៊ុយ​ក្រែ​ន ​សង្គ្រាមចំនួន​ ២ កំពុង​កើតឡើង​ គឺ​សង្គ្រាម​ពិត និង​សង្គ្រាម​ព័ត៌មាន​។​

​បើទោះជា​យ៉ាងនេះ​ ក៏ដោយ​រឿង​របស់​ក្រុង​ម៉ា​ការី​វ បានបង្ហាញ​ទិ​ដ្ឋ​​ភាព​ដ៏​ច្បាស់​មួយ​អំពី​សង្គ្រាម​នេះ ​១ ​ខែ បន្ទាប់ពី​ការបញ្ជា​របស់​លោក ពូ​ទីន នោះ​គឺ​ភាគី​ទាំង​ ២ មិនមាន​​ប្រៀប​លើ​ភាគី​មួយទៀត​ទេ ហើយ​ការ​លុកលុយ​រន្ទះ​បាន​នៅ​ទ្រឹង​ និង​កំពុង​ប្រែ​ក្លាយទៅជា​សង្គ្រាម​សំ​​ណឹ​ក (War of Attrition)​។​

​កងទ័ព​រុស្ស៊ី ដែល​ជាង​កងទ័ព​ធំជាងគេ​នៅ​អឺរ៉ុប បាន​ប្រឈម​នឹង​បញ្ហា​ខ្សែចង្វាក់​ផ្គត់ផ្គង់ កំហុស​យុទ្ធសាស្ត្រ ភាព​ធ្លាក់​ទឹកចិត្ត​ក្នុងចំណោម​ទាហាន និង​ការ​តដៃ​យ៉ាងខ្លាំង​ក្លា​ដោយ​កងកម្លាំង​អ៊ុយ​ក្រែ​ន​។ នៅក្នុង​រយៈពេល​ប៉ុន្មាន​ថ្ងៃ​ចុង​ក្រោយនេះ កងទ័ព​រុស្ស៊ី​មាន​សភាព​ជាប់​ទ្រឹង​មិន​ទៅមុខ​នៅ​សមរភូមិ​ជាច្រើន​ក្នុងប្រទេស​អ៊ុយ​ក្រែ​ន​។ កងទ័ព​រុស្ស៊ី បាន​បង្វែរ​ទៅប្រើ​ប្រាស់​មធ្យោបាយ​វាយប្រហារ​ពី​ចម្ងាយ​ឆ្ងាយ​ដូចជា​ការទម្លាក់​គ្រាប់បែក ការបាញ់​កាំភ្លើង​ធំ និង​ការបាញ់​មី​ស៊ី​ល ដែល​បង្ក​ផលប៉ះពាល់​យ៉ាងខ្លាំង​ដល់​ជន​ស៊ីវិល​នៅ​ទីក្រុង​ធំៗ​។​

​ភាពជាប់គាំង​នេះ គឺ​ហាក់ដូច​​ជា​ហេតុផល​ពីក្រោយ​ការសម្រេចចិត្ត​របស់​អគ្គ​បញ្ជាការដ្ឋាន​រុស្ស៊ី​ក្នុងការ​ប្រកាសថា ការ​លុកលុយ​របស់​ពួកគេ​ឈានដល់​ដំណាក់​​កាល​ថ្មី ដោយ​មានការ​បង្វែរ​ម​ក​ផ្ដោត​ចូលកាន់​កាប់​តំបន់​ដុន​បាស​ទាំងមូល ដែលជា​ទីកន្លែង​ទាហាន​អ៊ុយ​ក្រែ​ន​ប្រមាណ ៤០ ០០០ នាក់ កំពុង​ស្ថិតក្រោម​ការឡោមព័ទ្ធ​ដោយ​កងទ័ព​រុស្ស៊ី​។

ឧត្ដមសេនីយ៍​ សឺ​ហ្គេ រូដ​ស្គី ​នាយក​នៃ​នាយកដ្ឋាន​ប្រតិបត្តិការ​នៃ​កងទ័ព​រុស្ស៊ី បាន​និយាយថា យុទ្ធសាស្ត្រ​របស់​ក្រុង​ម៉ូស្គូ​កន្លងមក គឺ​មិនមែន​ដើម្បី​ចូលកាន់​កាប់​ក្រុង​ធំៗ​ទេ ប៉ុន្តែ​ជាការ​បង្វែរ​អារម្មណ៍ និង​ធ្វើឱ្យ​កងកម្លាំង​អ៊ុយ​​ក្រែ​ន​ទន់ខ្សោយ​សម្រាប់ ​«​ការរំដោះ​​ពេញលេញ​» ​នៃ​តំបន់​ដុន​បាស​។​

