.jpg)
លោក ចូ បៃដិន ថ្លែងនៅវិមាន Royal Castle ក្នុងទីក្រុងវ៉ាសូវីកាលពីថ្ងៃទី ២៦ មីនា។ AFP
វាគឺជាប្រយោគចុងក្រោយក្នុងការថ្លែងសុន្ទរកថាចុងក្រោយរបស់ប្រធានាធិបតីអាមេរិក លោក ចូ បៃដិន មុននឹងលោកឡើងយន្តហោះ ដើម្បីធ្វើដំណើរចេញពីទ្វីបអឺរ៉ុបត្រឡប់ទៅអាមេរិកវិញ ជាការតិះដៀលប្រធានាធិបតីរុស្ស៊ី លោក វ្លា៉ឌីមៀរ ពូទីន ជុំវិញភាពឃោរឃៅនៃការលុកលុយប្រទេសអ៊ុយក្រែន។
នៅចុងសប្ដាហ៍ប្រធានាធិបតីអាមេរិករូបនេះ និយាយថា៖ «សម្រាប់ប្រយោជន៍របស់ព្រះ បុរសនេះមិនអាចបន្តកាន់អំណាចទេ»។
ពាក្យសម្តីនេះ គឺនៅចុងសុន្ទរកថាដ៏កាចមួយ នៅក្រុងវ៉ាសូវី នៅចុងបញ្ចប់នៃដំណើរទស្សនកិច្ចរយៈពេល ៣ ថ្ងៃ រៀបចំយ៉ាងប្រញាប់ប្រញាល់ទៅកាន់ប្រទេសប៉ូឡូញ និងបែលហ្ស៊ិក ក្នុងបំណងរក្សាឱ្យសម្ព័ន្ធមិត្តលោកខាងលិចឱ្យរួបរួមគ្នាប្រឆាំងនឹងប្រទេសរុស្ស៊ី។
ប៉ុន្តែត្រឹមព្រឹកថ្ងៃអាទិត្យ រដ្ឋមន្ត្រីការបរទេសអាមេរិកលោក អានតូនី ប្ល៊ីនកែន ដែលកំពុងធ្វើដំណើរទស្សនកិច្ចទៅកាន់អ៊ីស្រាអែល បានព្យាយាមទប់ទល់ផលប៉ះពាល់នៃការលើកឡើងរបស់លោក បៃដិន រួចទៅហើយ។
លោក ប្ល៊ីនកែន បានបដិសេធថា អាមេរិកមិនកំពុងជំរុញជាផ្លូវការដើម្បីទម្លាក់លោក ពូទីន ពីអំណាចទេ។ អ្នកវិភាគជាច្រើននិយាយថា ប្រសិនបើមិនមានធ្វើការបដិសេធបែបនេះទេ វិមានក្រឹមឡាំងអាចកាន់តែមានកំហឹង ហើយប្រធានាធិបតីរុស្ស៊ី អាចថយក្រោយវិញពីការចរចាសន្ដិភាព ឬមិនកាត់បន្ថយគោលដៅរបស់ខ្លួននៅក្នុងប្រទេសអ៊ុយក្រែន។
លោក ប្ល៊ីនកែន និយាយថា៖ «ដូចដែលអ្នកបានដឹង ហើយដូចដែលអ្នកបានឮយើងនិយាយម្ដងហើយម្ដងទៀតយើងមិនមានយុទ្ធសាស្ត្រនៃការផ្លាស់ប្ដូររបបនៅក្នុងប្រទេសរុស្ស៊ី ឬកន្លែងផ្សេងទៀតទេ»។
ភ្លាមៗបន្ទាប់ពីលោក បៃដិន លើកឡើងបែបនេះ សេតវិមានបានព្យាយាមធ្វើការបំភ្លឺរួចទៅហើយ។ អ្នកនាំពាក្យសេតវិមាន ១ រូប និយាយថា លោក បៃដិន មិនមានបំណងធ្វើការផ្លាស់ប្ដូររបបនៅរុស្ស៊ីទេ ប៉ុន្តែគ្រាន់តែជាការសង្កត់ធ្ងន់ថា លោក ពូទីន មិនបាន «អនុញ្ញាតឱ្យប្រើប្រាស់អំណាចលើប្រទេសជិតខាងទេ។
ការលើកឡើងរបស់លោក បៃដិន បែបនេះ គឺហាក់ដូចជាផ្នែកមួយនៃការប្រើប្រាស់ពាក្យសម្តីកាន់តែកាចរបស់លោក បៃដិន ចំពោះលោក ពូទីន ដោយកាលពីប៉ុន្មានម៉ោងមុនលោក បៃដិនបាននិយាយថា លោក ពូទីន ជា «អ្នកកាប់សាច់» ក្នុងអំឡុងពេលនៃការជួបសំណេះសំណាលជាមួយជនភៀសខ្លួនអ៊ុយក្រែន ហើយនៅខែនេះលោកនិយាយថា លោក ពូទីន គឺជា «ឧក្រិដ្ឋជនសង្គ្រាម»។
