ចៅក្រមសហរដ្ឋអាមេរិកបានសម្រេច កាលពីថ្ងៃចន្ទថា អតីតប្រធានាធិបតីអាមេរិក លោក Donald J. Trump និងមេធាវីដែលបានណែនាំគាត់អំពីរបៀបលុបលទ្ធផលការបោះឆ្នោតឆ្នាំ ២០២០ រួមទាំងការរារាំងការងាររបស់សភា និងការសមគំនិតក្នុងការបន្លំ ទំនងជាបានប្រព្រឹត្តបទឧក្រិដ្ឋទាំងនោះមែន។
ការអត្ថាធិប្បាយរបស់ចៅក្រមនៅក្នុងសំណុំរឿងរដ្ឋប្បវេណីរបស់លោកមេធាវី John Eastman បានកត់សម្គាល់ពីរបកគំហើញដ៏សំខាន់មួយសម្រាប់គណៈកម្មាធិការសភាអាមេរិកដែលកំពុងស៊ើបអង្កេតការវាយប្រហារ កាលពីថ្ងៃទី ៦ ខែ មករា ២០២១ លើវិមានកាពីតូលរបស់សភា។ គណៈកម្មាធិការ ដែលកំពុងថ្លឹងថ្លែងការបញ្ជូនការចោទប្រកាន់ឧក្រិដ្ឋកម្មទៅកាន់ក្រសួងយុត្តិធម៌បានប្រើប្រាស់ឯកសារក្នុងសំណុំរឿងនេះ ដើម្បីដាក់ចេញនូវការចោទប្រកាន់ឧក្រិដ្ឋកម្មដែលខ្លួនជឿថា លោក Trump ប្រហែលជាបានប្រព្រឹត្តមែន។
លោក Trump មិនត្រូវបានគេចោទប្រកាន់ពីបទឧក្រិដ្ឋណាមួយឡើយ ហើយការសម្រេចរបស់ចៅក្រមពេលនេះ មិនមានឥទ្ធិពលផ្លូវច្បាប់ជាក់ស្ដែងភ្លាមៗមកលើរូបលោកឡើយ។ ប៉ុន្តែវាបានផ្ដល់សច្ចាប័នជាសំខាន់នូវអំណះអំណាងសម្រាប់ការងាររបស់គណៈកម្មាធិការសភាដែលថា កិច្ចខិតខំប្រឹងប្រែងរបស់លោក Trump ក្នុងការរារាំងសភាពីការបំពេញកិច្ចការអាចបង្កើនកម្រិតទោសទៅជាការសមគំនិតឧក្រិដ្ឋកម្ម៕