​អ្នកវិភាគ​មួយចំនួន​និយាយថា ​រុស្ស៊ី​អាចឈាន​ដល់ «​ចំណុច​កំ​ពូ​ល​» នៅពេលដែល​កងទ័ព​មិនអាច​ខិត​ទៅមុខ​ដោយសារ​ការ​ជាប់គាំង​មួយចំនួន​ដូចជា​ការស្លាប់ ការ​របួស ការខូចខាត​ឧបករណ៍ ការ​ហត់នឿយ បញ្ហា​ផ្គត់ផ្គង់​ដែល​អាច​ឈានដល់​ការបរាជ័យ​ក្នុងការ​សម្រេច​គោលដៅ​របស់ខ្លួន​។​

​បន្ថែម​ពីលើ​នេះ​ អ៊ុយ​ក្រែ​ន​បានធ្វើ​ការតបត​វិញ ដែល​ខ្លួន​អះអាងថា បានទទួល​ការជោគជ័យ​យ៉ាង​​ខ្លាំង​ក្នុងការ​បំបែក​ខ្សែប្រយុទ្ធ​របស់​រុស្ស៊ី ហើយ​ធ្វើឱ្យ​ពួកគេ​ដក​​ថយ​វិញ​។ លោកខាងលិច​នៅមាន​ភាពស្ទាក់ស្ទើរ​ក្នុង​ការជួយ​អបអរ​អ៊ុយ​ក្រែ​ន ​ដោយសារ​ពួកគេ​នៅ​មិនទាន់​ច្បាស់​អំពី​ភាពជោគជ័យ​របស់​អ៊ុយ​ក្រែ​ន​នៅឡើយ​ទេ​។​

​កងទ័ព​អ៊ុយ​ក្រែ​ន​នៅ​កម្លាំងចិត្ត ​ដើម្បី​ប្រយុទ្ធ​ប្រឆាំងនឹង​កងទ័ព​រុស្ស៊ី ប៉ុន្តែ​ពួកគេ​កំពុង​ជិត​អស់​អាវុធ និង​គ្រាប់រំសេវ​សម្រាប់ធ្វើ​ការប្រយុទ្ធ​ទាំងនេះ ខណៈពេលដែល​លោកខាងលិច​សន្យា​ផ្គត់​​ផ្គង់​ឱ្យ​បន្ថែមទៀត​។ នេះ​មានន័យថា កងទ័ព​អ៊ុយ​ក្រែ​នអាច​បាត់បង់​សម្ទុះ​ដូច​កងទ័ព​រុស្ស៊ី​ផងដែរ ធ្វើឱ្យមាន​ការព្រួយបារម្ភ ហើយ​សង្គ្រាម​នឹង​អូសបន្លាយ​បន្ថែម​។​

​យ៉ាងណាមិញ លោកខាងលិច​បាន​ព្រមាន​ថា ភាពជាប់គាំង​បែបនេះ អាច​នឹងធ្វើ​រុស្ស៊ី​ចាត់វិធានការ​កាន់តែ​ជ្រុល​ជាង​មុន ដែល​អាច​រួមមាន​ការប្រើប្រាស់​អាវុធ​ប្រល័យ​លោក​។ កាលពី​ថ្ងៃ​ព្រហស្បតិ៍​ អង្គ​​ការ​ណា​តូបាន​បញ្ជាការ​ចល័ត​កងកម្លាំង​ប្រឆាំង​អាវុធ​គីមី ជីវ​​សាស្ត្រ និង​នុយក្លេអ៊ែរ​របស់​ពួក​គេ ហើយ​បាន​បញ្ជូន​ឧបករណ៍​ទប់​ទល់នឹង​ផលប៉ះពាល់​អាវុធ​ប្រល័យ​លោក​ទៅឱ្យ​អ៊ុយ​ក្រែ​ន​។​

​គេ​នៅ​មិនទាន់​ច្បាស់​ថា រុស្ស៊ី​ គឺ​ពិតជា​ដកទ័ព​របស់ខ្លួន​ដើម្បី​ផ្ដោតលើ​តំបន់​ដុន​បាស​មែន ឬក៏​គ្រាន់​ជា​លេស​សម្រាប់​ការជាប់គាំង​ក្នុងការ​លុកលុយ​របស់ខ្លួន​។​

​ប្រមាណ​ ១ ​ភាគ​ ៤ ​នៃ​កងទ័ព​អា​​ជីព​របស់​អ៊ុយ​ក្រែ​ន ​គឺ​ដាក់ពង្រាយ​នៅ​តំបន់​ដុន​បាស ហើយ​ប្រសិនបើ​រុស្ស៊ី​បែរមក​ផ្ដោតលើ​តំបន់​ដុន​បាស នោះ​ការបាត់បង់​កងកម្លាំង និង​ទឹកដី​នេះ គឺជា​ការ​ចាញ់​អា​​ក្រក់​បំផុត​សម្រាប់​អ៊ុយ​ក្រែ​ន ហើយ​អាចជា​ «​ជ័យជម្នះ​» សម្រាប់​លោក ពូ​ទីន នៅពេលដែល​លោក​បង្កើត​ច្រក​ផ្លូវគោក​រវាង​រុស្ស៊ីនឹង​ឧបទ្វីប​គ្រី​មា​៕