ក្នុង​ការ​ចរចា​បទ​ឈប់​បាញ់ រុស្ស៊ី​បាន​ឈប់​ទាមទារ​ឱ្យ​អ៊ុយក្រែន​ធ្វើ​ការ​ «បំបាត់​ណាហ្ស៊ី» ហើយ​ត្រៀម​ខ្លួន​នឹង​អនុញ្ញាត​ឱ្យ​ក្រុង​កៀវ​ចូល​ជា​សមាជិក​សហភាព​អឺរ៉ុប​ ប្រសិន​បើ​ពួកគេ​មិន​ចូល​ជា​សមាជិក​សម្ព័ន្ធភាព​យោធា​ណាមួយ។ នេះ​បើ​តាម​ការ​រាយការណ៍​របស់​កាសែត Financial Times​ ដោយ​ផ្អែក​លើ​ការ​លើក​ឡើង​របស់​ប្រភព​ដែល​ដឹង​អំពី​ការ​ចរចា​។

​ក្រុង​ម៉ូស្គូ និង​ក្រុង​កៀវ​ កំពុង​ចរចា​កិច្ចព្រមព្រៀង​ឈប់​បាញ់​មួយ​ ដែល​អាច​ឈាន​ដល់​អ៊ុយក្រែន​បោះបង់​មហិច្ឆតា​របស់​ខ្លួន​ក្នុង​ការ​ចូល​រួម​ជា​សមាជិក​អង្គការ​ណាតូ ជា​ថ្នូរ​នឹ​ង​​ការ​ធានា​សន្តិសុខ និង​ឱកាស​ចូល​ជា​សមាជិក​សហភាព​អឺរ៉ុប​។ ប៉ុន្តែ​ឯកសារ​ព្រាង​ គឺ​មិន​រួមមាន​ការ​ទាមទារ​ចម្បង​របស់​រុស្ស៊ី​ទេ ដូចជា​ «ការ​បំបាត់​ណាហ្ស៊ី» «ការ​រំសាយ​យោធា» និង​ការ​ការពារ​ភាសា​រុស្ស៊ី​នៅ​អ៊ុយក្រែន​ជា​ផ្លូវ​ច្បាប់​។

លក្ខខណ្ឌ​ដទៃ​រួមមាន​ការ​កំណត់​ឱ្យ​អ៊ុយក្រែន​មិន​អភិវឌ្ឍ​ ស្តុក​ ឬ​ប្រើប្រាស់​អាវុធ​នុយក្លេអ៊ែរ​ ហើយ​ហាម​ឃាត់​មិន​ឱ្យ​មាន​មូលដ្ឋាន​យោធា​បរទេស​នៅ​ក្នុង​ទឹកដី​អ៊ុយក្រែន​។ ជា​ថ្នូរ​នោះ អ៊ុយក្រែន​ នឹង​ទទួល​ការ​ធានា​សន្តិសុខ​ពី​រុស្ស៊ី សហរដ្ឋអាមេរិក ចក្រភព​អង់គ្លេស​ កាណាដា បារាំង អាល្លឺម៉ង់​ ចិន​ អ៊ីតាលី​ ប៉ូឡូញ អ៊ីស្រាអែល​ និង​តួកគី​ ដោយ​ការ​ធានា​នឹង​មាន​លក្ខណៈ​«ស្រដៀង»​នឹង​មាត្រា​ ៥ នៃ​កិច្ចព្រមព្រៀង​ NATO ដែល​កំណត់​ឱ្យ​ប្រទេស​ទាំង​អស់​មក​ការពារ​ប្រទេស​មួយ​ប្រសិន​បើ​ប្រទេស​នោះ​រង​ការ​វាយ​ប្រហារ​។ ប៉ុន្តែ​ដើម្បី​សម្រេច​បាន​នូវ​លក្ខខណ្ឌ​នេះ​ ប្រទេស​ជា​អ្នក​ធានា​សន្តិសុខ​ទាំង​នេះ​នឹង​ត្រូវ​យល់ព្រម​ ហើយ​សភា​របស់​ពួកគេ​នីមួយៗ​នឹង​ត្រូវ​ផ្ដល់​សច្ចាប័ន​លើ​កិច្ចព្រមព្រៀង​។ បន្ថែម​ពី​លើ​នេះ​ប្រធានាធិបតី​អ៊ុយក្រែន​ លោក​វ៉ុលឌីមៀរ ហ្សេលេនស្គី​ បាន​និយាយ​ថា ​នឹង​មិន​ត្រូវ​បាន​អនុម័ត​លុះត្រាតែ​មាន​ការ​ធ្វើ​ប្រជាមតិ​ ដែល​អាច​បន្លាយ​ដំណើរ​រហូត​ដល់​១​ឆ្នាំ​។

កិច្ចព្រមព្រៀង​នេះ​ទុក​បញ្ហា​ធំ​បំផុត​ ជុំវិញ​អធិបតេយ្យភាព​ឧបទ្វីប​គ្រីមា ​ និង​តំបន់​ផ្ដាច់​ខ្លួន​នៅ​ដុនបាស ឱ្យ​ដោះស្រាយ​ដោយ​កិច្ច​ពិភាក្សា​នៅ​ពេល​អនាគត​រវាង​លោក​ ហ្សេលេនស្គី និង​ប្រធានាធិបតី​រុស្ស៊ី ​លោក​វ្ល៉ាឌីមៀរ​ ពូទីន​។ ក្នុង​ការ​ចរចា​ពេល​បច្ចុប្បន្ន​ក្រុង​ម៉ូស្គូ​ បាន​ទាមទារ​ឱ្យ​ក្រុង​កៀវ​​ទទួល​ស្គាល់​ថា​ គ្រីមៀរ​ជា​ទឹកដី​របស់​រុស្ស៊ី​ ហើយ​ទទួល​ស្គាល់​ឯករាជ្យ​នៃ​តំបន់​ផ្ដាច់​ខ្លួន​នៅ​ដុនបាស​៕