ការផ្លាស់ប្ដូរភាសាបែបនេះបានធ្វើឱ្យមានភាពច្របូកច្របល់ និងបង្កើតការយល់ឃើញអំពីការផ្លាស់ប្ដូរដោយក្រុងវ៉ាស៊ីនតោនក្នុងការបង្កើនការប្រឈមមុខដាក់គ្នាមួយនៅក្នុងរយៈពេលខ្លី និងអូសបន្លាយភាពតានតឹង ខណៈពេលដែលលោកពូទីនបន្តកាន់អំណាចនៅវិមានក្រឹមឡាំង។ ភាពមិនសូវស្រួល និងតានតឹងបានលេចឡើងក្នុងចំណោមប្រទេសអឺរ៉ុប។ ប្រធានាធិបតីបារាំង លោក អេម៉ានុយអែល ម៉ាក្រុង បាននិយាយថា មិនគួរមាន «ការបង្កើនភាពតានតឹងនៃពាក្យសម្តី ឬសកម្មភាពទេ» ហើយមន្ត្រីអង់គ្លេសមួយចំនួនបាននិយាយអំពីសារៈសំខាន់នៃការរក្សា «ច្រកចេញ» សម្រាប់លោក ពូទីន បញ្ចប់សង្គ្រាមនេះ»។
មិនថា វាបានគ្រោងទុកទេ ការលើកឡើងរបស់លោក បៃដិន បានធ្វើឱ្យមានការព្រួយបារម្ភថា ក្រុងវ៉ាស៊ីនតោន កំពុងបាត់បង់ការគ្រប់គ្រងសាររបស់ខ្លួនអំពីសង្គ្រាមនេះ។ អ្នកវិភាគមួយចំនួននិយាយថា ការលើកឡើងរបស់លោក បៃដិន និងការបំភ្លឺក្រោយមកដោយមន្ត្រីក្រោមឱវាទរបស់លោក នឹងធ្វើឱ្យលោក ពូទីន មានហេតុផលប្រើវាជាការបញ្ជាក់ថា សហរដ្ឋអាមេរិក ពិតជាមានគោលបំណងប្រឆាំងលោក និងរុស្ស៊ីពិតមែន។ ពួកគេនិយាយថា លោក ពូទីន អាចប្រើប្រាស់ការលើកឡើងនេះជាលេសអូសបន្លាយសង្គ្រាមនៅអ៊ុយក្រែន ឬប្រើប្រាស់យុទ្ធសាស្ត្រកាចសាហាវជាងមុន។
យ៉ាងណាមិញគោលដៅចម្បងរបស់លោក បៃដិន ក្នុងអំឡុងពេលធ្វើដំណើរទៅកាន់អឺរ៉ុប គឺដើម្បីពង្រឹងទំនាក់ទំនង និងសម្របសម្រួលយុទ្ធសាស្ត្រជាមួយសម្ព័ន្ធមិត្តណាតូ មុនពេលការសម្រេចចិត្តដ៏លំបាកជាងនេះទៅទៀត ប្រសិនបើលោក ពូទីន បង្កើនសង្គ្រាមរួមទាំងតាមរយៈការប្រើប្រាស់អាវុធប្រល័យលោក។ ដោយធ្វើដំណើរទៅកាន់ចំណតចុងក្រោយក្នុងទីក្រុងវ៉ាសូវី មន្ត្រីរដ្ឋបាលខ្ពស់ៗរបស់លោក បៃដិន ជឿជាក់ថា ប្រធានាធិបតីបានសម្រេចនូវអ្វីដែលលោកគ្រោងធ្វើក្នុងដំណើរទៅកាន់អឺរ៉ុប មុននឹងលោកលើកឡើងបែបនេះ។
ប្រធានាធិបតីអាយុ ៧៩ ឆ្នាំនេះ គឺហាក់ដូចជាកាន់តែក្លាហានជាងមុនក្នុងការប្រើប្រាស់ពាក្យសម្តីដោយសារប្រែប្រួលស្ថានភាពនៃសមរភូមិនៅអ៊ុយក្រែន ខណៈពេលដែលកងទ័ពរុស្ស៊ីប្រកាសដកថយមកផ្ដោតលើការកាន់កាប់តំបន់ដុនបាសវិញ។
បើទោះបីជាមានការជឿជាក់បែបនេះក៏ដោយ ក៏នៅតែមានភាពមិនប្រាកដប្រជាអំពីដំណើរនៃសង្គ្រាម គោលបំណងរបស់លោក ពូទីន និងសមត្ថភាពរបស់ប្រទេសអឺរ៉ុបក្នុងការទ្រទ្រង់ការដាក់ទណ្ឌកម្មសេដ្ឋកិច្ចលើរុស្ស៊ី។ ក្នុងអំឡុងពេលនៃដំណើរទស្សនកិច្ចនេះ សហរដ្ឋអាមេរិកបាននិយាយថា ខ្លួនបានត្រៀមរួចជាស្រេចក្នុងការដាក់ទណ្ឌកម្មលើប្រទេសទី៣ ដែលជួយសម្រួលដល់ការលុកលុយរបស់រុស្ស៊ី ដែលអាចពង្រីកការដាក់ទណ្ឌកម្មហិរញ្ញវត្ថុដល់បុគ្គលក្នុងប្រទេសដែលមានសេដ្ឋកិច្ចធំៗដូចជាចិន និងឥណ្ឌា ប៉ុន្តែវាមិនច្បាស់ទេថា តើអឺរ៉ុបនឹងទៅជាមួយដែរ ឬទេ?
